2 Wòŋ 36 - ŊWÀʼ NYÙY

Fòn Jehoahas woó Juda

¹ Wír veé Judàa nèn lì wan Josia woo Jehoahas, e kòʼór ji fon, wù wáa saʼ e tàr wóv ntaʼ, e Jerusalem.

² Vé‑eè kòʼór Jehoahas ji fon, a wù dzə̀ kiyá nshòv sitaár e mbaà. Wù sáʼ vifon ŋwee e taár, a wù dzə́ e Jerusalem.

³ A kí dzə̀ jii, Fòn Neko woó Ejiv‑iì wìy é Jerusalem, e sù wun, e yòŋ ji wír veé Judàa wáa fo a nshwì, *kisha ke mbàm ke fəvír kí akilu kishóv ghii kweè aànsə̀kìi ataár (3,400), ke baar kí akilu nshòv sikweè e mtaár.

⁴ Wù nèn lì Eliakim woo fər Jehoahas, e kòʼór ji fon wo wù wáa saʼ Juda wùn à Jerusalem, e nèn kùvsín yír Eliakim, e yòŋ ji Jehoyiakim. Á bèy, Fòn Neko nèn lì Jehoahas woo fər Eliakim, e dù sho e Ejiv.

Fòn Jehoyiakim woó Juda

⁵ Vé‑eè kòʼór Jehoyiakim ji fon, a wù dzə̀ kiyá nshòv sitàn e mbaà. Wù sáʼ vifon kiyá nshòv mòʼón e ghvə̀m, a wù dzə́ e Jerusalem. Jehoyiakim‑eè yii vinyo ve ví wáa bir Nyùy Tàr woo Nyùy və.

⁶ Fòn Johoyiakim kú a saʼ bèy, Nebukadnessar woo fon woó Babilon nèn lò, e nə̀ə́ rə́r é Juda, e kùr wun aàsháŋé, e lì, e dù sho e Babilon.

⁷ Nebukadnessar‑iì lì sá vifá veé lav cù vímóʼ ví, e lèm e wun ntoʼ e Babilon.

⁸ Ké vinyò vímóʼ ví vee Fòn Jehoyiakim mvə̀m saʼ, à vinyo ve koʼoyín ve wù‑uù yiìn ví, à vinyo ve ví‑iì koó kiwuú kfə́ ví, á sàŋ é ŋwàʼ wo dzəə̀n Ŋwàʼ Afòn veé Isray wùn à veé Judàa. Jehoyiacin woo wan Fòn Jehoyiakim nèn yì vifon, a saʼ e tàr wóv ntaʼ.

Fòn Jehoyiacin woó Juda

⁹ Vé‑eè kòʼór Jehoyiacin ji fon, a wù dzə̀ kiyá waamé, wù sáʼ vifon ŋwee taár e vishiíy ví e ghvə̀m, a wù dzə́ e Jerusalem. Wù‑uù yii vinyo ve ví wáa bir Nyùy Tàr.

¹⁰ Mo wù‑uù kèʼèn sáʼ rə́ é kimgbù ke wuu, Fòn Nebukadnessar woó Babilon túm wíri, á koó wun, e kfə̀n kùúy vifá ve ker veé lav cù veé kilùm, e tàtí wùn à fòn, e dù sho e Babilon. Á bèy, Nebukadnessar nèn kòʼór Tsədekiya woo fər Fòn Jehoyiacin ji fon wo wù wáa saʼ Jerusalem, a saʼ Juda.

Fòn Tsədekiya woó Juda

¹¹ Vé‑eè kòʼór Tsədekiya ji fon woó Juda, a wù dzə̀ kiyá nshòv mòʼón e mbaà, wù sáʼ vifon kiyá nshòv mòʼón e ghvə̀m, a wù dzə́ e Jerusalem.

¹² Wù‑uù yii vinyo ve ví wáa bir Nyùy Tàr woo Nyùy və. Wù yòʼ‑oò lo lì kitú kfə́ kitérí e Jeremia woo *ŋgaà ntum Nyùy si wo wù‑uù tiísi kinyo e wun, a dzə̀ ke wù‑uù yú fo Nyùy Tǎr shuù.

Wír veé Babilone laár Jerusalem

¹³ Fòn Tsədekiya nèn lò, e mèŋ sáʼ Fòn Nebukadnessar, a Fòn Nebukadnessar‑iì yiì ne, Tsədekiya lìʼ e Nyùy yir ji wun yíi a neŋ a e wun sar saʼ. Tsədekiya kú a tav kitú tavín, e tèn fó bìnèr shilív sə́, e kfən fo Nyùy Tàr woo Nyùy wìr veé Isray wùn.

¹⁴ Atàá cù ve dzəə̀n ji vilìmbìy, à wìr dzə̀m kù‑uù bìn ne ndzə̀m bínen e Nyùy Tàr, a jùmrì vinyo ve koʼoyín ví ve vitúm vi‑iì yii, cu mebvə̀m. Áwune nèn bìvír lav Nyùy Tàr yeé Jerusalem, la yì yòʼ dzə́ə a dzə e ránén ye dzə̀ á wàa cù wun fo.

¹⁵ Nyùy Tàr woo Nyùy atàr vév kù‑uù rə́si tsə́nsi aŋgàa ntum və́ fo áwuné wùn ji á wáa kàntì a áwune fó vinyò ve bi ví, bìʼ fo wù‑uù rə́r mendzən me wìr və́, kfə̀n rə́r me lav cù ye dzəə̀n kirə́ʼ kfə́ ké dzə.

¹⁶ Nyùy Tàr‑iì tsə́nsi aŋgàa ntum və́ bey, a wír veé Judàa shéʼ áwune shéʼén, keŋ kèŋèn, nèn ŋwáy jí se wun woo Nyùy. Kù bey, e dù, e meé mo dòʼshwiiy Nyùy Tàr‑iì ŋaʼayin, e kìʼ áwune vee wír və́, a kifá ke dzə̀ kí sə̀r wun ki yòʼ dzə̀.

¹⁷ Á bèy, Nyùy Tàr nèn tsə̀nsí fon woó Babilon, wù wìy, e nə̀ə́ áwune e rə́r sí, sí teè vilum, e dù, e mèé e lav cù. Fòn woó Babilon yòʼ‑oò lo rə̀r mendzən me wìr, kìn wánlè ŋgòn, kìn wánlè nsùm, kìn ŋgàywìr, e lì taàta wìr. Nyùy‑iì wày áwune adzə̀m e fòn woó Babilon kiwo.

¹⁸ Fòn woó Babilon‑eè kùúy vifá ve ker vidzə̀m vee Nyùy lav, à ke terí kí, à ke kuʼùn kí, e kfə̀n kùúy bùʼ woo Nyùy Tǎr lav, e kùúy woó ntoʼ wùn à wo atǎr ntoʼ, e dù sho e Babilon.

¹⁹ Vé rər vəə́‑əə̀ tòn lav cù, e kètì kay yeé ŋkàlaʼ Jerusalem, e tòn vimà vé lav vee fó vidzə̀m, e sə̀ʼsí kifá keé kilùm kidzə̀m.

²⁰ Vé‑eè kùúy kibér ke wìr ke rə́r sí yòʼ‑oò lo laàr, e dù sho e Babilon. Á dù sho, áwune nèn dù a lìm vikwàn fo Fòn Nebukadnessar, a lìm fo wón vəə́. Á lìm bèy, e dù, e mèé mo sáʼ yeé Persiàa‑aà wìyìn.

²¹ Á bèy, kinyo ke Nyùy Tàr‑iì yiìn ne yòŋ, e shaà fo ŋgaà ntum və woo Jeremia ki nèn ghèén. A kí dzə̀ jii, nsay wíy gòʼ kisáŋ, aá yòʼ lime kiyá msaàmbà, e fíʼ kfəmén, e koo kaá vibaamé ve ví‑iì gòʼòn là bám.

Fòn Sayrus fó sáʼ ji wír veé Judàa wáa kfən a e bàm

²² Wáa dzə e kiya ke vé‑eè koʼorin Sayrus ji fon woó Persia, Nyùy Tàr nèn yiì kinyo ke wù‑uù yòŋèn, e shaà fo ŋgaà ntum və woo Jeremia ki gheén. Nyùy Tàr kùm shilív shé Sayrus, wù fó sáʼ, yí ghánén woŋ və́ e dzə̀m, e kfə̀n sàŋ sá aŋwàʼ, á ghánén.

²³ Wù‑uù sàʼ jii, «Nyùy Tàr woo Nyùy woó yuv fò ne vitúm vidzə̀m veé kitu ke nsay ji m wáa saʼ, e kfə̀n shòʼ mo ji m baʼri lav rə é Jerusalem, e wòŋ woo Juda. Kí nén a dzə jii, ven ve dzəə̀n wír Nyùy Tàr adzə̀m, a dzə̀ vèn wàa kfən. Vèn lóo dù, é Nyùy Tàr woo Nyùy won kú a dzə vèn áwune.»