2 Wòŋ 22 - ŊWÀʼ NYÙY

Fòn Ahasiya woó Juda

¹ Wír veé Jerusaleme‑eè lì Ahasiya wo yì‑iì dzəə̀n kinjòʼsìbàm ké wón Fòn Jehoram woó Juda, e kòʼór ji fon. Wù ku nèn a saʼ e tàr wóv ntaʼ. Vé‑eè kòʼór a dzə̀ wun bèy, bìʼ fo vé‑eè yuyrin ne wón Jehoram vee ŋgày sé wìr adzə̀m, a yì‑iì yùyrí ŋgoo wìr ye yì‑iì jùmrìn wír veé Arab, e nə̀ə́ e wír veé Judàá kilaʼáy ji á faasi vifá.

² Vé‑eè kòʼór Ahasiya ji fon, a wù dzə̀ kiyá nshòv sibaà e mbaà. Wù nèn kèʼ sáʼ rə́, e sàʼ vifon kiyá kimòʼón, a wù dzə́ e Jerusalem. Yír yè woví‑iì dzə̀ Ataliya, a dzə̀ wan wàn Fòn Omri woo tàr à Ahav.

³ Ahasiya kù‑uù kér liì a dzə̀ wo kfə́ə Ahavi‑iì kérí, bìʼ fo yè wov‑iì tír wun a dzə̀ e ntir ye bi, a wù nèn yii vinyo a dzə̀ ve bi ví.

⁴ Wù kù‑uù yii vinyo ve ví wáa bir Nyùy Tàr mo kfə́ə Ahavi‑iì yii, bìʼ fo tàr wov‑iì kpuun, kfə́ə Ahavi nèn a dzə aŋgàa ntir və́, aá tír wun a dzə̀ e ntir ye bi.

⁵ Jòkìnyàʼ, wù jùmrì ntir yev, e suùsín wùn Joram woo wan Ahav woo fon woó Isray. Wùn wun nèn dù, e nə̀ə́ Fòn Hasael woó Siiria e rə́r sí é Ramot‑Gilead. Wír veé Siiriàa lémér Fòn Joram fo.

⁶ Wù nèn kfə̀n é bàm é Jesreel, a dzə fo ji vileémé və́ ví wàá bónén. Ahasiya woo fon woó Juda, a dzə̀ wan Jehoram nèn sìíy, e lò, e sə̀y é Jesreel ji wun leéy á Fòn Joram woo wan Ahav wo wù‑uù joy vileémé ve wír veé Siiriàa‑aà lemerin wun e Ramot‑Gilead, e ghan se wùn à Fòn Hasael woó Siiriàa‑aà maʼ rə́r.

⁷ Wù wáa dù bèy, a Nyùy síysí ne ji wun yíi shaà fo kiŋgàn ke wù du fo Joram wùn, e màʼ a wun woo Fòn Ahasiya. Wù dù, e yèn Fòn Joram, wùn wun nèn lò, e fəə̀ ji á du, e yen a Jehu woo wan Nimshi. Á wáa dù bèy, a Nyùy Tàr kì shòʼ ne Jehu ji wù laar á kfə́ə Ahav.

⁸ Kí nèn lò, e kòóy jii, Jehu‑uù lòo laàr kfə́ə Ahav, e tò áàtǎr ntoʼ veé Judàá wùn, e kfə̀n tò e wón afə́r Fòn Ahasiyàá wùn ve vé‑eè shiy wun. Jehu ku nèn tàtí áwune adzə̀m, e laàr.

⁹ Á tàʼ Fòn Ahasiya, e yèn é Samaria fo wù‑uù duùn, e lìr, e koò, e wìy yèn Jehu sho, á ku nèn laàr wun. Á laàr bèy, e nèn lìtì cáʼ ji á ghvə́m á Fòn Jehoshafat woo tàr à tàr wov, wo wù kù‑uù yú a dzə̀ fo Nyùy Tàr shilív shidzə̀m. Á bèy, bó wìr yòʼ‑oò dzəə lò bèr e Ahasiya kfəə wo yì‑iì dzə̀ á kòʼór ji fon.

Yaà Ataliya woó Juda

¹⁰ Ataliya woo yìy à Fòn Ahasiya kiíy ji á yùyrí ne a Ahasiya woo wán və, wù nèn lò, e yùyrí wón ntoʼ adzə̀m vee kfə́ə fòn woó Juda.

¹¹ Wù‑uù lóo yuyrí bèy, Joho‑Shabeat woo wan ntoʼ nèn woòné, e shòŋ Joash woo wan Ahasiya fo wón ntoʼ ve vé‑eè sí yìi yuyrií mvəm. Wù shóŋ bey, e lìtì wùn liy və é mvə̀m lav kishìíy yìmòʼ é lav cù. Á mo Joho‑Shabeat woo wan Fòn Jehoram‑eè lìtìn Joash fo Ataliya yúyrí, bìʼ fo wù‑uù dzəə̀n jemèr Joash. Joho‑Shabeat kfə̀n‑eè dzə̀ wiiy Jehoyiada woo taà cù.

¹² Joash ku nèn a dzə wùn áwune, a lìr e lav cù, e dù, e mèé kiyá ntuùfú, a Yaà Ataliya kù sáʼ woŋ.