2 Samuel 7 - ŊWÀʼ NYÙY

Nyùy káʼ Davir

¹ Mo Fòn Davir dzə̀ʼə̀mèn e wun ntoʼ, a Nyùy Tàr fó ne wun meemè bìʼ aŋgàa vibàn və́ ve vé‑eè gìmèn wun, e kaàrí, e tàrí,

² wù nèn lò, a ghay e Natan woo *ŋgaà ntum Nyùy jii, «Mo və̀ne, a m dzə́ e ntoʼ ye á bàʼrìn e kicí kee *sidar ki, a ŋkùv mensàŋ Nyùy Tàr dzə́ kfə́ a dzə̀ é kibàn.»

³ Natan suúy jii, «Yiì kinyo ke kí dzəə̀n e wò kwàʼtì ki, bìʼ fo Nyùy Tàr dzəə̀n vèn wun.»

⁴ Waá dzə vitsə́ʼ vee shooy, Nyùy Tàr nèn sùŋnín e Natan jii,

⁵ «Dù, e sùúy e Davir woo ŋgaà lìm wom ji a sà kì dzə̀ bàʼrì wun lav ye m wáa dzə sho a?

⁶ Kèʼ fo ghan se mò‑oò fəərin wír veé Isray fo Ejiv, e wìy shem lán, m yòʼ‑oo ghán ne a dzə e lav. Mò‑oò dzə́ a dzə̀ é kibàn, é virə̀ʼ vidzə̀m fo vé‑eè du.

⁷ Vé‑eè rə́si du e virə̌ʼ virə̀ʼ, a kù ghán vèr áwune, aá kér atǎr nsaʼ ve mò‑oò yòŋèn ji á wáa leéy a fo wíri. Vèr áwune‑eè ghán bèy, a bó m yòʼ‑oò yiì ne dzə̀r aáwune ji sà yiì ka, la á yòʼ bàʼrì lav yem, e bóo bàʼrì yee kicí ké sidar ki á?

⁸ «Á bèy, dù ri, e sùúy e ŋgaà lìm wom Davir ji Nyùy Tàr woo Taà Mànjòŋ suuy a jii, ‹Mò‑oò lì wò fo kwaʼ fo wò‑oò dzə́ shiy anjiì, e lèm wò ji kilìmbìy ke wìr vém veé Isray.

⁹ Mò‑oò dzə̀ wòsò virə́ʼ vidzə̀m ve wò‑oò du, a m kù laar aŋgàa vibàn vé adzə̀m. M yíi yiì, aá kiíynín yír yé moo yé antav ve ghaʼtíné veé kitu ke nsay.

¹⁰ M yíi lèm kirə́ʼ kin ji ké wìr veé Isray ŋkuuŋkùŋ, e yiì, aáwune tuúy fó ji sì á láʼ yév, é la vé kighèʼe yòʼ dzə́ə a ghèʼ áwune mo vé‑eè gheʼ fo mbìy,

¹¹ e kèʼ fo ghan se mò‑oò shoʼtin atǎr nsaʼ ve á wáa saʼ wír vém veé Isray. M yíi yiì, áà meeme fo aŋgàa vibàn veé wo. Mo woo Nyùy Tàr, m kfə̀n yoŋ e wun woo Davir jii, mómò kitú kém, m yíi dzə̀sì kfə́ə yé,

¹² à wíy kpú, aá dzəəme wò aàtàr veé ghaŋ, é m nèn kòʼór wan wò wùmòʼ wo dzəə̀n vitó vé, é wù li kirə́ʼ ké ji fon. M wíy yiì, é sáʼ rəə́ wáa tiy.

¹³ Wíy a dzə wun wo wù wíy bàʼrì lav ye m wáa dzə sho. M wíy yiì, é sáʼ rəə́ wáa tiy fo ghán sidzə̀m.

¹⁴ M wíy a dzə tàr wov, é wù wáa dzə wán wom. Wù yii kinyo ke bi kí, é m wívtí wun mo tàr yii lo, wù wìvtí wán, wàn yù nyár e wùn.

¹⁵ Yii bèy, a bó yòʼ dzə̀ m yàr fó a dìn koŋ yém e wun mo mò‑oò yàrìn fó a dìn e Saul wo mò‑oò suùn, e bóo koʼór wò.

¹⁶ Rám yée kù wíy a dzə fo ghán sidzə̀m, é sáʼ yée wáa tiy fo là may. Kàvàʼ wò kù wíy a tiy fo ŋkuuŋkùŋ.› »

¹⁷ Natan ku nèn dù, e fèr vinyo vìn vidzə̀m e Davir mo Nyùy Tàr ghemen ndzə, e dìn e wun.

Davir búnrí Nyùy

¹⁸ Davir nèn dù, e nə̀ə́ e *kibàn ké ntàsín ké Nyùy Tàr, e dzə̀ʼə̀m, a bùnrì jii, «Éè Nyùy Tàr woo Taà Ndzə, m dzə̀ ka, a kfə́ə yémé dzə̀ ka, bo à yii kinyo kee ben e mò?

¹⁹ Éè Nyùy Tàr woo Taà Ndzə, à kfə̀n dzə̀sì ne lèn aŋkàʼmé vee kùm kfə́ə ŋgaà lìm wò veé ghan se sí wíy a wìy. Éè Nyùy Tàr woo Taà Ndzə, à dìn ne ndzə kibvəə̀shí.

²⁰ A dzə̀ m kfə̀n sùúy ka e wò lèn. À kì ne kifá ke dzəə̀n mo woo ŋgaà lìm wò.

²¹ Vimà vé vinyò ve à yiìn e mò vin vi dzə̀ ve wò‑oò yòŋèn ne, a kù dzə̀ ve kwàʼtìn wò, e bóo yiì, é ŋgaà lìm wò kiíy lèn.

²² Rúrú, Nyùy Tàr woo Taà Ndzə, à dzə̀ e gháʼtín. Wìr woo moo wò yòʼ dzə̀. Kù jòʼ wò Nyùy. Á ke vèr‑iì yiìn ne yù, e kìíy.

²³ Kitúm ki yòʼ dzə̀ shó e kitu ke nsay kee moo Isray, ke wò‑oò fəərin fó vikwàn, e lì ji wír vé. Viŋgaʼnìn ve vinyò wùn à virom ve wò‑oò shóʼ vi yiì ne, yír yée ghánén kitú ke nsay kidzə̀m. Wò‑oò jum vitúm vinín fo wir vée mbìy, jum anyùy vév, a wír vée nəə, sə́ nsay yev.

²⁴ À lì ne wír vé veé Isray ji wír vé ŋkuuŋkùŋ ji lì a wò, a wò woo Nyùy Tàr sì Nyùy wov.

²⁵ «Bìʼ bey, Nyùy Tàr, ku yiì, é ŋkàʼmé wo à kàʼàn ŋgaà wò lìm wùn à kfə́ə rəə́ shó və̀n wìy ghèén, é kí wìy a tiy fo, e dù, e jòʼsì. Ku yiì mo à kàʼàn,

²⁶ é wíri fíʼ a wùʼsì yír yé ghán sidzə̀m, a kwa jii, ‹Nyùy Tàr woo Taà Mànjòŋ, dzə̀ wun Nyùy wo wù kér wír veé Isray. Rúrú, à kù wíy kìŋsìn rám ŋgaà lìm wò woo Davir, é ŋgaà saʼ wáa fəə fo fo ghán sidzə̀m.›

²⁷ Éè Nyùy Tàr woo Taà Mànjòŋ, Nyùy wìr veé Isray, kù yiì wò, bo ŋgaà lìm wò kiíy vinyo vìn vee ji à wíy yiì, é kfə́ə yémé wìy a dzə yé afòn. Á kinyo ke kí yiìn, é bo m wáa ker shilív shé a bùnrì kfə́ə rən yee bunrì e wò.

²⁸ Éè Nyùy Tàr woo Taà Ndzə, kù dzə̀ wò Nyùy. Jí sé si kù yii dzə́ kinyo ke ru kí, aà kàʼ ne ŋgaà lìm wò e vinyo ve juŋ vìn vi.

²⁹ Bìʼ bey, ku səə̀vì kfə́ə ŋgaà lìm wòo, a leéy fo fo, e wìy dù, e mày. Éè Nyùy Tàr woo Taà Ndzə, kù‑uù kàʼ wò vinyo vìn rúrú, aà kù wíy a səə̀vì kfə́ə yém ghán sidzə̀m, e dù, e mày.»