2 Samuel 21 - ŊWÀʼ NYÙY

Wír veé Gibeone yúyrí wír vee Saul kfəə

¹ Yì‑iì dzə̀ é ghan se Davir‑iì sáʼá, jìŋ koó viyá vitaár e kintuŋ kintuŋ. Á bèy, Davir nèn dù, e tàr fo Nyùy Tàr. Wù suúy jii, «Dzə̀ lǒn mensə me wìr veé Gibeon ve Saul‑iì yuyrin mo wú gbuùn ne e Saul wùn à kfə́ə rəə́ kitu.»

² Fòn nèn tòóy wír veé Gibeon, a lon áwune. Wír veé Gibeon vìne yòʼ‑oò dzə̀ kfəə́ yeé Isray, yì‑iì dzə̀ kibér ke wìr veé Amor. Wír veé Israyi‑iì yiì kilìʼ fó ŋgùʼ ji á yòʼ wíy kùm a áwune. Saul nèn wìy sìíy lò, a laàr áwune bìʼ shií wo wù‑uù kér fo wír veé Isray wùn à veé Judàa.

³ Mo wír veé Gibeone wìyìn, Davir dzə́r aáwune jii, «A dzə̀ m yèe e vèn? A dzə̀ m làʼ jay və̀n e ka kí, é bo vèn à wír veé Israyi wáa dzə kijuŋ?»

⁴ Wír veé Gibeone bìnèr jii, «Yòʼ dzə̀ kinyo ke vèr à Saul, à kfə́ə rəə́, á màyìr e mbàm si, a bó vèr yòʼ kér vitaáví vée yuyrí wír fo wír veé Israyi.» Davir kfən dzə̀r jii, «Vèn yén ji a dzə̀ m yèe le e vèn?»

⁵ Á bìnèr e fòn jii, «Saul‑iì taʼ ji wun laar á ver, é la wìr fo vèr yòʼ bèr é nsay wìr veé Isray.

⁶ Kí nén a dzə a jii, á fó á wón Saul vee vilum saàmbà, é vèr sə́ŋ á áwune, aá wàá kpúkír e Nyùy Tǎr si e Gibea wo dzəə̀n ntèʼ Saul wo Nyùy Tàr‑iì shoʼon.» Fòn nèn sùúy jii, «Bo m lo fo áwune e vèn.»

⁷ Fòn nèn dù, e bàvtí Mefiboshet woo wan Jonatan woo wan Saul, bìʼ kilìʼ ke wun woo fon‑eè yiìn wùn Jonatan e Nyùy Tǎr si,

⁸ e nèn lì a dzə̀ Armoni wùn fər və Mefiboshet vee wón Rispa ve Saul‑iì dzəən wùn wàn Aiya, e kfə̀n lì sa wón atàn vee vé Merav woo wan Saul, a dzə̀ wón ve wù‑uù dzəən wùn Adriyel woo wan Barsilay, woo wír woó Meholat.

⁹ Wù lì bèy, e nèn fò e wír veé Gibeone, á sə́ŋ é yuv, e gwan e Nyùy Tǎr si, áwune vee saàmbà vìne kpúkír kàŋ mòʼón. Kinyo kìn ki‑iì kòóy é ghan se á káv vifá, aá kéʼ ne a tin sáŋ yee *barli.

¹⁰ Á bèy, Rispa woo wan Aiya lì vinsàʼ ve ndzə̀y, e sàŋrì e kilan, e nèn a dzə fo, e kèʼ fo ghan se vé‑eè kèʼèn vifá ve kavín ví, e dù meé e kimgbù ke wuu, a dzə́n sí kù néŋ fo. Wù kù‑uù shiy e shùy, shiy vitsə́ʼə́, e làa yòʼ biimé ji shinə́n, kìn nyàm kwaʼ wáa wìy, a yi dzə́n sé won.

¹¹ Fòn Davir lò, e yù kinyo ke Rispa yiìn, Rispa woo wan Aiya wo Saul‑iì cemen,

¹² e nèn dù, e sə̀ vighvə́r vé Saul wùn à vé Jonatan woo wan Saul vi fo wír veé Jabesh‑Gileadi. Dzə̀ áwune ve vé‑eè nyaʼtin, e shòʼ dzə́n sé Saul wùn Jonatan fo kirə̀ʼ ké kitar e Bet‑Shan, fo wír veé Filistiàa‑aà səŋen áwune e kishiíy ke vé‑eè yuyrin Saul e Gwan Gilboa.

¹³ Wù wìy e vighvə́r vé Saul wùn Jonatan vi, á nèn bàʼtí sa vé won vee saàmbà ve vé‑eè yuyrin viy,

¹⁴ e tàtí wùn à vé Saul vi, à vé wan və Jonatan vi, e dzəə̀mè e Kish woo tàr à Saul sày, e Tsəla, e mbìv wòŋ woo Benjamin. Á màysì, e yiì vinyo vidzə̀m mo fòn suuyin. Nyùy Tàr nèn yù bunrì ye vé‑eè bunrì fo kitúm kév kí.

Wír veé Israyi maʼ rə́r wùn aàntav veé Filistiàa

¹⁵ Wír veé Filistiàa kfən lò, e kìʼ wír veé Isray e rə́r sí. Davir wùn à wír vəə́ sə́y, a fùnèn áwune, e lòo fùnèn, Davir nèn lò a dor.

¹⁶ Kiŋgáʼ ke wìr wùmòʼ, aá yoŋ ji Ishbi‑Benov ki nèn a wìy, a kwàʼtì ji wun lo, e yuyrí a Fòn Davir. Wù‑uù dév nyùy e fíy, kfə̀n kér kòŋ yee kisha kee *brons ki, a vidzəəsì ví dzə̀ moo akilu ataár e kintoʼnìn ki bey.

¹⁷ Abishay woo wan Tsəruyia nèn wìy, e sə̀ Fòn Davir, e koò kiŋgáʼ ke wìr kìy, e yùyrí. Kí‑iì kòóy bey, wír Fòn Daviri nèn shìvìr wun, e lìʼ ji fòn yòʼ dzəə́ wìy fəə rə́r á wùn áwune, fo shùy Isray ndzə́mén, a yií á wun woo fon.

¹⁸ Rə́r sin si mày, wùn à wír veé Filistiàa kfən wìy lò, e tsə̀ŋén símóʼ sí é Gov. Sibbekay woo wir Hushat nèn yùyrí kímóʼ kee kiŋgáʼ ke wìr, a yírí dzə̀ Sav.

¹⁹ Símóʼ sí kfən wìy màʼ e Gov, a kù dzə̀ wùn à wír veé Filistiàa. Elhanan woo wan Jayir woó Betlehem yúyrí Goliat woó Gat, wo shwán kòŋ vəə́‑əə̀ dzəə̀n fó fàŋ moo mbàŋ kirèŋrèŋ bey.

²⁰ Símóʼ sí kfən wìy ŋàʼáy e Gat, a kiŋgáʼ ke wìr kímóʼ kí dzə̀ fó. Wù‑uù kér wón wo ntuùfú ntuùfú, kér wón wuù sá ntuùfú ntuùfú, aàdzə̀me‑eè dzə̀ nshòv sikweè e mbaà. Wù‑uù dzə̀ rám viŋgaʼ ve wíri.

²¹ Wù nèn a kuùrì wír veé Isray, Jonatan woo wan Shime‑Aa yúyrí wun, a Shime‑Aa dzə̀ fər Fòn Davir.

²² Wír vee akweè vìn, ve Davir wùn à wír vəə́‑əə̀ yuyriné‑eè dzə̀ rám Rafa ye dzəə̀n viŋgáʼ ve wìr vee lò fó Gat.