2 Wòŋ 11 - ŊWÀʼ NYÙY

Shemayia tiísí ntum Nyùy

¹ Fòn Rehoboam‑eè mèé é Jerusalem, e nèn bàʼtí rám Juda wùn à yé Benjamine, e shòʼtí vé rərí, wír nsə̀kì kishóv mwaamé é wiì (180,000) ji á du, e fùnèn a Isray woo mbìv yee kuy, é sáʼa kfə́n á e wun.

² Yii bèy, Nyùy Tàr nèn sùŋnín e Shemayia woo *ŋgaà ntum və,

³ e tùm wun ji wù du, e yèn á Fòn Rehoboam woó Juda woo wan Solomon wùn à wír veé Isray adzə̀m ve dzəə̀n rám Juda, à yé Benjamine. Wù du, wù sùúy aáwune á ji

⁴ Nyùy Tàr yoŋ a ji lá áwune yòʼ dù, e fùnèn a afə́r vév. Wíri wáa kfən a e melaʼ, bìʼ fo yiìn á wun, é bo kinyo ke kí kooyin kí wàá koóy. Á bèy, áwune nèn yù jí Nyùy Tàr, e kfə̀nkír, e làa yòʼ dzə́ə dù ji á funen Jeroboam.

Fòn Rehoboam távír ŋkà se laʼ seé Juda

⁵ Rehoboam wáa saʼ e Jerusalem bèy, e nèn tàvír ŋkà se laʼ símóʼ sí, sí wáa kìŋsìn Juda.

⁶ Ŋkà se laʼ sìn si‑iì dzə̀ jii, Betlehem, Etam, Tekoa,

⁷ Bet‑Sur, Soko, Adullam,

⁸ Gat, Maresha, Tsiv,

⁹ Adorayim, Lakish, Aseka,

¹⁰ Tsora, Ayjalon, e lì Hebron. Á ŋkà se laʼ se dzəə̀n vikum e nsay Juda wùn à ye Benjamin.

¹¹ Wù‑uù bàʼrì, sí táv, e nèn lèm amfòómé fó, e lèm sa vifá ve yi fo, e lèm meŋgvə́r me *oliv, e lèm meluʼ.

¹² Wù lém sá aŋkèe rər wùn à kòŋ sí é ŋkà se laʼ foo fèy sidzə̀m. Á bèy, sí nèn màysì, e tàv. Rehoboam ku nèn a ker woŋ wo dzəə̀n rám Juda wùn à yé Benjamine.

Atàá cù wùn à wír veé ram Levìi tóm Fòn Rehoboam

¹³ Atàá cù wùn à wír veé ram Levi ve vé‑eè dzə́ e nsay Israyi nèn lòkìr fo áwuné virə̀ʼ, e wìy, a dzə wùn à Rehoboam.

¹⁴ A kí‑iì dzə̀ jii, wír veé ram Levìi‑iì màʼtì ŋgvən se vé‑eè foon ji kwáʼ sév sé nyàm wùn à sé vifa ve yi si, e dù e Juda wùn ǎ Jerusalem, bìʼ fo Fòn Jeroboam woó Isray wùn aàfon ve vé‑eè yí vifon e wun bàmé yòʼ‑oò lo biìmé ji áwune wáa lìm a ji atàá cù Nyùy Tàr.

¹⁵ Fòn Jeroboam‑eè shòʼtí və́ vee atàá cù, á wáa lìm e virə̀ʼ vé anyùy, a cù mebvə̀m mee bvə́y, kfə̀n a cù mee wón nàʼ me wù‑uù fèrìn.

¹⁶ Wìr dzə̀m wo wù‑uù wayin shilív ji á wáa cù a dzə̀ Nyùy Tàr woo Nyùy wìr veé Isray nèn lòkìr sa fo Isray woo mbìv yee kuy. Vé‑eè lòkìr rám sidzə̀m, e jùmrì wír veé ram Levi, e dù e Jerusalem ji á wáa dzə fo, e fíʼ a cù Nyùy Tàr woo Nyùy atàr vév.

¹⁷ Áwune nèn tàvír sáʼ yeé Juda, e tòm Fòn Rehoboam woo wan Solomon, a tom bèy, e dù mèé viyá vitaár, a wíri ghán e Fòn Davir wùn Fòn Solomon mbòv.

¹⁸ Rehoboam‑eè wày wiíy e lav, a dzə̀ Mahalat wo tàr wov dzəə̀n Jerimot woo wan Davir, a yè wov dzə̀ Abihail woo wan Eliav, a Eliav dzə̀ wan Jessi.

¹⁹ Rehoboam wùn Mahalat‑iì kér wón ataár, a dzə̀ vilum vilum, aá dzə̀ jii, Jeush, Shemaria wùn à Saham.

²⁰ Rehoboam kfə̀n‑eè wày Maaka woo wan Absalom e lav ji wiíy. Wón véví‑iì dzə̀ Abija wùn à Attay, à Sisa, à Shelomit.

²¹ Rehoboam‑eè kér vikìy adzə̀m nshòv waamé e ghvə̀m, e bóo lì ve ceméné mntuùfú. Wù‑uù kér wón vee vilum nshòv waamé e mbaà, kér vee vikìy mntuùfú. Fo wun mvə̀m vikìy adzə̀m, à ve ceméné, wù‑uù kòŋ Maaka woo wan Absalom e ŋàŋ,

²² e nèn shòʼ Abija wo wù‑uù dzəən wùn Maaka ji kitú fo wón ntoʼo ji wù fiʼ wìy yì á vifon.

²³ Rehoboam‑eè yiì vifií, e tàʼár wón və́, e lèm e ŋkà se laʼ see vikum se wù‑uù bàʼrìn é nsay Juda wùn à ye Benjamin. Wù‑uù fò vifá aáwune vinín, e tàʼ vikìy, e fò aáwune.