2 Wòŋ 23 - ŊWÀʼ NYÙY

Wíri méŋ sáʼ Yaà Ataliya

¹ Viyá vi lòo meé ji saàmbà, Jehoyiada woo taà cù kúr shilív, e nə̀ə́ nsìysì wùn aàmfòómé ve á wám wíri wií wií, aá dzə̀ jii, Asaria woo wan Jehoram, Ishmael woo wan Jehohanan, Asaria woo wan Obed, Ma‑Aseyia woo wan Adaya, e lì Elishafat woo wan Sikri.

² Amfòómé víne‑eè ghàn woŋ Juda e dzə̀m, e kùm wír veé ram Levi ntèʼ sidzə̀m, e kùm atǎr kfəə veé Juda, á nèn wìy, e bàʼtí e Jerusalem.

³ Á báʼtí bey, e nèn nə̀ə́ e lav cù wùn à Joash woo wan ntoʼ gwàr *mensaŋ. Jehoyiada‑aà yòŋ áwune, e sùúy jii, «Vèn leéy, e yèn, wan fòn woo kimfòrkìr və̀ne. Bòŋ, aá fó sáʼ sho, é wù wáa saʼ mo Nyùy Tàr‑iì yòŋèn kùm rám Davir.

⁴ Kinyo ke vèn lo, e yiì lèn ki dzə̀ jii, fo vèn vee atàá cù wùn à wír veé ram Levi ve á yíi wìy lim e kishiíy ké bame, á lo, e jàvtì ven akáŋ ataár, é káŋ wùmòʼ wáa dzə anshìy veé shùu kày,

⁵ é wùmòʼ wáa shìy ntoʼ, é wùmòʼ wáa tiy e Shùu Kày Kinsə̀ŋ, é màŋgòŋ nèn tìím kfə́ é maàndzə see Nyùy Tǎr lav.

⁶ Lá vèn yòʼ biìmé é wìr nəə́ e Nyùy Tǎr lav, bánlà atàá cù wùn à wír veé ram Levi ve á dzəə̀n é shùu lìme. A dzə̀ kù nə̀ə́ áwune, bìʼ fo á lèmèn áwune jeéy ji vé lìm veé lav cù. Lá màŋgòŋ yòʼ shòʼór nsər Nyùy Tàr, e nə̀ə́ fo.

⁷ Wír veé ram Levìi ku tìím, e kaàrí fon e vifá ve rər ví wo, a kìŋsìn wun. A wìr mùm, e nə̀ə́ e lav cù, á kù yùyrí yuyrín. Vèn kú a dzə e fòn ghaŋ e ghan se wù fəə́ e ndzə, ǎ ghan se wù nəə.»

⁸ Wír veé ram Levi, à wìr dzə̀m woó Juda wo vé‑eè biin ku nèn yiì vinyo vidzə̀m mo Jehoyiada woo taà cù‑uù yòŋèn. Kishiíy ké bam ki‑iì ghèén, a wìr báʼti wír və́ adzə̀m, ve á siìn é shùu lìm, à ve á wìyìn ji á sə́ líme. Bó Jehoyiada woo taà cù yòʼ‑oò lo biìmé ji káŋ wùmòʼ lo á fo shùu lìm.

⁹ Jehoyiada woo taà cù nèn fò kòŋ sí wùn aàŋkeè ve kuʼkìné, à ve terií aàmfòómeé. Vifá ve rər vin vi dzə̀ ve yì‑iì dzəə̀n vé Fòn Davir mo vé‑eè lèmèn é lav cù.

¹⁰ Jehoyiada nèn tìír wir dzə̀m ye dzə̀ á kaàrí fon, e tàr, aá kér vifá ve rər é wo. Vé‑eè tíy e mbìy lav cù fo kíy cùu dzəə̀n, aá tiím, e kèʼ fo mbìv yee tsə́n, e kfən e mbìv yee kuy.

¹¹ Á nèn fə̀ə́r wan ntoʼ woo Joash, e sòv ntáráʼ e wun kitu, e fò nsər se afòn sho, e kòʼór ji fon. Jehoyiada wùn à wón vəə́ nèn yòʼ wun. Wíri bùn, e yòŋ jii, «Nyùy ku fò fon dzəʼə̀m ye dáa.»

¹² Ataliya lò, e yù, a wíri séŋ kinseŋ, búri fon, wù nèn dù e lav cù fo wíri‑iì dzəə̀n,

¹³ e lòo leéy, e yèn, a fòn tíy e shùu kibùʼ, e ghaa kitom ke dzəə̀n ké fòn, aàmfòómé wùn à wír ve á tóŋ sóŋé tíy e fòn ghaŋ, a wír veé wòŋe yú vijuŋ, shéʼri, kfə̀n tóŋ sóŋ, a vé yòvi fó yòv e vifá vév vé yòv vi, nèn danèr wíri é ŋkàʼ wo wú‑uù dzəə̀n. Ataliya nèn saàsì ndzə̀y sə́, e tòŋ kitávín jii, «Wìr kpù ne lèn, wìr kpù ne lèn.»

¹⁴ Jehoyiada woo taà cù nèn fə̀ə́r amfòómé ve vé‑eè wám vé rərí, e yòŋ aáwune jii, «Vèn səŋ Ataliya, e fəə̀ shó fo anshìyí nsàn. A wìr lò, a mùm ji wun faasì, vèn kù gwàr gwàrìn e nyùy.» Wù‑uù yoŋ bèy, a wù kì sùúy ne jii, «Lá á yòʼ yùyrí a Ataliya e Nyùy Tǎr lav.»

¹⁵ Á bèy, á nèn sə̀ŋ wun, e dù sho e shùu kibùʼ wo nyám se ŋkoʼ si yii nəə fo fo e ntoʼ, e yùyrí fo.

Jehoyiada woo taà cù síysí woŋ

¹⁶ Jehoyiada wùn à fòn, à wíri nèn yiì kilìʼ ji áwune sì á wír Nyùy Tàr.

¹⁷ Wìr dzə̀m nèn lò, e dù, e sàʼày lav cù nyùy woo *Baal, e kètì kíy sə́ sé cù, e bvə̀ʼə́y vibámmbó vé Baal, e nèn yùyrí Mattan woo taà cù və é mbìy kiy se cù.

¹⁸ Jehoyiada nèn wày vinyo vee Nyùy Tǎr lav aàtàá cù wùn à wír veé ram Levìí kiwo. Dzə̀ áwune ve Fòn Davir‑iì lèmèn ji á wáa leéy a vinyo vee Nyùy Tǎr lav. Áwune kù‑uù yíi a yiì cu se tonèn sí mo vé‑eè saŋen é Ŋwàʼ Nsər Mooser, lóo yiì, aá wáa yòv, a sheʼrí, kù mo Davir‑iì yòŋèn.

¹⁹ Jehoyiada kfən tìír anshìy e shuù se kày se sí nəə e Nyùy Tǎr lav ji lá áwune yòʼ biìmé, é wìr tó á kay yee Nyùy Tǎr lav e kifàn kí wùn.

²⁰ Wù nèn lì amfòómé, e lì atǎr ntoʼ wùn à vé saʼ ve vé‑eè sáʼ wírií, e kfə̀n lì wir dzə̀m woó wòŋ. Á nèn tsəə̀né fon fo lav cù, e shaà sho fo shùu kày kùyi, e sə̀y shó e ntoʼ, e nèn dzə̀ʼə̀r e kàvàʼ.

²¹ Á bèy, wìr dzə̀m woó wòŋ wáa yu vijuŋ, nyaáŋ kfə́n a dzə e mvə̀mlaʼ bìʼ fo vé‑eè yuyrin ne Ataliya.