2 Samuel 2 - ŊWÀʼ NYÙY

Á kóʼór Davir ji fon woó Juda

¹ Ghán sí wìy lòo dù, Davir mbaà Nyùy Tàr, e dzə̀r ji wun sa kòʼ é ŋkàlaʼ yee Juda yìmòʼ, e dù, a saʼ fo a? Nyùy Tàr biímé ji wù wàá kóʼ. Davir kfən dzə̀r ji wun sa dù a dzə̀ é ŋkàlaʼ rəné á? Nyùy Tàr yòŋ ji Hebron.

² Á bèy, Davir nèn dù e Hebron wùn à vikìy və́ vee abàá, vee Ahinoam wo wù loòn fó Jesreel wùn Abigail wo yì‑iì dzəə̀n wiiy ŋkfə Nabal woó Karmel.

³ Wù‑uù lì sá wír və́ wùn à kfə́ə sév sí, e dù, e lèm e ntèʼ seé Hebron, wùn áwune wáa dzə fo.

⁴ Wír veé Judàa nèn wìy e Hebron, e yòʼ Davir, e kòʼór ji fon, ji wù wáa saʼ a rám Juda. Davir yú ji wír veé Jabesh‑Gileadi lìtì ne a Fòn Saul,

⁵ e nèn tsə̀nsí ntum aáwune, a suúy jii, «Nyùy səəvi ven bìʼ koŋ ye vèn dìnèn e fòn won, e lìtì wun.

⁶ Nyùy Tàr kú a dìn koŋ rə́ ye ruú e vèn, a dzə vèn áwune. Mómò, m kù yíi a ker ven sá kijuŋ mo vèn yiìn kinyo kìn.

⁷ Kí kù dzə̀ jii, mo Saul woo taàtá won làyìn ne, a wír veé Judàa yóʼ ne mo ji fon wov, lá vèn yòʼ a fàn. Vèn wáa tiy kitávín.»

Á kóʼór Ish‑Boshet ji fon woó Isray

⁸ Kí wáa koóy bèy, a mfòóme Saul woo Abner wo yì‑iì dzəə̀n wan Ner kì lì ne Ish‑Boshet, e lìysín sho e Mahanayim.

⁹ Wù nèn kòʼór wun ji fon ji wù wáa saʼ a mbìv wòŋ yee Gilead wùn à yee Asher, à yeé Jesreel, à yeé Efrayim, e lì yeé Benjamin, dzə̀ ji woŋ Isray e dzə̀m.

¹⁰ Ish‑Boshet woo wan Saul və̀n‑eè dzə̀ kiyá mkweè e ghan se vé‑eè koʼorin wun ji fon woó Isray. Wù‑uù sàʼ viyá vibaà. Yii bèy, a wír veé Judàa tíy kév a dzə̀ e Davir bàm.

¹¹ Davir‑iì sàʼ wír veé Juda viyá saàmbà e ŋwee ntuùfú, a wù dzə́ e Hebron.

Rə́r sé wìr veé mbìv Isray wùn à veé mbìv Judàa

¹² Abner woo wan Ner nèn lò, e lì wír Fòn Ish‑Boshet woo wan Saul wùn áwune fəə́ fó Mahanayim, e dù e kwaʼ rər é Gibeon.

¹³ Joav woo wan Tsəruyia nèn lì wír Davir, e fəə̀ shó, e dù, wùn à wír vìyi tárnín é kisə̀m keé Gibeon. Wír Abneri dzə̀ʼə̀m e mbìv yìmòʼ é ghaa kisə̀m, vé Joavi dzə̀ʼə̀m e yìmòʼ.

¹⁴ Abner nèn lò, e sùúy e Joav jii, «Vèsən shóʼtí wónlě nsùm fo mbìv see sibaà, aá funen áwune áwune, é vèsən yén.» Joav biímé ji á wàá shóʼtí.

¹⁵ Á nèn shòʼtí wónlě nsùm nshòv sibaà e ghvə̀m ji á tiím e kfə́ə Benjaminé mbìv ye dzəə̀n yé Ish‑Boshet woo wan Saul. Á shóʼtí sá bèy fo Davir mbìv.

¹⁶ Vindzəʼ vi nèn kèʼ, a wìr bám wír fo kitu, wù sòv fó buu nsaŋ e shwàʼ. Á bèy, áwune adzə̀me nèn gbù fo nsay. Á nèn wìy sìíy a yòŋ yír kirə̀ʼ keé Gibeon kìy ji Helkat Hassurim.

¹⁷ Vindzəʼ veé kishiíy fóo fèy vi‑iì dzə̀ vitávín, wír Daviri‑iì ghàʼ Abner wùn à wír və́ veé Israyi.

¹⁸ Wón Tsəruyia vee ataári‑iì dzə̀ fó, aá dzə̀ ji Joav, Abishay wùn à Asahel. Asahel‑iì dzə̀ ji féfér e kileʼ.

¹⁹ Wù‑uù jum Abner, léʼ, du e bàm wó tìítiy.

²⁰ Abner bìnkìr, e lèéy bám, e yòŋ Asahel, e dzə̀r jii, «Və̀y dzə̀ wò à?» Wù biímé ji dzə̀ á wun.

²¹ Abner nèn sùúy sho jii, «Lá à yòʼ dzə́ə a jùm mo, shóʼ a dzə̀ e wánlè wom wùmǒʼ bàm, e sə̀ vifá a dzə̀ və́.» Yii bèy, bó Asahel yòʼ‑oò lo yàr fó a jùm Abner.

²² Abner kfən sùúy e Asahel jii, «Lá à yòʼ dzə́ə a jùm mo. À taʼ ji m yúyrí wò bìʼ ka? M fèn yíi a yen fər wò woo Joav, a dzə e le?»

²³ Yii bèy, la Asahel yòʼ yàr fó a nyoòrì Abner. Abner nèn tsə̀nsí kòŋ fó bàm, e sòv Asahel sho fo bvə̀m, yí meésín é ndzə̀m. Wù gbù fo, e nèn kpù é kisəəné. Wìr lóo shaà, mee fo, wù kù tìím, e jàáy.

²⁴ Joav wùn Abishay nèn shòʼ e Abner bàm. Shùy lòo nəə́, á meé é gwan woo Amma e ghaa Gia, e dzəə ye yì du e woʼ yeé Gibeon.

²⁵ Wír Benjamine nèn bàʼtí e kitu ke gwan, e tìím kitávín e Abner bàm.

²⁶ Abner jàŋ Joav, a dzər sho jii, «Vèsən kù sí wìy a fùnèn fùnèn, e wìy dù mày à? À yòʼ kì ji kí wíy lòo mày, e bir birín a? Kí yíi dù, e meé e le, é bo à suúy, é wír vée yar fó a jùm afə́r vév.»

²⁷ Joav bìnèr jii, «M suuy kin kan a dzə̀ yír Nyùy. A là fo à súŋnín ben, bó wíri kù kì yíi a jùm afə́r vév, e dù, e meé mo yì yíi ran.»

²⁸ Joav nèn tòŋ sóŋ, wìr dzə̀m tiím, e làa yòʼ dzə́ə a nyoòrì afə́r vév. Vindzəʼ vi nèn mày.

²⁹ Abner wùn à wír vəə́ ghán vitsə́ʼ vifur, e nə̀ə́ e mbuŋ Jordan, e tùm ndzə́v, e kù a dù kijàvndzə. Shùy lòo lùm, á meé é Mahanayim.

³⁰ Mo Joav yàrìn fó a jùm Abner, e nèn kfə̀n é bàm, e bàʼtí wír adzə̀m, e yèn a Davir láy wír nshòv bvə̀ʼə̀ e ghvə̀m, a bó á yoʼ tàŋ Asahel fo.

³¹ Yii bèy, a Davir wùn à wír vəə́ kì yùyrí ne wír Benjamin ve vé‑eè dzəə̀n wùn à Abner, wír kishóv mntuùfú é ghiì taár (360).

³² Joav nèn lì dzə́n Asahel, e dù, e dzəə̀mè e tàr wov sày e Betlehem. Wùn à wír vəə́ nèn kfə̀n ghàn vitsə́ʼ vifur, ndzə lòo jàv, á meé é Hebron.