2 Samuel 8 - ŊWÀʼ NYÙY

Davir tón vitúm

¹ Shintàm shi lòo dàr, Davir kfən nə̀ə́ wír veé Filistia e rə́r sí, e tòn áwune, e màyìr sáʼ yév.

² Wù kfən tòn wír veé Moav, e sùúy, wír ve vé‑eè koon é kwaʼ rərí neèm fo nsay ataár ataár, wù yúyri vee abaà, wù màʼtì wo mòʼón. Wír veé Moavi nèn nə̀ə́ e Davir sar saʼ, a fo nshwì e wun.

³ Wù kfən tòn sa fon woó Tsoba, e mbìv wòŋ woo Siiria, a yír rəə́ dzə̀ Hadadeser, a dzə̀ wan Rehov. Davir‑iì ton wun, a wù kì fəə̀ ne, a dù e mbìv ndzə̀v yee Yufret yee fó kùy ji wun du, e siìr a sáʼ rə́ fó.

⁴ Davir koó vé rər veé nyàm se ŋkoʼ kishóv ghií saàmbà e nsə̀kì, e koò vé rər vee kiwuú kí nsə̀kì mbaà. Wù lèm nyám se ŋkoʼ se sí wáa sə̀ŋ *viténtén vé rər wií, e nèn kìvtí kibér.

⁵ A wír veé Siiria ámóʼó‑oò lo wìy fo ŋkàlaʼ Damaskus ji á sə́ á Hadadeser woo fon woó Tsoba, Davir yúyrí áwune wír nsə̀kì nshòv sibaà e mbaà.

⁶ Wù nèn lèm vé rərí aáwuné wòŋ, e viliŋ viliŋ, á nèn a dzə e wun sar saʼ, a fo nshwì e wun. Mo Davir‑iì ghán maʼ rə́r bey, Nyùy Tàr kú a yiì, wù wáa tòn vitúm vidzə̀m tónen.

⁷ Wù faàsì aŋkeè vee *kisha ke mbàm ke baar kí, ve atǎr ntoʼ Hadadeseri‑iì béʼé, e nèn dù sho e Jerusalem.

⁸ Wù kfən faàsì sa kisha kee *brons kigháʼán fó Beta wùn Berotay, a dzə̀ ŋkà se laʼ se Hadadeser‑iì sáʼá.

⁹ Toy woo fon woó Hamat yú ji Davir tòn a ne mànjòŋ Hadadeser e dzə̀m,

¹⁰ e nèn tsə̀nsí wán və woo Joram ji wù du, e bùn a Fòn Davir, e beèrì a wun fo rər se wù màʼàn, e tòn a Hadadeser wo wùn wun woo Toy‑iì sí maʼ rə́r. Joram wáa dù bèy, a ker vifá ve á fèrìn e kisha ke mbàm ke fəvír kí wùn à vee kisha ke mbàm ke baar kí, à vee kisha kee brons ki.

¹¹ Fòn Davir ku fò vifá vìn e Nyùy Tàr ji cu réŋréŋ mo wù‑uù foon kisha ke mbàm ke fəvír kí wùn à ke baar kí, ke wù‑uù faàsìn fo vitúm ve wù‑uù tònèn ví.

¹² Kù dzə̀ vifá ve wù‑uù faàsìn fó Edom, à fó Moav, à fó Ammon, à fó Filistia, e kfə̀n faàsì sa fo Amalek. Wù kfə̀n‑eè fò sá vifá ve wù‑uù kuuyin é ghan se wù‑uù tònèn Fòn Hadadeser woo wan Rehov, a dzə̀ fon woó Tsoba.

¹³ Davir‑iì fùnèn wír veé Edom e Kiwoóy ké Shiŋgwaŋ, e yùyrí wíri nsə̀kì nshòv waamé e ghvə̀m, leŋ vəə́ wáa dù.

¹⁴ Wù lèm vé rərí woŋ Edom e dzə̀m. Wír veé Edom adzə̀me nèn a neŋ e wun sar saʼ. Nyùy Tàr‑iì yiì, Davir wáa tòn vitúm vidzə̀m tónen fo wù‑uù maʼ rə́r.

¹⁵ Á bèy, Davir wáa saʼ woŋ Isray e dzə̀m, a yiì vinyo e wìr dzə̀m réŋréŋ là kiloʼ.

¹⁶ Joav woo wan Tsəruyia wáa dzə mfòómé, Jehoshafat woo wan Ahilud wáa dzə taà ntoʼ wo wù fiʼtì sáʼ fòn.

¹⁷ Tsadok woo wan Ahituv wùn Ahimelek woo wan Abiyatar‑iì dzə̀ atàá cù, a Serayia dzə̀ ji ŋgaà saŋ woó ntoʼ.

¹⁸ Benaya woo wan Jehoyiada wáa dzə kitú ke vé rər ve vé‑eè shiy Fòn Davir, a wón Fòn Daviri dzə̀ kév atǎr wòŋ.