2 Wòŋ 27 - ŊWÀʼ NYÙY

Fòn Jotam woó Juda

¹ Jotam‑eè kèʼ sáʼ, a wù dzə̀ kiyá nshòv sitàn e mbaà, e wìy sàʼ vifon kiyá nshòv ntuùfú e ghvə̀m, a wù dzə́ e Jerusalem. Yè wov‑iì dzə̀ Jerusha woo wan Tsadok.

² Jotam‑eè yii vinyo ve ví wáa gheén Nyùy Tàr, kù réŋréŋ mo tàr wov Ussiya‑aà yii. Yii bèy, wù yòʼ‑oò lo mùm kuv wóo nəə́ e Nyùy Tǎr lav ji wun ton á kiláy, fə̀m mo wíri kù‑uù shaa fo mbìy e liì kisaŋ.

³ Wù‑uù bòm shúu kày woó dzəə ye yì nəə e Nyùy Tǎr lav fo kùy, e kfə̀n bònen bòm kirə́v ké kày ye á yoŋ ji Ofel.

⁴ Wù‑uù bàʼrì ŋkà se laʼ aàgwan veé Juda, e bòm láʼ see vikum wùn à virə́ʼ vé ŋkiy vi, e virə̀ʼ vé kòv ví.

⁵ Fòn Jotam‑eè màʼ rə́r wùn fòn woó Ammon, e tòn wun. Wír veé Ammone nèn a fo nshwì e Fòn Jotam. Yì‑iì dzə̀ é kiya foo fèy, vé‑eè fò *kisha ke mbàm ke fəvír kí akilu kishóv ghii kweè aànsə̀kìi ataár (3,400), e fò sáŋ yee *wit vibam nsə̀kì mbaà (20,000), e fò sá sáŋ yee *barli bèy. Áwune kù‑uù fò nshwì réŋréŋ bey e kiya ke kí‑iì batin, à ke kí‑iì meen ji taár kí.

⁶ Fòn Jotam nèn lò, a ker vitaáví, bìʼ fo wù‑uù yúnin Nyùy Tàr woo Nyùy və.

⁷ Ké vinyò vímóʼ ví vee Fòn Jotam mvə̀m saʼ, à rə́r sidzə̀m se wù‑uù màʼàn sí, à liì və, á sàŋ é Ŋwàʼ Vinyò ve Afòn veé Isray wùn à veé Judàa.

⁸ Vé‑eè kòʼór Jotam ji fon, a wù dzə̀ kiyá nshòv sitàn e mbaà. Wù sáʼ vifon kiyá nshòv ntuùfú e ghvə̀m, a wù dzə́ e Jerusalem.

⁹ Fòn Jotam‑eè lày, á lìtì e Ŋkàlaʼ Davir. Ahas woo wán və yí vifon, a saʼ e wun ntaʼ.