2 Wòŋ 24 - ŊWÀʼ NYÙY

Fòn Joash woó Juda

¹ Fòn Joash‑iì kèʼ sáʼ, a wù dzə̀ kiyá saàmbà. Wù sáʼ vifon kiyá mkweè, a wù dzə́ e Jerusalem. Yír yè woví‑iì dzə̀ Tsibia, a wù‑uù wìy fó Beersheba.

² Yì‑iì dzə̀, a Jehoyiada woo taà cù dzə̀ə́ sho, Fòn Joash kú a yiì vinyo ve ví wáa gheén Nyùy Tàr.

³ Jehoyiada‑aà tàʼ vikìy abaà, e fò e Fòn Joash, á dzəə́ wón vee vilum wùn à vee vikìyí.

⁴ Joash‑iì sàʼ, ntàm lòo dàr, wù nèn lèéy ji bòŋ a ji wun náŋsín lav Nyùy Tàr, é yì kfə́n fó.

⁵ Wù nèn bàʼtí atàá cù wùn à wír veé ram Levìi, e sùúy aáwune jii, «Vèn du é ŋkà se laʼ seé Juda, e bàʼtí mbàm fo wìr dzə̀m. Dzə̀ mbàm se á kù maʼ kiyá kidzə̀m ji á wáa nàvtì lav Nyùy woo Nyùy won shó. Vèn shúr wúné, e yiì lim rə̀ne.» Yii bèy, wír veé ram Levìi yòʼ‑oò lo shùr wún.

⁶ Fòn nèn tòóy Jehoyiada woo kilìmbìy kév, e dzə̀r shó jii, «À tèn fóo yòŋ ji wír veé ram Levìi wáa sə mbàm fo wír veé Juda wùn à veé Jerusaleme, a wìy sho bìʼ ka? Kí à kì ji dzə̀ mbàm se Mooser woo ŋgaà lìm Nyùy Tàr‑iì yòŋèn ji wír veé Israyi wáa màʼ ji sé *kibàn ké ntàsín?»

⁷ Wù‑uù yoŋ bèy, a wón Ataliya woo rim wiíy və̀yi kív ne lav Nyùy, e lì vifá vee jeéy ví vee Nyùy Tǎr lav, e nèn dù, a cù nyùy woo *Baal.

⁸ Fòn nèn yòŋ, á fèr ŋkùv, e tìír fo ndzə e shùu kày wo wú nəə e Nyùy Tǎr lav.

⁹ Fòn fó sáʼ, yí ghánén é Jerusalem, e ghànén woŋ Juda e dzə̀m ji wìr mòʼón mòʼón wáa wìy, a màʼ a mbàm se Nyùy Tàr se Mooser woo ŋgaà lìm Nyùy‑iì yòŋèn ji wír veé Israyi wáa màʼ, aá dzə̀ é woʼ.

¹⁰ Sáʼ rə̀ne‑eè bòŋ vilìmbìy, e bòŋ sa wíri, áwune adzə̀me nèn a wìy, a way mbàm e ŋkùv fèy. Wìr mòʼón yòʼ‑oò lo gòʼ e bàm.

¹¹ Kishiíy kí‑iì jí, wír veé ram Levìi shùr ŋkùv, e wìy sho, e fò áàtǎr ntoʼo. Á yén, a mbàm si kúʼ ne e ŋkùv, ŋgaà saŋ woó ntoʼ wùn ŋgaà ntom kitu ke atàá cù nèn fə̀ə́r, e siìr ŋkùv fo wù‑uù lo wù wàa tiy. Aá kù fəər bèy, báʼti, sí nèn wìy lò, a dzə nyanyày.

¹² Fòn Joash wùn Jehoyiada‑aà lì mbàm sìn, e wày e wír ve vé‑eè leey fo lìm yee Nyùy Tǎr laví kiwo. Wír vìne nèn lì vé kimbome wùn à vé kintaa, e lì sa vé lìm kisha, ve á lim e kisha kee kisha ki, à ve á lim e kee *brons ki ji áwune náŋsín á lav Nyùy Tàr, e siìr fo.

¹³ Vé lìm vìne‑eè lìm kitávín féyì, e siìr lav cù fo mo yì‑iì dzəə̀n fó mbìy, yì kfən tàv.

¹⁴ Áwune‑eè màysì, e nèn lì kibér ke mbàm, e dù, e fò e Fòn Joash wùn Jehoyiada. Á nèn fèr vifá ve ker veé lav cù sho, vifá moo ve á yii lim se cù ye tonèné shó, à vikáŋ ve kilay ví, e bóo lì sa vighín vee *kisha ke mbàm ke baar kí, à vee kisha ke mbàm ke fəvír kí. Á ku nèn a yiì cu se tonèn sí ghán sidzə̀m e lav cù, e dù, e meé mo Jehoyiada‑aà dzə̀ʼə̀mèn, e wìy kpù.

¹⁵ Jehoyiada‑aà dzə̀n, e kòŋrí, a kpu, a wù dzə̀ kiyá kishóv mtaár e wiì.

¹⁶ Vé‑eè dzəə̀mè wun e Ŋkàlaʼ Davir e fəm fo vé‑eè litì afon, bìʼ fo wù‑uù lìmèn kijuŋ e Isray. Wù‑uù tàʼtìn féyì bìʼ Nyùy wùn à lav cù.

Fòn Joash bín ndzə̀m e Nyùy Tàr

¹⁷ Jehoyiada‑aà kpù, á dìy kpú rə́, yí mày, vilìmbìy veé Juda vi wìy, e bùn fon, wù yuúrí kinyo kév.

¹⁸ Kí nèn yiì, wíri tín kiwuú fo Nyùy Tàr woo Nyùy atàr vév lav, e nèn a cù a dzə̀ nyùy woo *Ashera, a cù mebvə̀m. Bìʼ jay və̀n, Nyùy nèn shòv Jerusalem, e shòv Juda.

¹⁹ Yii bèy, Nyùy tsə́nsí aŋgàa ntum, á wáa kàntì wíri ji á kfə́n á e bàm, la wìr yòʼ kfə̀n.

²⁰ Á bèy, Kiyoy ke Nyùy ki nèn dànèr Sekariya woo wan Jehoyiada woo taà cù, wù tiím e wírí mbìy, e sùúy jii, «Ke Nyùy Tàr suuy ki dzə̀ jii, vèn tèn fó yunín nsər se Nyùy Tàr, e jàŋ lòn e věn kitu bèn bìʼ ka? Vèn bìn ne ndzə̀m e Nyùy Tàr, wù nen bìn ndzə̀m e vèn.»

²¹ Wù súŋnín bey, wíri nèn kùr menàŋ e wun bàm, fòn nèn fò vitaáví, á tsə́mrí wun, e yùyrí e maàndzə yeé lav cù.

²² Fòn Joash‑iì ŋwày vinyo ve juŋ vi ve Jehoyiada woo tàr à Sekariya‑aà yiìn e wun, e kù yùyrí Sekariya yúyrín. Wù wáa kpu, a suúy jii, «Nyùy Tàr, ku lèéy kinyo kìn ki, e bìn nsaʼ.»

Kimaysì ké saʼ Fòn Joash

²³ Kiyá ki‑iì lóo kum, vé rər veé Siiriàa nəə́ Fòn Joash e rə́r sí, e yùyrí wír veé Jerusalem wùn à veé Judàa adzə̀m ve yì‑iì dzəə̀n vilìmbìy. Á yúyrí bey, e nèn kùúy vifá fo fo, e tsə̀nsí e fòn wov é Damaskus.

²⁴ Vé rər veé Siiriàa‑aà dzə̀ wír ashàr, yii bèy, Nyùy Tàr yiì, áwune tón vé rər veé Juda ve vé‑eè dzəə̀n nyanyày. Wù‑uù yiì bey, bìʼ fo áwune‑eè bìnèn ne ndzə̀m e wun woo Nyùy Tàr woo Nyùy atàr vév. Á mo Nyùy‑iì yiìn, lòné koó Fòn Joash bèy.

²⁵ Wír veé Siiriàa‑aà tòn wír veé Juda bèy, e lèmér Fòn Joash e dzəə ye bi, e bó a lòkìr. Atǎr ntoʼ vəə́ nèn kùr menàŋ e wun bàm, e nə̀ə́, e yùyrí wun e wun mbvə̀ʼ, bìʼ fo wù‑uù yuyrin wan taà cù Jehoyiada. Wù‑uù lày, á lìtì e Ŋkàlaʼ Davir, yii bèy, a yòʼ dzə̀ é fəm fo vé‑eè litì ámóʼó vee afon.

²⁶ Wír ve vé‑eè karin menàŋ e fòn bàmé dzə̀ jii, Sabad woo wan Shimeat woo wir Ammon, wùn Jehosabad woo wan Shimrit woo wir Moav.

²⁷ Ké vinyò ve wón Joash, à ké vinyò ve aŋgàa ntum Nyùyi‑iì tinen e Joash, à mo wù‑uù naŋsin lav cù, yì kfə́n fó, á sàŋ é ŋwàʼ wo wú naarì vinyo ve afòn. Fòn Joash‑iì lày bey, wan və woo Amatsiya nèn yì vifon, a saʼ e wun ntaʼ.