2 Wòŋ 31 - ŊWÀʼ NYÙY

Fòn Hesekiya siír vinyo veé lav cù fo

¹ Vé‑eè yì ŋkàʼ, e màysì, wìr dzə̀m woó Isray wo wù‑uù dzəə̀n fó nèn fəə̀, e dù e ŋkà se laʼ seé Juda, e bvə̀ʼtí sə́y se sí‑iì tíynin aáwuné virə̀ʼ vé cù, e gwàtì wúr sé nyùy woo *Ashera, e kfə̀n kètì virə́ʼ vé anyùy wùn à kíy se cù si. Vé‑eè kètì bey woŋ Juda e dzə̀m, e kètì sa e nsay Benjamin, à ye Efrayim, à ye Manasse. Vé‑eè màysì virə́ʼ vé anyùy vidzə̀m, e kètì, wìr dzə̀m woó Isray nèn a kfən e wun ntèʼ, a wìr mòʼón mòʼón du e wun kitu ke keŋ.

² Fòn Hesekiya yiì lò, e sìysì vinyo ve atàá cù wùn à vé wìr veé ram Levìi. Wù‑uù jàvtì áwune áàkáŋ aàkáŋ mo kí‑iì dzəə̀n ji lim yéví wáa dzə, a yí‑iì dzə̀ jii, á wáa yiì a cu se tonèn sí, a yiì sé kikòŋnìn, a yiì lim seé lav cù, a yòv luŋ si é shuù se vibùʼ, a sùyrì Nyùy sho, a fo vibeerì e wun.

³ Fòn Hesekiya‑aà lì nyám sə́ símóʼ sí, e fò ji á wáa yiì a cu se tonèn sí shó, mo á saŋen é Ŋwàʼ Nsər Nyùy Tàr. A sí dzə̀ jii, se vé‑eè yii kijàvndzə, yii e ŋkuùr, à seé vishiíy vé bam vi, à seé *Ŋkǎʼ Ŋwee wo Fíyi, e bóo lì seé vishiíy vé ŋkàʼ vímóʼ ví.

⁴ Wù kfən fò sáʼ ji wír veé Jerusaleme fó á vifá ve vé‑eè kér fó a fo aàtàá cùu, a fo e wír veé ram Levìi, ve á tóm áwune, aá fíʼ a way vifií vév a dzə̀ é kinyò kee bìʼ Nsər se Nyùy Tàr.

⁵ Wíri‑iì yù sáʼ rə̀n, e nèn kù a wìy e ŋgòn se vifa see jeéy jeéy sí sigháʼán, sé vifa veé sum veé liì sàŋ, à sé melùʼ si, à sé meŋgvə̀r sí, à sé vilù si, e bóo lì sé vifa veé sum vímóʼ ví. Á kfən wìy e nsùʼ vifa vidzə̀m, aá jav kifá kee shó kirə́ʼ e ghvə̀m, á fò a dzə̀ kee kimòʼón ki. Á bèy, á nèn a fo vifá vigháʼán vigháʼán.

⁶ Wír veé Isray ve vé‑eè dzə́ e ntèʼ seé Juda, à wír veé Juda vee fóo nèn a wìy sa e nsùʼ anàʼ wùn à wo bvəy, e lì sa nsùʼ vifa vee jeéy ví, nsùʼ vifa ve vé‑eè lèmèn ne ji vé Nyùy Tàr woo Nyùy wov. Á bèy, vifá vi nèn a fum e vikfər vikfər.

⁷ Vé‑eè kèʼ, a fum vifá vìn, a dzə̀ fó ŋwee woo taár, e fùm bey, e dù, e mèé e ŋwee woo saàmbà.

⁸ Fòn Hesekiya wùn aàtǎr ntoʼ vəə́ wìy, e yèn vikfə́r ve vifa vìy, e bùrí Nyùy Tàr, e beèrì wír və́ veé Isray.

⁹ Wun woo fon nèn a ghay wún wùn aàtàá cùu, à wír veé ram Levìi kùm vifá ve ví‑iì fúm vìy.

¹⁰ Asaria woo kitú ke atàá cù woo ràm fo Tsadok nèn bìnèr jii, «Wíri‑iì kèʼ a wìy e vifá vi e Nyùy Tǎr lav, vèr nèn a ker vifá ve yi kijuŋ, e nèn a yikír, a kur, vifá vi kfə́n a tuyín tuyín vigháʼán. Ví‑iì tùyín ben, bìʼ fo Nyùy Tàr‑iì səə̀vìn wír və́.»

¹¹ Fòn Hesekiya nen yòŋ ji á baʼri á vitáv e Nyùy Tǎr lav. Á ku nèn bàʼrì.

¹² Mo á bàʼrìn, e nèn kwèʼ kifá kidzə̀m ke wíri‑iì foon, e wày é vitàv fey. Vifá vìn vi‑iì dzə̀ jii, afómo wùn à nsùʼ vifa wo vé‑eè li kee kimòʼón fo vee ghvə̀m vi, à vifá ve vé‑eè lèmèn jeéy ji vé Nyùy vi. Wìr wo wù‑uù leey fo vifa fèn dzə̀ Konaniya woo wír woó ram Levi, a ŋgaà ntom və dzə̀ fə́r və woo Shimey.

¹³ Ámóʼ vee wíri nén a dzə ve vé‑eè lim aáwuné sar, leey lim see jeéy jeéy, aá dzə̀ jii, Jehiel, Asasia, Nahat, Asahel, Jerimot, Josabad, Eliel, Ismakia, Mahat, e bóo lì Benaya. Vé lìm vìne dzə̀ ben, a yì‑iì shòʼtí Fòn Hesekiya wùn Asaria woo taà cù wo kuʼùn wo wù leey fo Nyùy Tǎr lav.

¹⁴ Wìr lìm wùmòʼ kfə́n a dzə Kore woo wan Imna, a dzə̀ wír woó ram Levi, a wù shiy shúu kày wo wú kiʼ mbìv yee fo shùy yii tó. Wù‑uù leey fo vifa ve vé‑eè fó e Nyùy ji cú kimbòŋwùn, kfə̀n leey fo kijàv ke nsùʼ wo vé‑eè fó e Nyùy Tàr. Wù kfə̀n‑eè leey sa fo kijàv ke vifa vee jeéy ví.

¹⁵ Wír ve vé‑eè sə́ wun e ŋkà se laʼ see fo atàá cùu‑uù dzəə̀né dzə̀ jii, Eden, Miniamin, Jeshua, Shemayia, Amaria, e lì Shekania. Vé‑eè sə́ wun kijuŋ, jav vifá ve yi aàfə́r véví, a ŋgày sé wìr wùn à wónlèé kù kooy vifá réŋréŋ mo akáŋ véví dzə̀kìn.

¹⁶ Vé‑eè jav vifá e vilum vee kèʼ fó kiya mtaár e koʼ koʼón, kù mo vé‑eè wayin ne yír sév é ŋwàʼ woo áwuné ram. Vé‑eè jav e wìr dzə̀m wo wù‑uù nəə e Nyùy Tǎr lav, yii lim yeé kishiíy, aá kù jav mo lim yéví dzəə̀n áàkáŋ aàkáŋ.

¹⁷ Akáŋ lìm vìne‑eè dzə̀, a vé‑eè sìysì ne vé atàá cù mo lav se atàr vév sí dzə̀kìn. Ké wìr veé ram Levi, vé‑eè jàv áwune jávin áàkáŋ, a bó á yòʼ cí lav sév, e kù lì wir dzə̀m woo kèʼ fó kiya mbaà, e koʼ koʼón.

¹⁸ Vé‑eè sàŋ yír sé wír vìn adzə̀m e ŋwàʼ, e sàŋ sá sé won vév vee vilum, à vee vikìyí, e sàŋ sá sé won vév ve bóri. Vé‑eè sáŋ bèy, bìʼ fo wír vìne kù‑uù kér fó a lèm vitú vév aránén ghán sidzə̀m ji á wáa yiì lím Nyùy.

¹⁹ Ké atàá cù ve vé‑eè dzə́ e ŋkà se laʼ se vé‑eè lèmèn ji sé wón Aaron, à ve vé‑eè dzə́ e ŋgvən se kwaʼ seé ŋkà se laʼ sìn, wíri wáa dzə aáwuné mvəm ve vé‑eè shoʼtin ji á wáa jàv a vifá ve yi aáwune, e kù a jàv bèy, e vilum adzə̀m vee kfə́ə atàá cù, a jàv sa e wìr dzə̀m woó ram Levi wo yír rəə́ dzəə̀n e sáŋén é ŋwàʼ.

²⁰ Á mo Fòn Hesekiya‑aà yiìn vinyo woŋ Juda e dzə̀m. Wù‑uù yii vinyo ve juŋ vi wùn à vee tìítiy vi, kfə̀n tíy kijuŋ wùn Nyùy Tàr woo Nyùy və.

²¹ Vinyo ve wù‑uù yii vidzə̀m, wù kù‑uù tiir a dzə̀ Nyùy fo mbìy, nèn yii shilív sə́ shidzə̀m, kìn dzə̀ vinyo ve wù‑uù yii bìʼ lav Nyùy, kìn vímóʼ vee vinyo ve wù‑uù yii mo Ŋwàʼ Nsər Nyùyi taʼà. Nyùy ku nèn sə̀ wun, vinyo və́ ví wáa dù kijuŋ.