2 Wòŋ 15 - ŊWÀʼ NYÙY

Fòn Asa laár mebvə̀m fo wòŋ woo Juda

¹ Nyùy nèn lò, e tsə̀nsí Kiyoy kfə́ fo Asaria woo wan Oded wùn.

² Wù fəə́, e dù, e yèn Fòn Asa, e sùúy sho jii, «Wò woo Fòn Asa, e lì wír veé Juda, à veé Benjamine, vèn yuúrí kinyo ke m yoŋ ki. Nyùy kù yíi a dzə vèn áwune, a vèn fèn yéʼti e wun wùn. A vèn lò, a tàʼ wun, wù dìn kitú kfə́ e vèn. Vèn bin ndzə̀m e wun, wù bìn sá e vèn.

³ Ghán símóʼ sí‑iì dàrnìn se Isray yòʼ‑oò ló a cù Nyùy wo ru. Taà cù woo ji wun yéʼéy áwune yòʼ‑oò dzə̀. Bìʼ bey, la áwune yòʼ dzə́ə a jùmrì nsər Nyùy.

⁴ Yii bèy, ŋgeʼ si wìy nə̀ə́ áwune, á nèn kfə̀n fo Nyùy Tàr woo Nyùy wìr veé Isray wùn. Vé‑eè tàʼ wun, e kù yèn.

⁵ Yì‑iì dzə̀ é ghan fóo fèy, a vijuŋ vi yòʼ dzə̀, a wíri yòʼ yú fó a ghan, à móo fəə fo lav, à móo kfən, bìʼ fo virə́ʼ ví‑iì beéme, a wìr dzə̀m kér fan.

⁶ Vitúm vi‑iì bvəə́ri bvəə̀rín, a kímóʼ kí maʼ kímóʼ kí e rə́r sí, a ŋkàlaʼ yìmòʼ maʼ yìmòʼ e rə́r sí, a kù‑uù yiì Nyùy ji áwune yén á kfəə́ se ŋgeʼ sidzə̀m.

⁷ Kén kí nén a dzə jii, vèn wáa tiy a kitávín, é la melív men mè yòʼ a seèm, bìʼ fo lim yéné yíi a ker vilaámé.»

⁸ Fòn Asa yú kisúŋnìn ke Asaria woo wan Oded kìn, e kùr shilív, e fə̀ə́r mebvə̀m me mè‑eè kóʼoy mèy fo nsay Juda e dzə̀m wùn à ye Benjamin, à fó ŋkà se laʼ se wù‑uù faàsìn é wòŋ agwan woó Efrayim. Wù kfən nàŋsín kíy cù Nyùy Tàr wo wú‑uù tíy e mbìy shùu lav cù.

⁹ Fòn Asa wìy lò, e tòóy wír vee ji veé Juda wùn à vee ji veé Benjamine adzə̀m. Wù‑uù tòóy sá wír ve vé‑eè dzə́ aáwuné mvəm vee lò fó nsay Efrayim, à fo ye Manasse, à fo ye Simeon. A kí dzə̀ jii, wír veé Israyi‑iì lò ne fo áwuné nsay aneénín, e wìy, e tàtí Fòn Asa, aá yén ne ji Nyùy Tàr wo wù ghvə́mé dzə̀ á wùn wun.

¹⁰ Wáa dzə e ŋwee woo taár, e kiya ke Fòn Asa‑aà sí sáʼ ji kiyá nshòv sitàn e ghvə̀m, áwune adzə̀me nèn bàʼtí e Jerusalem,

¹¹ e cù Nyùy Tàr é kishiíy fóo fèy, e nyám se vé‑eè wìyìn shó fo kwaʼ rər sí. Nàʼ‑aà dzə̀ ghií saàmbà, a njiì dzə̀ nsə̀kì saàmbà.

¹² Áwune nèn yiì kilìʼ, e biìmé ji áwune yíi a ghvəm a Nyùy Tàr woo Nyùy atàr vév shilív shév shidzə̀m, a ghvəm kitú kév kidzə̀m.

¹³ Áwune kfən lìʼ jii, a wìr dzə̀, a wù yòʼ ghvə́m Nyùy Tàr woo Nyùy wìr veé Isray, a dzəə̀n ŋgàywìr, a dzəə̀n wánlè, a dzəə̀n wiíy, a dzəə̀n lumèn, á waà yùyrí.

¹⁴ Áwune‑eè yii kilìʼ kin e Nyùy Tǎr si, súŋnin kitávín, fó shirəə́, tóŋ sóŋ sí wùn à loŋ si.

¹⁵ Wír veé Juda adzə̀me‑eè shèʼrí kinyo ke kilìʼ kin, bìʼ fo áwune‑eè yiìn shilív shév shidzə̀m. Áwune‑eè wày vifií vév vidzə̀m ji á kfə́n á fo Nyùy Tǎr wùn, a wù‑uù lo səə̀sí áwune, e fò áwune nyaáŋ mbìv sidzə̀m.

¹⁶ Fòn Asa‑aà tsə̀ʼ sá Maaka woo yè wov fó ntaʼ yaà yeèfòn, bìʼ wúr nyùy woo *Ashera ye wù‑uù fèrìn, a dzə̀ kifá ke koʼoyín kí. Asa‑aà gwàtì wúr yee shooy, e tòn e Kiwoóy ké Kidron.

¹⁷ Yii bèy, bó Fòn Asa yòʼ‑oò lo laàr virə́ʼ vé anyùy vidzə̀m fo nsay Isray. Mo kí fə̀m‑eè dzəə̀n bey, shilív shé Fòn Asa shi kù‑uù tíy e Nyùy Tǎr wùn shidzə̀m, e dù, e meé mo wù‑uù dzə̀ʼə̀mèn, e wìy lày.

¹⁸ Wù‑uù lì vifá ve tàr wov Abija‑aà foon ji vé Nyùy, à ve wúnwun kitú kfə́‑əə̀ foon ví, e dù sho e Nyùy Tǎr lav. Vifá vìn vi‑iì dzə̀ jii, *kisha ke mbàm ke fəvír kí wùn à ke baar kí, à vifá ve ker vi.

¹⁹ Rə́r sí yòʼ‑oò lo kfə̀n a dzə, bánlà é kiya ke Fòn Asa‑aà sí sáʼ ji kiyá nshòv sitàn e mtaár.