2 Timoti 1 - ŊWÀʼ NYÙY

¹ Ŋwàʼ və̀ne sàŋ mo woo Por. M dzə̀ ŋgaà ntum Jesus Kristu bìʼ kinyo ke Nyùy‑iì kàʼàn ji wìr wo wù tatin wùn Jesus Kristu waà wíy lùŋ. Kù‑uù sìysì wun woo Nyùy ji m wáa yiì a lim rə̀n.

² A m sáŋ a dzə̀ fo wò woo Timoti. À dzə̀ wán wom féyì, a m kòŋ wò e ŋàŋ. M nén a lon jii, Nyùy Tàr wùn Taàtá wòsən Jesus Kristu kú a kòŋ wò, a sham wò, a yiì, é shilív shé shi wáa dzə nyaáŋ ghán sidzə̀m.

Por lumèr shilív shé Timoti

³ M yii lóo bùnrì, m kù a kuumé wò ghán sidzə̀m, a beèrì Nyùy fo wò. A dzə̀ wun woo Nyùy wo m lim fo fo shilív shimòʼón réŋréŋ mo atàr vémé‑eè limè.

⁴ Jìŋ yè yár mo féyì, a m kuúme a dzə̀ mo wòsò‑oò lóo jàvsìn, à wáa səʼə́r mensíy. M nén a tàʼ, e kfə̀n yen wò, é shilív shém shí rəsin.

⁵ M lóo kwàʼtì wò, m kù a kuumé mo wò‑oò tatin shilív shé, e wày e Nyùy wùn, a yu a dzə̀ fó fo. Dzə̀ mo Looy woo yeè yè won wùn Yunir woo yè won‑eè yii, a m kì féyì ji dzə̀ sáa kíwun ke à yii lèn.

⁶ M nén a kuumé e wò jii, à kú a yùŋrì a vifií ve Nyùy‑iì bùʼùn wò sho e ghan se mò‑oò neèrìn wó yém e wò kitu, a bùnrì fo wò.

⁷ Kú a kuumé ji Kiyoy ke Nyùy bùʼùn vèsən shó ki yòʼ yii, a melív mèsən mè yaʼ yàʼàn. Kí távir tàvírín, kfə̀n yii, a vèsən koŋ wíri, kiiy mo dzə̀ vèsən wàa tiír kiwuú késən, a fìʼ.

⁸ Kí nén a dzə jii, lá à yòʼ a woomé fó kù a fìʼtì a ji kù dzə̀ vèn à Taàtá wòsən Jesus Kristu. A bó yòʼ dzə̀ sá, à wàa woomé fo mò wo m lim sháŋ bìʼ wun woo Kristu. Ku lì kitú ké ki ji dzə̀ à kù tàtí vèsən, e yèn sá ŋgeʼ mo Nyùy fó wò vitaáví ve dzə̀ à wàa yen sho, é sáʼka və wo juŋ fíʼ a sàmèr.

⁹ Wù‑uù tìn vèsən fó lòn, á lùŋ, wù lì vèsən ji və́ vee wír. A bó wù yòʼ‑oò li bìʼ kinyo kímóʼ kí ke vèsən‑eè yiìn. Wù‑uù lì a dzə̀ mo kù‑uù sìysìn wun fo yàŋgùʼ ji wun wíy tatí vèsən à Jesus Kristu, e bùʼ ji wír və́.

¹⁰ Mo Ŋgaà Lùŋèr wòsən woo Jesus Kristu wìyìn ne, vèsən nén a ker mbùʼmé woo shooy lèn. Wù‑uù wìy, e laàr fan yee bìʼ kpú. Wù‑uù fò vèsən sáʼka Nyùy wo juŋ, wù dìn dzə̀ʼə̀m yee là may, vèsən kiíy. A dzə̀ dzəʼə̀m yee shooy ye bó wìr yòʼ dzəə́ wìy kpu.

¹¹ Nyùy‑iì lì mo ji m wáa fìʼtì a dzə̀ á sáʼka woo shooy, a ghan, a tiisí ntum Kristu, a yeʼéy wíri kinyo kfə́.

¹² M nén a yen ŋgeʼ e sháŋ lèn a dzə̀ bìʼ lim yee shooy. A bó yòʼ dzə̀ m wàa fàn ji yí lày ne a kisáŋ, bìʼ fo m kiìn mo wun woo Kristu wo m wayin shilív é wùn wó dzəə̀n. M kì féyì ji dzə̀ wù kù wìy a leéy a fo kinyò ke Nyùy wayin e mǒ kiwo, é kí wáa dù fo mbìy, e meé e kishiíy kee shó ke wù wíy kfən.

¹³ Timoti, ku lì mfìʼ a dzə̀ fo mò, a fìʼtì kinyo ke ru kí, a dzə̀ ke mò‑oò yeʼeyin wò sho, a way shilív a dzə̀ e Nyùy wùn, a kòŋ wun mo vèsən ve á tatin vèsən à Jesus Kristùu yii.

¹⁴ Kú a kuumé ji wày á Kiyoy ke Ranén kí ke kí dzəə̀n e vèsə́n meliv lim rə̀n e wò kiwo. Ku nèn a leéy fo fo kijuŋ.

¹⁵ À kì sá mo Figelur wùn Hemogener, aàŋgàa ŋgoo vesən ve dzəə̀n sá wír veé Asiàa loòn ne, e lèʼ mo adzə̀m.

¹⁶ Yii bèy, Onesiforur yòʼ‑oò lo woòmé, e màʼày mo ji bìʼ fo m siìn é sháŋ. Nyùy ku laàmé wùn à kfə́ə rəə́ bìʼ kee shooy. Wù‑uù rə́si yii akàŋ anín, a m shéʼri.

¹⁷ Wáa dzə e ghan se wù‑uù wìyìn é Rom fèn, wù ku nèn tàʼ mo é shií, e yèn.

¹⁸ Aà kì sá kijuŋ mo wù‑uù rə́si sə́ mo é ghan se mò‑oò dzə̀ə́ e Efesor. Nyùy kù wíy sheʼrí wun e kishiíy ke Taàtá wòsən Kristu wíy wìy.