2 Wòŋ 26 - ŊWÀʼ NYÙY

Fòn Ussiya woó Juda

¹ Wír veé Juda adzə̀me nèn lì lèn Ussiya woo wan Amatsiya, a wù dzə̀ kiyá nshòv ntuùfú e ghvə̀m, e kòʼór ji fon e tàr wóv ntaʼ.

² Dzə̀ wun wo wù‑uù bàʼrìn ŋkàlaʼ Elat, e siìr fo, e yiì, yì kfə́n ji ŋkàlaʼ Juda, a Fòn Amatsiya láy ne.

³ Ussiya‑aà kèʼ sáʼ, a wù dzə̀ kiyá nshòv ntuùfú e ghvə̀m, e wìy sàʼ vifon kiyá nshòv sibaà e mtàn, a wù dzə́ e Jerusalem. Yè wov‑iì dzə̀ wán woó Jerusalem, a yírí dzə̀ Jekolia.

⁴ Ussiya‑aà yii vinyo ve ví wáa gheén Nyùy Tàr réŋréŋ mo tàr wov Amatsiya‑aà yii.

⁵ Wù kù‑uù yú fo Nyùy e ghan se taà cù woo Sekariya‑aà dzə̀ə́ sho, a wù tír wun e vinyò ve Nyùy. Mo wù‑uù jumrì Nyùy Tàr bey, Nyùy Tàr nèn səə̀vì wun.

⁶ Ussiya‑aà nə̀ə́ wír veé Filistia e rə́r sí, e kèr kirə́v ké kày yeé Gat, à ké kày yeé Jabne ki, e lì ké kày yeé Ashdod. Wù kèr bèy, e bàʼrì ŋkà se laʼ se fíy símóʼ sí é ŋgvən Ashdod, e bàʼrì sa bèy e virə̀ʼ vímóʼ ví e wír veé Filistiàá nsay.

⁷ Nyùy‑iì sə̀ wun, wù tòn wír veé Filistia, e tòn sa veé Arab, ve vé‑eè dzə́ e Gur‑Baal, e kfə̀n tòn wír veé Meun.

⁸ Wír veé Ammone‑eè fó sa nshwì e Fòn Ussiya. Wù‑uù kér vitaáví é ŋàŋ, a leŋ vəə́ du, mee e Ejiv.

⁹ Wù‑uù bàʼrì virùmèn ve ŋkiy e vitu ve kày yeé Jerusalem, a ví dzə̀ vitávkín. Wù‑uù bàʼrì kímóʼ kí é Shùu Kày woó Kor, e bàʼrì kímóʼ kí é Shùu Kày woó Kiwoóy, e bàʼrì sa fo kimbvə́n ki‑iì dzəə̀n é kirəv ké kày.

¹⁰ Wù kfə̀n‑eè bàʼrì virùmèn e mbìv wòŋ fo fóo dzəə̀n wóʼ wóʼ, e nèn tùŋ bií sé ndzəv fó sinín, bìʼ fo wù‑uù kér nàʼ nyanyày, e bvə̀m agwan wùn ǎ mboʼ. Wù kfə̀n‑eè kér sa vé lìme anín, aámóʼó lim e sum sé vitiír vé *vayin, aámóʼó lim e sé vifa ve yi si. Súm sə́ símóʼ sí‑iì dzə̀ áàgwan, a símóʼ sí dzə̀ é virə̀ʼ fo nsay ye borín‑eè dzəə̀n. Fòn Ussiya dzə̀ wír, a wù‑uù koŋ súm féyì.

¹¹ Fòn Ussiya‑aà kér mànjòŋ rə̀r, a wù kì móo màʼ rə́r kijuŋ. Vé‑eè jàv mànjòŋ və̀n e vishev vishev. Kishév kee shó ki‑iì lo, kí kùʼ, e mèé mo vé kijàvi yenen. Vé kijàvi‑iì dzə̀ Jeyel woo ŋgaà saŋ wùn Ma‑Aseyia woo taà ntoʼ. Yì‑iì yòŋ Hananiya woo mfòóme fòn ji áwune yii á lim rə̀n.

¹² Atǎr kfəə ve dzəə̀n antav ve vé‑eè sáʼ wírií‑iì dzə̀ wír kishóv ghií ntuùfú aànsə̀kìi abaà (2,600).

¹³ Aáwuné sar, vé‑eè kér vé rər ve vé‑eè sə́ kòŋ a dzə̀ é nsaŋ, aá dzə̀ wír kishóv ghií tàn aànsə̀kìi nshòv saàmbà e ghii taár (307,500). Dzə̀ áwune ve vé‑eè tóm fon, a wù gháʼ aŋgàa vibàn və́.

¹⁴ Fòn Ussiya‑aà fò aŋkeè wùn à kòŋ sí, à tán sé kishà si, à vikúm vé kishà vi, à vinte vi wùn à tíy sé viŋkoʼ si e vé rərí.

¹⁵ Və́ vé kilàm ve á kiìn lim kijuŋe‑eè ton amashin e Jerusalem ve á wáa màʼ mvən, a màʼ tíy se faŋkìn sí. Vé‑eè lèm é virùmèn ve ŋkiy ve ví‑iì dzəə̀n é vitu ve kày, e kfə̀n lèm fo vimbvə́n ve kày vi‑iì dzə̀kìn. Nyùy‑iì tòm Fòn Ussiya feyì, wù wáa ker vitaáví é ŋàŋ, leŋ vəə́ dúnén.

Nyùy máʼ ŋgeʼ e Fòn Ussiya kitu

¹⁶ Fòn Ussiya lòo ker vitaáví é ŋàŋ bey, e nèn a koʼór wún. Kiŋkoʼòrwùn kí nèn yiì, wù gbù. Wù‑uù jày kinyo e Nyùy Tàr woo Nyùy və, a wù nəə́ é lav cù ji wun ton a kiláy é kiy kilay.

¹⁷ Asaria woo taà cù wùn à ámóʼó vee atàá cù ve tavkíné nəə́ fó bàm, wír mwaamé,

¹⁸ e shàʼnín ji lá wun woo Fòn Ussiya yòʼ waà mùm. Á wáa shaʼnín bèy, a suúy jii, «Fòn Ussiya, yòʼ dzə̀ kilíŋ ké fó tòn kiláy, e cù Nyùy sho, wun woo Nyùy Tàr. Dzə̀ kilíŋ ke atàá cù, áwune vee rám Aaron. Dzə̀ áwune ve vé‑eè shoʼon ne, e lèm jeéy ji á wáa tòn a kiláy, a cù Nyùy sho. Fəə́ fó kirə̀ʼ kee jeéy kin. À mùm ne kuv, a Nyùy Tàr woo Nyùy yòʼ dzəə́ yiì a yen wò ji kifá.»

¹⁹ Yii bèy, Fòn Ussiya wo wù kì sí tíy kibáʼtín e kikáŋ ki é kiwo ji wun ton kiláy nèn shwìíy kilòŋ, e tàŋnín atàá cù vee shooy táŋnín. Nyùy Tàr ku nèn tsə̀m wun, shìvnsay shìm e wun yírvishi, aàtàá cùu yéné, a wù kù dzəə́ tíy e mbìy kiy cù, e Nyùy Tǎr lav.

²⁰ Asaria woo kitú ke atàá cù wùn aàtàá cù ámóʼó lòo sìn, a shìvnsay koó ne Fòn Ussiya fo yírvishi, á nèn gìtì, a fəə́r wun fo ndzə, a wúnwun kitú kfə́ kù kì sí gir sa, fəə́, bìʼ fo Nyùy Tàr‑iì tsəmen ne wun.

²¹ Fòn Ussiya kù‑uù dzə̀ʼə̀m, e wìy dù, a lày, a shìvnsay kù dzə̀ é wùn wó. Wù‑uù dzə́ lav rə jeéy, bìʼ fo wù‑uù joy shivnsay, a yòʼ‑oò dzə̀ wù kfə̀n mèʼ lav cù. Bìʼ bey, wan və Jotam nèn a leéy fo vinyò veé ntoʼ, e kfə̀n a saʼ woŋ.

²² Ké vinyò vímóʼ ví vee Ussiya mvə̀m saʼ vee kèʼ fó kèʼ, e dù, e màysì vi dzə̀, a yì‑iì sàŋ Aysaya woo *ŋgaà ntum Nyùy, a dzə̀ wan Amot.

²³ Fòn Ussiya‑aà lày, á lìtì wun aàtàr vəə́ ghaŋ e kwaʼ kindzəə̀mè wo dzəə̀n wó afòn, a yòʼ dzə̀ é fəm, bìʼ fo vé‑eè yòŋèn ji wù kér a shivnsay, a bó yòʼ dzə̀ á lìtì á e fəm. Jotam woo wán və nèn yì vifon, a saʼ e wun ntaʼ.