2 Samuel 20 - ŊWÀʼ NYÙY

Sheba shóʼ e Fòn Davir bàm

¹ Ŋgaà ŋgeʼ ye foón wùmòʼ wáa dzə e Gilgal foo fèy, a yír rəə́ dzə̀ Sheba, a dzə̀ wír woó kfəə Bikri, a dzə̀ rám Benjamin. Wù nèn lò, e tòŋ sóŋ, a waamé, a suúy e wír veé Israyi jii: «Á mèŋ ne vèsən fó wìr Davir. Vèsən fəə́ fo wàn Jessi kinyò. Àáy, wìr veé Isray, vèsən wáa kfənkír e melav.»

² Wìr dzə̀m woó Isray ku nèn lèʼ Davir, e nèn bìn e Sheba woo wan Bikri bàm. Yii bèy, wír veé Judàa kú a tiy wùn à Fòn Davir, a tsəəné, e lò fo ndzəv yee Jordan, e dù, e meé e Jerusalem.

³ Fòn Davir dù, e mèé e wun ntoʼ e Jerusalem, e nèn lì vikìy və́ ve ceméné ve wù‑uù lèmèn ji á siíy, a shìy a ntoʼ, e fìn e lav, a yiír. Wù yòʼ‑oò lo dzə́ə a shiíy e vikìy vee shooyi. Á kù‑uù dzə́ e lav moo vikǐy ŋkfə bèy, e dù, e meé mo vé‑eè kpukin.

⁴ Fòn kfə́n bey, e sùúy e Amasa ji wù du, e kùm a wír veé Juda ji lóo dzə e bǎm vishiíy vitaár, á bàʼtí á e wun si, á lóo baʼtí, wun woo Amasa wàa dzə a fo.

⁵ Amasa nèn dù ji wun báʼtí á wír veé Juda, e làa yòʼ kfən e bàm é ghan se fòn‑eè yòŋèn.

⁶ Fòn Davir nèn sùúy e Abishay jii, «Sheba woo wan Bikri yíi fo vèsən ŋgeʼ, é yì shaa ye Absalom. Lì vé rər vémé, é vèn áwune nyoori Sheba fo wùn à wír vəə́ yén ŋkà se laʼ se bomén símóʼ sí, e nə̀ə́ sho, e bòy fo vèsə́n wo.»

⁷ Á bèy, Abishay nèn lì wír Joav wùn à vé rər ve á shiy fone, à vé rər ve tavkíné adzə̀m, wùn áwune ŋáʼáy fó Jerusalem, a jùm Sheba.

⁸ Á meé é ghaa màkìlan wo wù‑uù dzəə̀n é Gibeon, wùn à Amasa tárnín fó, a Joav kér shwàʼ e kiburúʼ ke wù‑uù fàvìn é kikuuví ke wù‑uù kurin é kitu ke ndzə̀y se wù‑uù màʼàn. Wù lòo fəəsín fo mbìy, shwàʼ nèn tùm fó kiburúʼ.

⁹ Joav yòŋ Amasa, e sùúy jii, «Ŋkar yèm, à dzə̀ kitávín a», e nèn ghàr Amasa fo kighèv, e kiwó ke yìy kí ji wun baámé á wun.

¹⁰ Bó Amasa yòʼ‑oò ló a way vifií é shwàʼ wo Joav kì liìn, a ker e wun kiwo ke ŋkoòvì ki. Joav nèn sòv wun sho fo bvə̀m, vitó vi fəə́, a neŋ fo nsay. Wù ku nèn kpù, a bó Joav yoʼ sòv ji akàŋ abaà. Joav wùn fər və Abishay nèn kù a jùm Sheba woo wan Bikri.

¹¹ Wìr Joav wùmòʼ tiím e Amasa ghaa dzən, e waàmé jii, «Wìr wo wù biimen Joav, e biìmé Davir, ŋgaàŋ wáa jùmrì Joav.»

¹² A dzə́n Amasàa kù néŋ e màdzəə̀, é mvə̀m mensə. Wìr wiy, bvə́y sho, wù tìím. Wìr Joav və̀y yén, a wìr dzə̀m kù wiy, tiim fo, wù nèn tsə̀ʼ dzə́n rəy fo dzəə, e neèr e kighìn, e sàŋrì ndzə̀y é kitu wo.

¹³ Mo á tsə̀ʼə̀n dzə́n rəy fo dzəə, wìr dzə̀m ku nèn tàtí ŋgoo Joav, a jùm Sheba woo wan Bikri.

¹⁴ Aá jum bèy, a Sheba tósín ne virə́ʼ vé ram seé Isray seé mbìv taa sidzə̀m, e dù e ŋkàlaʼ yee Abel‑Bet‑Maaka, a wír veé kfəə Bikri adzə̀me báʼtí ne, e jùmrì wun.

¹⁵ Wír Joavi siíy, e wìy e Abel‑Bet‑Maaka, a shùʼ nsay e wǔn kày ji á fiʼ kòʼ, e nə̀ə́ a fo, e kfə̀n a tsəy kay tsə́yín ji á ker.

¹⁶ Wiíy woo fií wùmòʼ woó ŋkàlaʼ foo fèy nèn a waamé fo kitu ke kày jii, «Vèn yuúrí, vèn yuúrí. Vèn suúy e Joav ji wù ku kòʼtí a fèn, é vèr wun súŋnín.»

¹⁷ Joav kóʼtí, e wìy e wiíy və̀y mentsə̀m. Wù dzə́r e wun jii, «Dzə̀ wò Joav à?» Wù biímé jii, «Eè, dzə̀ mo.» Wiíy və̀y suúy jii, «Ku yuùrí jí se wánlè wò si.» Joav suúy ji wun waà yuúri.

¹⁸ Wiíy və̀y nèn a suŋnín, a suúy jii, «Kinyo ki‑iì gháʼ wír fo ŋgùʼ, á yoŋ ji wù du á e ŋkàlaʼ Abel, e sə̀ á ntir fo fo. Wù du, bo kinyo kfə́ kí kù‑úù may.

¹⁹ Ŋkàlaʼ rə̀n kù dzə̀ ben, a dzə̀ ye nyaáŋ, a kfə̀n dzə̀ ye yì tíy wùn fòn ghán sidzə̀m e nsay Isray. À taʼ e laàr ŋkàlaʼ ye wiy ye dzəə̀n tím Isray ji ka? À taʼ e səʼsí vitsə́ʼ vé Nyùy Tàr a?»

²⁰ Joav bìnèr jii, «Bó yòʼ dzə̀ féyì m sə̀ʼsí, a bó yòʼ dzə̀ féyì m bìvír ŋkàlaʼ rə̀n.

²¹ Kee shooy ki yòʼ dzə̀ e věr kwàʼtì. Kinyo ke kí dzəə̀n kí dzə̀ jii, wìr wùmòʼ lò ne, e shòʼ e Fòn Davir bàm, a dzə̀ wír woó kfəə Bikri, aá yoŋ ji Sheba. Wù lò fo wòŋ agwan veé Efrayim. Vèn ku fò a dzə̀ wír woo shoon wùn mòʼón e mò, é m nèn màʼtì ŋkàlaʼ.» Wiíy və̀y bìnèr e Joav jii, «Vèr lo, e màʼ kitú kfə́ e wò fo kitu ke kày.»

²² Wù nèn dù e yé fìí, e yèn wir dzə̀m woó ŋkàlaʼ. Á nèn tìn kitú ke Sheba woo wír woó kfəə Bikri, e màʼ e Joav fo kitu ke kày. Wù nèn tòŋ sóŋ, rə́r sí mày. Wír vəə́ lò fo ŋkàlaʼ, a dù aáwuné melaʼ, Joav wáa kfən e bàm é Jerusalem, e dù a dzə wùn fòn.

Atǎr ntoʼ Fòn Davir

²³ Joav‑iì wám vé rər veé Isray adzə̀m, a Benaya woo wan Jehoyiada dzə̀ kitú ke vé rər ve á shiy Fòn Davir,

²⁴ Adoram wáa dzə wír wo yì‑iì leey wun fo lìm vitaavií. Jehoshafat woo wan Ahilud wáa dzə taà ntoʼ wo wù fiʼtì sáʼ fòn.

²⁵ A Sheva dzə̀ ŋgaà saŋ woó wòŋ. Tsadok wùn Abiyatar‑iì dzə̀ atàá cù,

²⁶ e bóo lì Ira woo wir Jayir wo kù‑uù dzəə̀n wun kitú ke atǎr ntoʼ.