2 Wòŋ 10 - ŊWÀʼ NYÙY

Isray méŋ sáʼ Fòn Rehoboam

¹ Rehoboam nèn lò, e dù e Shekem fo wír veé Isray adzə̀me‑eè baʼtin ji á kóʼór á wun ji fon.

² Jeroboam woo wan Nebat wo wù‑uù leʼen Fòn Solomon, e dù e Ejiv yú sáʼka və̀n, e nèn kfə̀n é bàm fó fo.

³ Á nèn tùm wíri fo Jeroboam wùn ji wù wàá wiy. Wù wìy, wùn à wír veé Isray adzə̀me nèn dù, e yèn Fòn Rehoboam, e bùn, e sùúy jii,

⁴ «Nyàr, Solomon woo tàr wov‑iì rə́ʼəy a ver e kibeʼèy kí. Kii wun, á ku fàr a kibeʼèy kin, é vèr wáa neŋ a e wun sar.»

⁵ Wù yòŋ aáwune jii, «Vèn du, e wìy yèn mo é bǎm vishiíy vitaár.» Áwune nèn dùkìr.

⁶ Fòn Rehoboam nèn tòóy ŋgày sé wìr se yì‑iì dzəə̀n aŋgàa ntir tàr wov Solomon, e dzə̀r aáwune jii, «Vèn shu kén ji m suúy ji ka e wír vìne?»

⁷ Áwune bìnèr jii, «A fòn dìn koŋ e wír vìne lán, e shèʼér áwune e binèr ye juŋe, bo áwune kù yíi a neŋ a e fòn sar, e wìy dù, e mày.»

⁸ Wù nèn ŋwày ntir ŋgày sé wìr, e dù, e beè a dzə̀ awàʼ və́ ve wùn áwune‑eè kúyí, a sì aŋgàa ntir və́.

⁹ Wù dzə́r aáwune jii, «Vèn shu kén ji m biner e wír vìne ji ka? Á tóŋ ji m far á kibeʼèy ke tàr wor‑iì rə́ʼəy áwune shó.»

¹⁰ Awàʼ vəə́ suúy ji á biner á e wír ve á tóŋ vìyi á jii, wàn kiwo və wo terí waà fàŋ, e shaà a mentìntìn me tàr wov.

¹¹ Tàr wov‑iì fó áwune kibeʼèy, a kí gháʼ a áwune, a fòn lo lèn, e dzə̀sì a dzə̀sìn. Tàr wov‑iì wívti áwune a dzə̀ áàŋkoó, fòn ló lèn, a dzə̀v áwune a dzə̀ á e ŋgwàn nyari.

¹² Vishiíy ví shaà vitaár, Jeroboam wùn à wìr dzə̀m nèn wìy, e yèn Fòn Rehoboam mo wù‑uù suuyin ji á du, á waà wìy.

¹³ Wù nèn ŋwày ntir ŋgày sé wìr, a taŋnín taŋnín.

¹⁴ Fòn Rehoboam kù‑uù jùmrì ntir a dzə̀ ye awàʼ və́, e sùúy e wíri jii, «Tàr wor‑iì fó ven kibeʼèy, a kí gháʼ ven, a m kfə̀n lo, e dzə̀sì dzə̀sìn. Tàr wor‑iì wív ven áàŋkoó, a m lo, a dzə̀v ven a dzə̀ e ŋgwàn nyari.»

¹⁵ Á bèy, la fòn yòʼ dzəə yuùrí kinyo ke wíri. Kinyo kìn ki‑iì kooy bèy, a ku yiì Nyùy ji kinyo ke wun woo Nyùy Tàr‑iì yòŋèn e Jeroboam woo wan Nebat, e shaà fo *ŋgaà ntum və woo Ahija woó Shilo ki wàá gheén.

¹⁶ Wír veé Isray adzə̀me yén ji fòn yoʼ biìmé a kinyo kév, e nèn sùúy e fòn jii, «Vèr kér ka e Davir mvə̀m kfəə? Vèr yòʼ kér kilíŋ e wàn Jessi mvəm. Éè wìr veé Isray, wír a e wun kibàn. Kfə́ə Daviri wáa leéy rì fo rə́ə yee lav.» Á bèy, wír veé Isray veé mbìv yee kuyi nèn kfə̀nkír aáwuné melaʼ.

¹⁷ Rehoboam nèn gòʼ, a saʼ a dzə̀ wír veé Isray ve vé‑eè dzə́ e ntèʼ seé Juda.

¹⁸ Fòn Rehoboam lò, e tsə̀nsí Hadoram wo yì‑iì dzəə̀n kitú ke lìm vitaavií ji wù du, e yèn á wír veé Isray veé mbìv yee kuy. Wù dù, áwune tsə́mrí wun e tíyí, e yùyrí. Fòn Rehoboam yú kee shooy, e nèn gìtì, e kòʼ kiténtén kfə́ ke səŋ nyám si, e lèʼ, e dù e Jerusalem.

¹⁹ Á bèy, kfəə́ yeé Israyi ku nèn a sə kóy wùn à kfə́ə Daviri, e wìy shem lán.