2 Wòŋ 25 - ŊWÀʼ NYÙY

Fòn Amatsiya woó Juda

¹ Vé‑eè kòʼór Amatsiya ji fon, a wù dzə̀ kiyá nshòv sitàn e mbaà, wù sáʼ vifon kiyá nshòv bvə̀ʼə̀ e mbaà, a wù dzə́ e Jerusalem. Yír yè woví‑iì dzə̀ Jehoaddin, a dzə̀ wán woó Jerusalem.

² Amatsiya‑aà yii vinyo ve ví wáa gheén Nyùy Tàr, yii bèy, wù yòʼ‑oò ló a yiì e shilív shí.

³ Sáʼ rəə́‑əə̀ tùúy, wù nèn yùyrí atǎr ntoʼ ve vé‑eè laàrìn tàr wov.

⁴ Yii bèy, wù yòʼ‑oò lo yùyrí wón vév, bìʼ fo wù‑uù jùmrì a dzə̀ Nsər Nyùy Tàr, a dzə̀ kinyo ke vé‑eè saŋen é Ŋwàʼ Mooser jii, «Yòʼ dzə̀ á yùyrí atàr bìʼ jay wòn vév, a bó yòʼ dzə̀ á yùyrí wón bìʼ jay atàr vév. Wìr kù yíi a kpu a dzə̀ fo və́ə woo jay.»

Fòn Amatsiya tón Edom

⁵ Fòn Amatsiya‑aà tòóy wír veé wòŋ woo Juda adzə̀m. Á báʼtí, wù sìysì wír ve dzəə̀n ji rám Juda, à vee rám Benjamine aàkáŋ rər mo kfə́ə sév sí dzə̀kìn, e lèm amfòómé ve á sáʼ wíri nsə̀kì nsə̀kì, à ve á sáʼ wíri wií wií. Wù‑uù sìysì vé rər vin, a dzə̀ wír vee kèʼ fó kiya mbaà, e koʼ koʼón, á wáa dzə wír ansə̀kì ghii taár (300,000), a dzə̀ ve á kiìn móo màʼ rə́r e kòŋé wùn aàŋkèe, aá dzə̀ kibáʼtín adzə̀m.

⁶ Wù kfə̀n‑eè làʼ vé rər veé Isray ve tavkíné wír nsə̀kì wií (100,000), e fò *kisha ke mbàm ke fəvír kí, a kí dzə̀ akilu kishóv ghií kweè aànsə̀kìi ataár (3,400).

⁷ Yii bèy, *ŋgaà ntum Nyùy wùmòʼ nèn lò wìy, e bùn fon, e sùúy jii, «Nyàr, lá á yòʼ waà biìmé, é vé rər veé Israyi shém á ŋgoo e wun bàm, bìʼ á fo Nyùy Tàr yòʼ dzəə̀n á wùn à wír veé Isray vìn vee kfə́ə Efrayime.

⁸ A fòn lò, a kwàʼ ji wun yíi a tiy a kitávín é shùu rər ji bìʼ wír vìn, bo Nyùy yíi màʼ wun aàŋgàa vibàn vəə́ si, bìʼ á fo Nyùy kér vitaáví vée sə wír, kfə̀n kér a vée màʼ wír.»

⁹ Fòn Amatsiya dzə́r e ŋgaà ntum Nyùy və̀y jii, «Ké kisha ke mbàm ke m fəərin nyanyày, e làʼ vé rər veé Isray sho ki dzə̀ ji ka?» Ŋgaà ntum Nyùy bìnèr jii, «A dzə̀ Nyùy Tàr kfə̀n fò fon kifá ke kí kuʼ, e shaà bèy.»

¹⁰ Á bèy, Fòn Amatsiya nèn siìr vé rər vee kfə́ə Efrayim vìy e bàm. Á nèn a kfən e laʼ, aá shwiiy kilòŋ é ŋàŋ kùm wír veé Juda.

¹¹ Fòn Amatsiya kúr shilív, e lì və́ vé rər, e dù sho e Kiwoóy ké Shiŋgwaŋ, e nèn laàr wír veé Edom nsə̀kì e ghvə̀m (10,000).

¹² Wùn à vé rər veé Judàa kfən koòrí wír ámóʼó nsə̀kì e ghvə̀m (10,000) atin, e kòʼ shó e kitu ke koŋ, e dòm e koŋ fey, á fòrkìr e vilan.

¹³ Ké vé rər veé Isray ve Fòn Amatsiya‑aà siìrìn é bàm ji wùn áwune yòʼ du rə́r kí dzə̀ jii, vé‑eè lòo kfən e bàm bey, e nèn kèm rə́r é ntèʼ seé Juda see kèʼ fó Samaria, e dù, e mèé e Bet‑Horon. Áwune‑eè yùyrí wíri ansə̀kì ataár (3,000), e kùúy nsàʼmboʼ e gháʼán.

¹⁴ Fòn Amatsiya‑aà tòn wír veé Edom, e tàyrí mebvə̀m mev, e wìy sho ji sì á anyùy və́, e nèn tìír, a ghvəm, a cù.

¹⁵ Kinyo ke Fòn Amatsiya‑aà yiìn kin ki‑iì nyàr Nyùy Tàr, wù nèn tsə̀nsí ŋgaà ntum və ji wù du, e dzə̀r á e Fòn Amatsiya jii, «Bòŋ ka wò, bo à wáa cù anyùy vitum, aá yòʼ fə̀m‑eè lo bòyìr wír vév fo wò kiwo?»

¹⁶ Kú a dzə, a ŋgaà ntum Nyùy dzəə́ súŋninè, Fòn Amatsiya nèn shèr jí rə jii, «Lèm la wò ji ŋgaà ntir fòn? Sə́tí shuu wóo, bo wò‑óò kpú.» Ŋgaà ntum Nyùy nèn sə̀sín, e bóo lò, e suúy jii, «M yèn ne ji Nyùy wày ne ji wun kù‑úù laar wò. À kì yiì ne jay, m lóo fo ntir lèn, à tén yú.»

Wír veé Israyi tón veé Juda

¹⁷ Fòn Amatsiya wùn aàŋgàa ntir vəə́ nèn lò, e sùŋnín, wù tsə́nsí ntum e Fòn Jehoash woó Isray, woo wan Jehoahas woo wan Jehu ji wù wàá wiy, é wùn wun tárnín moo vilum bèy.

¹⁸ Fòn Jehoash woó Isray dù, e bìnèr ntum Amatsiya woo fon woó Juda jii, «Kitiír ké kikwiíy keé Lebanon ki‑iì sùúy e kicí ké *sidar keé Lebanon ki jii, ‹Fó wan wò woo wiíy e wan wom woo lumèn ji wíiy və.› Nyàm kwaʼ yeé Lebanon nèn lòo shaà fo, e nyèŋrì kitiír kiy e wuú.

¹⁹ À suuy jii, á leéy á mo à fùnèn ne, e ghàʼ Edom, aà suuy, túy shwín, raʼsì wún. Á dzə rì a dzə̀ é laʼ. À taʼ shuu wo dzə̀ wú wìy e ŋgeʼ si e vèn à Juda kitu bèn bìʼ ka?»

²⁰ Yii bèy, la Amatsiya yòʼ yuùrí, a kù‑uù yiì Nyùy ji wun fiʼ wày á áwune áàŋgàa vibàn véví wo, bìʼ fo vé‑eè loòn ne, a cù a dzə̀ anyùy veé Edom.

²¹ Á bèy, Fòn Jehoash woó Isray nèn kòʼ, wùn Fòn Amatsiya woó Juda tárnín moo vilum bèy, e ghày rər, e Bet‑Shemesh, e nsay Juda.

²² Isray nèn tòn Juda, wìr dzə̀m woó Juda nyéŋ, e kfə̀n e wun laʼ.

²³ Vé‑eè tàm é Bet‑Shemesh bèy, Fòn Jehoash woó Isray koó Amatsiya woo fon woó Juda, a dzə̀ wan Joash woo wan Ahasiya, a dù sho e Jerusalem. Á meé fó, Fòn Jehoash bvə́ʼ mbìv kirə̀v ké kày yee kèʼ fó shùu kày wo á yoŋ ji wó Efrayim, e dù, e mèé e shùu kày wo á yoŋ ji woó Kor. Mbìv kirə̀v rə̀n‑eè dzə̀ moo kóy wií bey.

²⁴ Wù kfə̀n‑eè kùúy kisha ke mbàm ke baar kí wùn à ke fəvír kí fo Nyùy lav, e kùúy vifá ve ker fo fo, a yì‑iì leey rám Obed‑Edom fo vifa vee shooy. Wù kfən kùúy sa vifá fo ntoʼ vidzə̀m, e kfə̀n shó e Samaria. Wù‑uù lì sá kfə́m sé wìr símóʼ sí, e dù sho ji aáwune sìíy, e kfə̀n a ŋaʼrí, bo á waà yúyri.

²⁵ Fòn Joash woó Isray woo wan Jehoahas wìy lò, e lày, Fòn Amatsiya woó Juda woo wan Joash kfən sìíy, e dzə̀ʼə̀m kiyá nshòv sitàn e ghvə̀m.

²⁶ Ké vinyò vímóʼ ví ve Fòn Amatsiya‑aà yiìn, e kèʼ fo kèʼ, e dù, e mày, á sàŋ é ŋwàʼ wo dzəə̀n Ŋwàʼ Afòn veé Juda wùn à veé Israyi.

²⁷ Fòn Amatsiya‑aà bìn ndzə̀m e Nyùy Tàr, á nèn kèʼ, a kar menàŋ é Jerusalem mo á lo, e ghan, e bóo yuyrí wun. Wù nèn lèʼ, e dù e Lakish. Á nèn tsə̀nsí wíri e wun bàm, á yúyrí wun fo.

²⁸ Á yúyrí bey, e bèʼèy dzə́n é kitu ke nyàmŋkoʼ, e wìy, e lìtì aàtàr vəə́ ghaŋ, e Ŋkàlaʼ Davir.