2 Wòŋ 4 - ŊWÀʼ NYÙY

Vifá veé lav cù

¹ Fòn Solomon‑eè yòŋ, á fèr kíy cù e kisha kee *brons ki, a mbvə̀ʼ wùn à vida vi dzə̀ réŋréŋ kóy e tàn tàn. Vida vee kóʼ koʼón ví wáa dzə kóy e baà e kimbéʼ ki.

² Á kfən fèr mbìʼ wo kuʼùné e kisha kee brons ki, aá yoŋ ji Rìbà Ndzə̀v, a wú dzə̀ é kiŋkar, a móo liysín sə́r dzə̀ kóy e baà e kimbéʼ ki. Vida vi wáa dzə kóy e mòʼón e ntàm se kiwo si sibaà, a móo kaarí, e tar dzə̀ kóy saàmbà e kimbéʼ ki.

³ Vé‑eè fèr vifá e njà nàʼ, ví kaárí sár sər, e tàr, a ví dzə̀ ŋgoo sibaà, a ntàm se kiwo sibaà sí kér nàʼ e ghvə̀m ghvə̀m, aá tón, e làŋsìn e wǔn mbìʼ.

⁴ Vé‑eè tìír mbìʼ vən e kitu ke anàʼ nshòv sibaà e ghvə̀m, ve vé‑eè fèrìn e kisha kee brons ki. Anàʼ vee ataári‑iì kiʼ kuy, a vee ataári kiʼ fo shùy yii nəə, a vee ataári kiʼ tsə́n, a vee ataári kiʼ fo shùy yii tó. Anàʼ vìne‑eè tìím, e siìr vinyè vév fó mvəm.

⁵ Kisər ke mbìʼ kí‑iì dzə̀ é mbvə̀ʼ kiwo, a shúu dzə̀ moo wó bàr bèy, à moo kibuushì ké kikùʼ ké shàʼ. Mendzə́v mè‑eè lo, mè nə̀ə́ shó agalon nsə̀kì nshòv sitàn e ghvə̀m (15,000).

⁶ Á kfən fèr mbìʼ sí e ghvə̀m se á wáa sù vifá sho, e tìír see sitàn e mbìv ye yì kiʼ tsə́n, e tìír see sitàn e mbìv yè yì kiʼ kuy. Mbìʼ sin si‑iì dzə̀ se á wáa sù vifá ve cù ye tonèné shó, áàtàá cùu wáa sù wún fó mbìʼ woo Rìbà Ndzə̀v.

⁷ Vé‑eè fèr sá vitiir ve làm e ghvə̀m e *kisha ke mbàm ke baar kí mo fòn‑eè yòŋèn, e nèn tìír e lav cù, a vee vitàn vi tíy e mbìv yee tsə́n, vee vitàn e mbìv yee kuy.

⁸ Á kfən fèr vidàŋ e ghvə̀m, e tìír e lav cù, vee vitàn e mbìv yee tsə́n, vee vitàn e mbìv yee kuy. Á kfən siì fèr vighín wií e kisha ke mbàm ke baar kí.

⁹ Fòn kfən yòŋ, á bàʼrì maàndzə atàá cù, e kfə̀n bàʼrì ye kuʼùn, e fèr anshìy veé shuù se sí nəə fo, e làʼtí kisha kee brons e wùn wó.

¹⁰ Wù‑uù tìír mbìʼ wo vé‑eè yoŋ ji Rìbà Ndzə̀v é kor lav cù woo fó mbìy wo wú kiʼ tsə́n.

¹¹ Huram‑eè fèr sá kíŋ sí wùn à viŋkwaà vi, à vighín ví, e nèn lò, e màysì lim yee Nyùy lav ye Fòn Solomon‑eè foon ji wù lim e dzə̀m. A vifá ve wù‑uù fèrìn ví dzə̀ jii,

¹² vitóm vibaà, tán seé njà kighìn see sibaà é kitu ke vitom, nsáŋtí wo baán wo wù sə́ti tán see shooy.

¹³ Vitúʼtúʼ ví‑iì dzə̀ ghii kweè, a dzə̀ ve á tatin wùn à nsáŋtí wo baán ji á sheŋri tán seé njà kighìn se sí‑iì dzəə̀n é kitu ke vitom sho, a yee mòʼóne kér vitúʼtúʼ ŋgoo sibaà sibaà.

¹⁴ A wù kfə̀n‑eè fèr vitiir ve mbìʼ wùn à mbìʼ sév sí,

¹⁵ à mbìʼ wo kuʼùné wùn aànàʼ vee nshòv sibaà e ghvə̀m ve wú‑uù tíy e kitu woo,

¹⁶ e fèr kíŋ sí wùn à visoó vi, à vinsòv vi, e lì vifá ve ví yii dzə́ e ghaa vifa fèn. Huram‑eè fèr vifá vee Nyùy Tǎr lav vìn vidzə̀m e kisha kee brons ke kpuún kí, e nèn fò e Fòn Solomon.

¹⁷ A fòn‑eè sùúy, á fèr vifá vìn a dzə̀ é mboʼ ndzə̀v yeé Jordan, e ntìntìn Sukkot wùn à Tsəreda, fo vé‑eè yii ton visha.

¹⁸ Vifá vìn vidzə̀m vi dzə̀, a wù‑uù fèr, ví kùʼ e ŋàŋ, ye bó yòʼ‑oò dzə̀ wìr kìíy ji vidzəəsì vé kishà kee brons ki sà dzə̀ ví wàa dzə e le á.

¹⁹ Fòn Solomon kù‑uù yòŋ, á fèr sa vifá vee Nyùy mvə̀m lav vidzə̀m. Vé‑eè fèr kíy cù woo kisha ke mbàm ke baar kí, e fèr vidàŋ ve kiban ke cù,

²⁰ e fèr sa vitiir ve làm wùn à lam sév sí, e kisha ke mbàm ke baar kee wúntí kíwun ki, a lam sìn si‑iì yíi a ban e mbìy kirə̀ʼ kee jeéy kí mo vé‑eè yòŋèn.

²¹ Á kfən fèr nsáŋti vibuùshì wùn à lam si, à vimfar vi, kifá kidzə̀m e kisha ke mbàm ke baar kí kee wúntí kíwun.

²² Vé‑eè fèr vimfar ve á ndzə́mer və́y shó, à vighín ví, à vikáŋ ve kilay ví, à vikáŋ ve á fəər káy se və̀y shó vi, e fèr kidzə̀m e kisha ke mbàm ke baar kee wúntí kíwun ki. Á kfən fèr apincir ve vé‑eè keerì shuu se lav se sí‑iì nəə fo mvəə́mvəm é kirə̀ʼ kee jeéy kí féyì, à se sí fəə́ e ndzə si, aá ku fèr a dzə̀ e kisha ke mbàm ke baar kí.