2 Timoti 3 - ŊWÀʼ NYÙY

Vinyo veé ghan sé bàm sí

¹ Kú a kiíy ji wíy lòo dzə e ghan sé bàm sí, é vinyo vi wáa tavkír.

² Wíri wíy a dìy a dzə̀ vitú vév, a kòŋ mbàm e ŋàŋ, a yu wún, a koʼnín. Á wíy a kuùnìn, a tav kitú fo atàr véví, e làa yòʼ a ker ghán fo wìr, a bó á yòʼ wíy a yen kímóʼ kí ji Nyùy gheéy.

³ Bó á yòʼ wíy a kòŋ wíri, a bó á yòʼ wíy a rər mendzən fo wìr. Kév kí kù wíy a dzə viduú, aá wáa tiy a dzə̀ é liì kisaŋ, a nyarnín, a bàn kinyo ke dzəə̀n ke juŋ ki kidzə̀m bánen.

⁴ Á wíy a kar menàŋ, a yiì mo áwune koó, a kwàʼ vifií kwáʼan. Á wíy a kòŋ fó a yi a dzə̀ vitú vév, a bó yòʼ dzə̀ á wàa kòŋ Nyùy gheéy.

⁵ Á kù wíy a yòŋ vitú vév ji wír Nyùy, a bó á yòʼ wíy a yiì kinyo ke dzəə̀n ké Nyùy. Kú a nyeŋ kfə́ə wìr vee bene nyéŋén.

⁶ Wír vìn ámóʼó dzə̀ ve á lo, á wàa ghan e wírí melav, a sə̀ŋrì vikìy ve bó á yòʼ kiìn fo á dzəə̀n. A dzə̀ vikìy ve vinyo ve bi ví dzəə́ tíy aáwuné wùn é kisə̀r, aá yáŋri fó a yiì vinyo vee shooy.

⁷ Áwune yén wír wo wù ghán ji wun yéʼey kinyo, á kù nèn a gbù gbuùn é wùn wó, kìn ŋgaàŋ dzə̀ la, a bó yòʼ dzə̀ á wìy kìíy kinyo ke dzəə̀n ke ru kí gheéy.

⁸ Wír vìne ghán, bívir kinyo ke Nyùy ke ru kí bívírín, réŋréŋ mo Janer wùn Jamber‑iì bívir kinyo ke Mooser. Kwaʼtì yéví kù tíy a dzə̀ é vinyò ve bi ví.

⁹ Yii bèy, a bó yòʼ dzə̀ á kù wìy a boʼtí wíri bey, a dù duùn fó mbìy. Kishiíy kí wíy gheén, é wìr dzə̀m ku yèn kimboʼtì kév réŋréŋ mo vé‑eè yenen ké Janer wùn Jamber.

Timoti wáa jùmrì kinyo ke Por

¹⁰ Yii bèy Timoti, wò‑oò ló a yu kinyo ke mò‑oò yéʼeyì, a yen mo m tiir kiwúu kém, e kfə̀n a yen kinyo ke m tiir vifíi vém shó e mǒ dzə̀ʼə̀m. Wò‑oò yén mo m wáy shilív a dzə̀ e Nyùy wùn, li vinyo vidzə̀m ji weè, koŋ wíri, tíy a dzə̀ é kinyò ke ru kí.

¹¹ Wò‑oò ló a yen sa mo wíri ron wuú yém, nyavrì e mò. À kì mo vé‑eè lóvti e mò é Antiyok, kfə̀n lóvti sho e Ikoniyum wùn á Lista. Mò‑oò lo nə̀ə́ e ŋgeʼ se tavín sí, yii bèy, Nyùy ku sə̀ mo fó ŋgeʼ fèn sidzə̀m, m lùŋ.

¹² A dzə̀ mo kí kù yii dzə́. Wìr yii lóo tiy kfə́ wùn Jesus Kristu ji wun kù yú a dzə̀ fo Nyùy, bo kù dzə̀ mo á yíi a ròn wuú rə́,

¹³ é wír ve bi ve á ghán kév, bóʼti wíri bóʼtíné kú a màysì, a tavkír tavkín, a boʼtí wíri, e kfə̀n a boʼtí vév vee vitú.

¹⁴ Ké ki nén a dzə jii, à kú a tiy a dzə̀ é kinyò ke vé‑eè yeʼeyin wò sho, à biímé, e wày shilív shé sho shidzə̀m. Ku ghàr bey, bìʼ fo à kiìn wír vee shó ve vé‑eè yeʼeyin wò sho,

¹⁵ a kuumé jii, wò‑oò sí yú a Ŋwàʼ Nyùy, e kèʼ fo meterí. A dzə̀ kinyo ke dzə̀ kí tìr wò, áà kiíy mo dzə̀ wìr wày shilív e Jesus Kristu wùn, e bóo wìy lùŋ.

¹⁶ Kinyo ke kí dzəə̀n é Ŋwàʼ Nyùy kidzə̀m ki lò a dzə̀ fo Nyùy. Kí nén a dzə mo dzə̀ á lì, e yèʼéy wír sho, a tir wun tírín, a naàrì ajay və́, a dìn mo dzə̀ wù wàa tiír kiwúu kfə́, a ghan mo Nyùy koŋè.

¹⁷ A Nyùy‑iì fò ŋwàʼ və̀n bèn ji wìr wo wù yii lim rə́ fíʼ a ker kifá ke lìm, e kiíy kinyo kfə́ kijuŋ, a dzə kibáʼtín mó a yiì lim ye juŋe e dzə̀m.