2 Wòŋ 29 - ŊWÀʼ NYÙY

Fòn Hesekiya woó Juda

¹ Fòn Hesekiya‑aà kèʼ, a saʼ vifon, a wù dzə̀ kiyá nshòv sitàn e mbaà. Wù‑uù sàʼ kiyá nshòv bvə̀ʼə̀ e mbaà, a wù dzə́ e Jerusalem. Yír yè woví‑iì dzə̀ Abija, a dzə̀ wan Sekariya.

² Hesekiya‑aà yii vinyo ve ví wáa gheén Nyùy Tàr, kù réŋréŋ mo tàr wov Davir‑iì yii.

Á kfə́mrí lav cù

³ Yì‑iì dzə̀ é kiya ke mbìy ki, e ŋwee mbìyi mo Hesekiya‑aà kèʼèn, a saʼ vifon, wù mvə̀ʼtì shuu se lav cù, e yòŋ, á náŋsín.

⁴ Wù‑uù bàʼtí atàá cù wùn à wír veé ram Levìi é maàndzə lav cù, e mbìv yee fo shùy yii tó,

⁵ e sùúy aáwune jii, «Ven vee rám Levi, vèn yuúrí. Vèn kfə́mrí vitú vén ví, e *kfə̀mrí lav Nyùy Tàr woo Nyùy atàr vén. Vèn fəə́r kifá ke kí kóʼoy ki kidzə̀m fo lav cù.

⁶ Atàr vesəné yòʼ‑oò ló a tiy tìítiy wùn à Nyùy Tàr woo Nyùy wòsən. Vé‑eè yii vinyo ve ví yòʼ gheen wun. Áwune‑eè màʼày Nyùy Tàr, e fə̀ə́r vifií vév fó lav ye wù dzə́ sho, e nèn bìn ndzə̀m e wun.

⁷ Vé‑eè sə̀tí shuu se lav cù, e ndzə̀mér lam si, e làa yòʼ dzə́ə a tòn kiláy é kirə̀ʼ ke dzəə̀n ké Nyùy, e làa yòʼ dzə́ə a tòn sa cu si fó, a cù Nyùy wìr veé Isray sho.

⁸ Nyùy Tàr nèn shwìíy kilòŋ, e màʼ ŋgeʼ e wòŋ woo Juda, ǎ Jerusalem, wíri wáa leéy, a fàn, wúné wáa beemé áwune, á wáa ghay woŋ və̀n. Vèn dzə̀ a vèn yén sa e sí yéné.

⁹ Á kifá ke kí yiìn, é bo rə́r sí laar atàr vesən, á kfən kùúy wón vesən wùn à vikìy, e dù sho ji akookòŋé.

¹⁰ «Ké lèn ki, m taʼ ji vèsən yii ŋkàʼmé vèsən à Nyùy Tàr woo Nyùy wìr veé Isray, é la wù yòʼ dzə́ə a shwiíy kilòŋ vèsən áwune.

¹¹ Wòn vem, lá vèn yòʼ dzə́ə a ghvəə. Nyùy Tàr shòʼ ne ven ji vèn wáa tiy e wun si, a yiì lim sə́, e kfə̀n a tòn kiláy, a cù wun sho.»

¹² Á bèy, wír veé ram Levìi nèn bàʼtí ji á keʼ á lim. Vé‑eè dzə̀ jii, Fo kfəə Kohat, yì‑iì dzə̀ Mahat woo wan Amasay wùn Joel woo wan Asaria. Fo kfəə Merari, á wáa ker Kish woo wan Abdi wùn Asaria woo wan Jehallelel. Fo kfəə Gershon, yì‑iì dzə̀ Joa woo wan Simma, à Eden woo wan Joa.

¹³ Fo kfəə Elisafan, á wáa ker Shimri wùn Jeyuel. Fo kfəə Asav, yì‑iì dzə̀ Sekariya wùn Mattania.

¹⁴ Fo kfəə Heman, á wáa ker Jehuel wùn Shimey. Fo kfəə Jedutun, nén a dzə Shemayia wùn Ussiel.

¹⁵ Wír vìne nèn bàʼtí afə́r vév vee rám Levi, wùn áwune *kfə́mrí vitú vév, e nèn kèʼ a kfəmrí lav cù mo nsər Nyùy Tàr suuyì, kù mo Fòn Hesekiya kì yòŋèn.

¹⁶ Atàá cùu‑uù nə̀ə́ é lav cù, e fə̀ə́r kifá ke kí kér *kifàn kidzə̀m, e neèr e maàndzə yeé lav cù, wír veé ram Levìi kuúy, e dù sho e Kiwoóy ké Kidron.

¹⁷ Vé‑eè kèʼ lim yév é kishiíy ké mbìy ki fó ŋwee mbìyi. Kí lòo meé ji vishiíy waamé, á meé é kibùʼ ke kí nəə e lav cù. Á kèʼ ŋgàm yìmòʼ, yì lòo mày, a sì ji kishiíy nshòv ntuùfú e ghvə̀m, á màysì, e kfə̀mrí lav Nyùy Tàr.

Á kfən fò lav cù e Nyùy Tàr

¹⁸ Áwune nèn lò, e dù, e yèn Fòn Hesekiya, e sùúy e wun jii, «Vèr kfə̀mrí ne lav Nyùy Tàr e dzə̀m. Á kfə̀mrí *kíy cù woo wó cù ye tonèné wùn à vifá və́ ví, e kfə̀mrí sa kidàŋ ke kiban ké cù wùn à vifá veé kidàŋ foo fèy vi vidzə̀m.

¹⁹ Vèr siìr ne vifá ve Fòn Ahas‑iì fəərin fó lav cù e ghan se wù‑uù meŋen Nyùy. Ví sì lèn e Nyùy Tǎr mbìy kiy cù, aá kfə́mrí ne, a ví sì vibáʼtín.»

²⁰ Ndzə bvəə́shí, e ràn, Fòn Hesekiya báʼtí atǎr saʼ veé ŋkàlaʼ, wùn áwune kóʼ e Nyùy Tǎr lav.

²¹ Áwune‑eè kér anàʼ saàmbà, viyáʼ saàmbà, wón njiì saàmbà, e bóo lì vibév saàmbà, a dzə̀ vé cù ajay ji á mán á ajay wòŋ, e màn vé wíri, e kfə̀mrí sa lav cù. Fòn nèn yòŋ atàá cù, áwune vee wón Aaron ji á li á nyám sìn, e cù a Nyùy Tàr shó, e kiy cù.

²² Á nèn seèrí anàʼ wùn à viyáʼ vi, à wón njìi. Atàá cùu lì mensə́, e wàŋrí e kiy cù.

²³ Á nèn lì vibév ve cù ajay, e wìy sho e fòn wùn à wírí si, áwune neèr wó yév é vitu wo,

²⁴ atàá cùu nèn seèrí, e lì mensə́, e yiì cú ajay sho e kiy cù ji á mán á ajay wìr veé Isray adzə̀m. Dzə̀ mo fòn‑eè yòŋèn ji á yii á cu ye tonèné, e kfə̀n yiì a yé ajay fo wír veé Israyi adzə̀m.

²⁵ Fòn Hesekiya‑aà tìír wír veé ram Levi aáwuné virə̀ʼ e Nyùy Tǎr lav. Wù‑uù fò vifá ve kwaʼán ví aáwune, à lúŋ nshìí wùn à yé mbàytìi, kù mo Nyùy Tàr‑iì yòŋèn, e shaà fo Fòn Davir, e kfə̀n shaà fo Gad woo ŋgaà si fòn, à fo Natan woo *ŋgaà ntum Nyùy.

²⁶ Wír veé ram Levìi nèn tìím e visháʼáy vé Davir ví wo, atàá cùu tiím sá e sóŋ sí é wo wo.

²⁷ Fòn Hesekiya nèn fò vitaáví ji á yii á cu ye tonèné é kiy cù. Á lòo kèʼ ji á sí yii a cu, wíri nèn, kèʼ a yòv, a sùyrì Nyùy Tàr, vé sòŋé wáa toŋ sóŋ, wír ámóʼó wáa kùm visháʼáy vé Davir woo fon woó Isray.

²⁸ Wìr dzə̀m wo wù‑uù dzəə̀n fó‑oò suyrì Nyùy, a vé yòvi yovì, a vé sòŋé tóŋé. Kí kú a dzə bèy, e dù, e meé mo vé‑eè màysìn cu ye tonèné.

²⁹ Vé‑eè màysì bey, Fòn Hesekiya wùn à wìr dzə̀m wo wù‑uù dzəə̀n fó nèn tsə̀m ndzəə́, e làʼ kitú fo nsay, e ghvə̀m Nyùy.

³⁰ Fòn Hesekiya wùn aàtǎr ntoʼ vəə́ nèn yòŋ e wír veé ram Levìi ji á wáa sùyrì a Nyùy Tàr e luŋ se Davir wùn Asav woo ŋgaà ntum Nyùy‑iì saŋen sí. Á bèy, áwune nèn a yòv luŋ si, a sùyrì Nyùy e kishéʼrì ki, a gvəʼtí, a ghvəm wun.

³¹ Fòn Hesekiya nèn sùúy e wíri jii, «Vèn fò ne vitú vén e Nyùy Tàr. Vèn wáa wìy e cu si e Nyùy Tǎr lav, a wìy e sé a beèrì wun sho si.» Á bèy, wíri nèn a wìy e cu si, a wìy e sé a beèrì Nyùy sho si. Wìr dzə̀m wo wù‑uù kér shilív she juŋ shi nèn a wìy sa e cu ye tonèné.

³² Nyám se cù se wíri‑iì wìyìn shó ji á ton, e yiì cu sho e Nyùy Tàr sí‑iì dzə̀ jii, nàʼ msaàmbà, kiyáʼ wií, e bóo lì wón njiì ghii baà.

³³ Cú kikòŋnìne‑eè dzə̀ nàʼ ghií ntuùfú wùn à bvə́y si ansə̀kì ataár.

³⁴ Atàá cù ve yì‑iì dzə̀ á yùv nyám se cù ye tonèné‑eè dzə̀ ashàr. Vé‑eè dzə̀ ashàr, bìʼ fo atàá cù aníne yòʼ‑oò ló ne kfə̀mrí vitú vév mo nsər dinè. Á bèy, afə́r vév vee rám Levi ve á yii lim seé lav cùu nèn a sə áwune, e dù, e meé mo vé‑eè yùvìn nyám, sí mày. Afə́r vév víne dzə̀ kév, a vé‑eè wày shilív e Nyùy kinyò, e shaà atàá cù, e nèn kfə̀mrí vitú vév, e shaà áwune.

³⁵ Á tòn cu se tonèn see sigháʼán sin, e kfə̀n tòn fóm se á kooyin fó cù se kikòŋnìn. Á kfə̀n‑eè kér sa cú melùʼ yeé ghaa cù ye tonèné. Á mo vé‑eè siìrìn vinyo vee Nyùy Tǎr lav, ví kfə́n fó bèn.

³⁶ Fòn Hesekiya wùn à wír veé Juda adzə̀me ku nèn a sheʼrí bìʼ kinyo ke Nyùy Tàr‑iì yiìn aáwune. Wù‑uù yiì, líme mày cér, e shaà mo vé‑eè kwaʼtì.