2 Wòŋ 16 - ŊWÀʼ NYÙY

Fòn Baasha woó Isray nəə́ rə́r é Juda

¹ Yì‑iì dzə̀ é kiya ke Fòn Asa‑aà sí sáʼ ji kiyá nshòv ntuùfú e mtaár, Fòn Baasha woó Isray kóʼ, e nə̀ə́ rə́r é Juda, e nèn bàʼrì kiláʼáy ké rər é Rama, e sə̀tí dzə́ə fo wìr nəə́ é Juda, e yèn Fòn Asa, e kfə̀n sə̀tí fo wìr fəə́ fó Juda.

² Fòn Asa nèn lì *kisha ke mbàm ke fəvír kí wùn à ke baar kí fó vitàv vee Nyùy Tǎr lav, à fo veé ntoʼ vi, e tsə̀nsí e Ben‑Hadad woo fon woó Siiria, a wù‑uù dzə́ e Damaskus. Wù lòo tsənsí bèy, e tiìsí jii,

³ «Wòsò ku koò viŋkar, a dzə kintatì mo atàr vesòo‑oò dzə́. Á bèy, m nén a tsənsí kisha ke mbàm ke fəvír kí wùn à ke baar kí ji à fiʼ dù, e bvə̀ə́r a viŋkar ve vèn Fòn Baasha woó Isray, é wù fəə́ fo mǒ nsay.»

⁴ Fòn Ben‑Hadad dù, e biìmé nshù Fòn Asa, e nèn kù tsə̀nsí amfòómé və́ wùn à vé rərí, á dù, e nə̀ə́ rə́r é ŋkà se laʼ seé Isray, e tòn Ijon wùn à Dan, à Abel‑Mayim, e lì ŋkà se laʼ se vitáv ví‑iì dzə̀kìn shó e nsay Navtali.

⁵ Fòn Baasha yú kinyo kìn, e nèn yàr fó a bàʼrì kiláʼáy é Rama, lim rəə́ tiím.

⁶ Fòn Asa nèn lì wír veé Juda, á dù e Rama, e bèʼèy tíy wùn à vicí ve toʼón ví ve Fòn Baasha‑aà yii kibaʼrì sho. Á bèʼèy bèy, e dù, e yiì kibaʼrì sho e Geba, e kfə̀n yiì e Mispa.

Hanani woo ŋgaà ntum Nyùy nyáysí Fòn Asa

⁷ Yì‑iì dzə̀ é ghan fóo fèy, Hanani woo ŋgaà si wìy fo Asa woo fon woó Juda wùn, e sùúy sho jii, «Wò‑oò yéʼti ké a dzə̀ e fòn woó Siiria wùn, e làa yòʼ a yeʼtí e Nyùy Tǎr wùn. Á bèy, à ràn ne kilíŋ ke dzə̀ à laàr mànjòŋ fòn woó Siiria.

⁸ Wír veé Etiopia wùn à veé Libiyàa‑aà kér vé rərí agháʼán, kér *viténtén vé rər wùn à vé nyàm se ŋkoʼo nyanyày. Yii bèy, mo wò‑oò yéʼti ké a dzə̀ e Nyùy Tǎr wùn, wù wáy áwune e wò kiwo.

⁹ Nyùy Tàr kíyri kitú ke nsay kidzə̀m, ji wun tóm á wír ve á ghán tìítiy mo wù taʼà, e tom bèn e mbòŋén. À lò ne, e yiì a dzə̀ kiyúŋ. Kèʼ fo lèn, rə́r sí kù sí wìy a ghiʼ wò ghíʼín.»

¹⁰ Hanani suúy bey, Fòn Asa yú kfə́ a dzə̀ nyár ye tavíné, e nèn wày wun e sháŋ. Wáa dzə e ghan sin, Asa kfən nyàvrì sa e wír ámóʼó é dzəə ye biibí.

Vitú ve vinyò vee Fòn Asa mvə̀m saʼ

¹¹ Vinyo ve Fòn Asa vee kèʼ fó kèʼ, e dù, e màysì, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda wùn à veé Israyi.

¹² Yì‑iì dzə̀, a Fòn Asa sí sáʼ ji kiyá nshòv bvə̀ʼə̀ e mtaár, wúu rəə́ nèn kèʼ, a yar. Yàsí və̀n nèn lò, e tàvkír tavkín. Yii bèy, wù nèn a beè a dzə̀ aŋgàa shìv sho, e shaà fó a beè Nyùy Tàr.

¹³ Fòn Asa‑aà lay, a wù sí sáʼ ji kiyá nshòv mòʼón e mkweè.

¹⁴ Vé‑eè lìtì wun e wun fəm wo wù‑uù bùʼùn a dzə̀ kilán, e Ŋkàlaʼ Davir. Vé‑eè neèr wun e vintàràŋ, a virə̀ʼtìn ve vifa vee jeéy jeéy ví‑iì dzə̀ shó, virə̀ʼtìn ve vifa vìn, a ku fèr wír ve á yii ferì. Vé‑eè tòn və́y e ghaágháʼán, e ghvə̀m wun sho.