2 Tesalonika 2 - ŊWÀʼ NYÙY

Fon Vinyò ve Bi ví

¹ Afə̀r ver, vèr nen kfə̀n a tàʼ, e suúy kímóʼ kí e vèn kùm ghán se Jesus Kristu wíy wìy, e baʼtí vèsən, é bo vèsən áwune wáa dzə.

² Mo léŋe sí du ji kishiíy ké Taàtá kin ki ghèén ne, vèr nén a lon ji lá vifií vén ví yòʼ nèn tàv bvəə̀rí, é vèn wáa tùʼtìn. A wìr fə̀m fer bèy a dzə̀ fo wùn kwàʼtì, kìn wù suuy ji sùúy Nyùy, kìn wù yoŋ fo ŋwàʼ ji sàŋ mo, lá vèn yòʼ biìmé.

³ Vèn wáa yen fo wìr bóʼtí ven é kinyò kímóʼ kí. Vèn wáa kiíy ji bó yòʼ dzə̀ kishiíy kee shooy ki wìy a gheén, a bó wíri sí táŋ sáʼ Nyùy, é Fòn Vinyò ve Bi ví bvə́y, a dzə̀ wun woo shooy wo wù wíy dù e və̀y.

⁴ Yii bèy, a wù wíy wìy e ghan see shooy, é wù wáa koʼór wún, a shaʼnín ji lá wíri yòʼ a ghvəm a kifá kímóʼ kí ji Nyùy, e shaà wun. Wù yii bèy, é wù nèn màysì, e dù, e nə̀ə́, e yèʼém e lav ye á cu Nyùy sho, a yòŋ kitú kfə́ ji Nyùy.

⁵ Mò‑oò ló a suúy vinyo vìn e vèn é ghan se vèsən‑eè dzəə̀n. Mo bó vèn yòʼ dzəə́ kuúme a?

⁶ Vèn kì sá kifá ke kí sə́ti dzə́ə fo Fòn Vinyò ve Bi ví woo shooy wiy lèn, a bó ghán sə́ sí yóʼ ne ghèén.

⁷ A vinyo ve bi ve wù wíy a yiì vi kèʼ ne lèn, a ví dzə̀ə́ e kilìr, e meé e ghan se kifá ke kí sə́ti dzə́ə kee shooy ki wíy rəʼ wún,

⁸ é bo wun woo Fon Vinyò ve Bi ví fəə́sín. Yii bèy, a Taàtá wòsən Jesus wíy sàsìn, e bvəy, e fer wun férín e kiyoy ke kí fəə́ fo wùn shuù ki, e yuyrí, e màysì, e laàr e kishiíy fóo fèy.

⁹ Wìr wo wù wíy tum Fon Vinyò ve Bi ví və̀n dzə̀ Satan, e fo vitaáví shó, é wù wáa shoʼ virom, a dìn visəəm vé vinyò vinín, e fíʼ boʼtí wíri shó.

¹⁰ Wù kfə̀n wíy a yiì kfəə́ se vimboʼtì símóʼ sí sinín, a laàrì sí wíri shó. A wù kù wíy a laàrì a dzə̀ yé wìr ve á sí du, e lày e və̀y, bìʼ fo bó á yòʼ‑oò ló a kòŋ fó biimé kinyo ke dzəə̀n ke ru kí.

¹¹ Á kinyo ke kí wíy yiì, é bo Nyùy maʼti, é kimbayìr ke tavín kí wiy, e ŋàʼár melív mev, aá wáa jìŋ, a biimé a dzə̀ kimboʼtì.

¹² Aá biímé bey, é nsaʼ Nyùy nèn wìy koò áwune vee shooy adzə̀m ve á tenen kinyo ke ru kí, a jùmrì ké kisaŋ ki.

Wír Nyùyi wáa tiy e kinyò ke wù liìn áwune shó

¹³ Yii bèy, afə̀r ver, vèn dzə̀ kén, a dzə̀ vèr kù a beèrì Nyùy bìʼ ven ghán sidzə̀m, ven ve Taàtá wòsən Jesus kòŋèn é ŋàŋ. Vèr beerì wun woo Nyùy, bìʼ fo wù‑uù shoʼon ne ven fó kèʼ ji vèn wìy lùŋ. A vèn lùŋ a dzə̀ mo Kiyoy kfə́ kí‑iì shavin ven ji vee jeéy, vèn kfən yù kinyo ke Nyùy ke ru kí, e wày shilív shó.

¹⁴ Nyùy nen lì ven é kinyò fèn a dzə̀ mo wù‑uù tumen ver, vèr wìy, e fìʼtì sáʼka və wo juŋ e vèn ji vèn fíʼ nəə́ e vijùŋ ve dzəə̀n vé Taàtá wòsən Jesus Kristu.

¹⁵ Bìʼ bey, afə̀r ver, vèn kú a tiy rì kitávín, a ghar vinyo ve vèr‑iì yeʼeyin ven shó, kìn dzə̀ ve vèr‑iì fiʼtì e vèn, kìn dzə̀ ve vèr‑iì sáŋ fo vèn.

^16-17 Vèr ku nèn a lon fo wúnwun woo Taàtá wòsən Jesus Kristu wùn Tàr wòsən Nyùy jii, á kú a bayrí melív men, a tavír ven, é vèn wáa suúy, a yiì a dzə̀ vinyo ve juŋ vi. A Nyùy wo vèsən lón fo fo və̀n‑eè lo dìn ji wun koŋ vèsən. Wù‑uù shàm vèsən, e yiì, melív mèsən mè wáa lùm ghán sidzə̀m, e kfə̀n yiì, vèsən wáa shìy a dzə̀ vijuŋ ve wù‑uù kàʼàn vèsən shó.