2 Samuel 6 - ŊWÀʼ NYÙY

Á wíy e ŋkùv mensàŋ e Jerusalem

¹ Davir kfən lò, e bàʼtí vé rər vee vilum ve tavkíné veé Isray nsə̀kì mtaár.

² Wùn áwune dù e Baale‑Juda ji á du, e wìy a e ŋkùv mensàŋ wo wù kér yír Nyùy Tàr woo Taà Mànjòŋ, a kàvàʼ və dzə̀ é kitu wo, e nsàn *vifa veé yuv ve ví kér vav si.

³ Á dù, e lì ŋkùv mensàŋ fo Abinadav lav ye yì dzəə̀n é kitu ke gwan, e wày é kar ye fíyi. Ussa wùn Ahiyo vee wón Abinadavi nèn a dànèr nyám se sí səŋ kár

⁴ ye ŋkùv mensàŋ Nyùy‑iì dzəə̀n shó, a Ahiyo du kfə́ fó mbìy wo.

⁵ Davir wùn à wír veé Isray adzə̀me wáa dzən, a yòv vitaáví vév vidzə̀m, a sheʼrí Nyùy Tàr. Vé‑eè tóŋ sóŋ, kum lúŋ, kum nshùm, kar mbaʼ, kwáʼ vifá ve kwaʼán ví.

⁶ Á wìy, e mèé e Nakon riimé, nyàm bàyrìn, Ussa nèn ràmsì kiwó, e ghàr ŋkùv mensàŋ.

⁷ Dòʼshwiiy Nyùy Tàr ŋáʼáy, wù yúyrí Ussa e ghaa ŋkùv mensàŋ bìʼ kinyo ke wù‑uù mùmèn, e làʼ kiwó e ŋkùv mensàŋ.

⁸ Kí nyár Davir e ŋàŋ ji Nyùy Tàr kì shwìíy á kilòŋ, e màʼ ŋgeʼlàʼ e Ussa kitu. Á bèy, á nèn kù a yòŋ kirə́ʼ kee shooy ji Peres‑Ussa e kèʼ fo ghan fóo fèy, e shem lán.

⁹ Kí koóy bey e kishiíy fóo fèy, Davir wáa fàn Nyùy Tàr, a ghay ji a sà dzə̀ wun ghàn é le, e bóo lì ŋkùv mensàŋ, a dù sho a?

¹⁰ Wù yòʼ‑oò ló a kòŋ e lì ŋkùv mensàŋ, e dù sho e mvə̀mlaʼ ye á yoŋ ji Ŋkàlaʼ Davir. Wù nèn lì, e dù sho a dzə̀ e Obed‑Edom laʼ, a dzə̀ wír woo lò fó Gat.

¹¹ Ŋkùv mensàŋ nèn shìíy fo ŋwee e taár, Nyùy Tàr wáa səə̀vì Obed‑Edom wùn à kfə́ə rəə́.

¹² Davir nèn lò, e yù ji ŋkùv mensàŋ yiì ne a, Nyùy Tàr səə́ví Obed‑Edom, kfə̀n səə̀vì a kifá kfə́ kí kidzə̀m. Wù nèn dù, e lì ŋkùv mensàŋ fo Obed‑Edom laʼ, a wìy sho e ŋkàlaʼ ye á yoŋ ji Ŋkàlaʼ Davir.

¹³ Á wáa wìy sho bèy, a yòv, a sàvnìn. Wír ve á béʼ ŋkùv mensàŋe sar ntàm ntuùfú, Davir yiì cu e nàʼ, e yiì e kinsòŋ ke nàʼ ki.

¹⁴ Davir wáa dzən vitaáví və́ vidzə̀m e mbìy ŋkùv mensàŋ Nyùy Tàr, a wù máʼ shiŋkèéy shé kikum.

¹⁵ Wùn à wír veé Isray adzə̀me‑eè béʼ ŋkùv mensàŋ Nyùy Tàr, yovì, shéʼri, kfə̀n tóŋ sóŋ sí.

¹⁶ Ŋkùv mensàŋ Nyùy Tàr lòo nəə́ e ŋkàlaʼ ye á yoŋ ji ye Davir, Mikal woo wan Saul leéy fó wundu, e yèn, a Davir ceŋ, líynin, shéʼri Nyùy Tàr. Wù yén bey, wúné kìn wun.

¹⁷ Á wìy e ŋkùv mensàŋ, e nèn tìír e kibàn e wun kirə̀ʼ ke Davir‑iì tuuyin ji wù yíi a tiy a fo. Davir nèn cù Nyùy Tàr e cu ye tonèné, e kfə̀n yiì yé kikòŋnìn.

¹⁸ Davir màysì, e yiì cu sìy, e səə̀vì wíri e yír Nyùy Tàr woo Taà Mànjòŋ,

¹⁹ e nèn tàr áwune, a wìr mòʼón mòʼón sə́ kibán, sə́ nyám, kfə̀n sə́ shintuʼ she baŋ se *vayin se saŋèn sí. Wìr dzə̀m nèn a dùkìr aáwuné melaʼ.

²⁰ Davir kfə́n é ntoʼ ji wun səəvi á wír vee wun kfəə, Mikal woo wan Saul fəə́ ji wùn wun wàá tárnín. Á tárnín, wù suúy jii, «Fòn woó Isray kòóy yír ye kuʼùné lán. Wù dìn kinshóʼ kfə́ moo kiyúŋ e vikǐy akwàné si.»

²¹ Davir suúy e Mikal jii, «M kì dzə́n bèy, shéʼri a dzə̀ Nyùy Tàr wo wù shoʼon mo ji m wáa dzə kilìmbìy keé Isray, e lì a kirə́ʼ ké tàr won wùn à ké kfəə rə́ kí. A m kù wíy a dzən bèy, a sheʼrí Nyùy Tàr.

²² M kù wíy a shoór kitú kém e shaà bèy, e làa yòʼ a lì kitú kém ji kifa. Yii bèy, vikìy vee shooyi kù wíy a yen mo ji wír.»

²³ Á bèy, Mikal woo wan Saul nèn dzə̀ʼə̀m, e wìy kpù là wán.