2 Samuel 19 - ŊWÀʼ NYÙY

Joav dín jay Fòn Davir

¹ Wìr lò, e sùúy e Joav jii, «Yú búʼú, Fòn Davir diy kpú Absalom, sə́ʼər mensíy.»

² Vé rər Daviri yú ji wù tóŋ a kpú wan və, e nèn weèy. Kishéʼrì kee bìʼ ton ye áwune‑eè tònèn aŋgàa vibàn vév kí nèn bìnkìr ji kinyo ke mendzə̀n ki é kishiíy fóo fèy.

³ Áwune nèn a sooné soonén, e bó a nəə́ e ŋkàlaʼ yee Mahanayim moo vé rər ve rə́r sí ghaʼan áwune, á wáa nyeŋ, a kfən e bàm, a woomé.

⁴ A fòn kù dzə́, a wù sə́tí sí e wóo, tóŋ kitávín, yoŋ jii, «Éè wan wòm Absalom, éè Absalom, wan wòm, wan wòm.»

⁵ Joav nəə́ fo fòn dzəə̀n, e bùn, e sùúy sho jii, «Nyàr káʼ, á shòór a aŋgaà və́ lìm lán. Kí vèr sà kì tìn dzəʼə̀m fòn lán, e tìn sá yé won və́ vee vilum, à vee vikìyí, à yé vikìy və́ ve nəə́né, à ve lemèné á?

⁶ Fòn sí ban a wír ve á koŋ wun bánen, nèn koŋ a dzə̀ á wír ve á ban wun. Á dìn rú lán a ji vé rər vəə́ yòʼ dzə̀ á kifá fo wun, aàmfòómeé shó. M yén a jii, a vèr kì kpùkír lán adzə̀m, Absalom wáa dzə sho e tin, bo kí kì bòŋ á fon feyì.

⁷ Á shúr á wún, e dù, e beèrì a vé rər və́. Aá dzə̀ là fóo dù, bo ndzə yíi a jàv, a wìr rə̀r e mòʼón yòʼ dzə̀ə́ a wùn fòn. M suuy bèn, kan a dzə̀ á yír Nyùy Tàr. A kee shoon ki yíi bir, e shaà a kinyo ke bi kí kidzə̀m ke kí‑iì yiìn ne kòóy fon, e kèʼ mo fòn‑eè meen é wánlè nsùm.»

⁸ Fòn nèn ŋàʼáy, e dù, e dzə̀ʼə̀m e shùu kày wo wú nəə e ŋkàlaʼ. Wíri yú ji fòn sì á e shùu kày, e nèn dù, e tìím e si wo. Kí wáa koóy bèy, a wír veé Isray ve vé‑eè jumrì Absalome nyéŋkír ne, e kfə̀n é melav.

Fòn Davir kfə́n é bàm é Jerusalem

⁹ Wíri nèn lò, e kèʼ, a kfə̀ynìn woŋ Isray e dzə̀m jii, «Fòn Davir‑iì lo bòyìr ver fo aŋgàa vibàn vérí wo, e kfə̀n sə̀ ver fo wír veé Filistiàá wo, yii bèy, wù fəə̀ ne kitúm lèn, bìʼ Absalom.

¹⁰ Mo Absalom wo vèsən‑eè yoʼon ji fon wòsən kpuun ne e shùu rər, vèsən sə̀sín səsín, e làa yòʼ siìr Fòn Davir e bàm ji ka?»

¹¹ Fòn Davir yú kinyo ke wír veé Israyi gháynin kìy, e nèn tsə̀nsí Tsadok wùn Abiyatar vee atàá cù ji á du, e yèn á kfə́m sé wìr veé Juda. Á du, á dzə̀r á jii, áwune sà sə̀sín kév səsín bey ji ka á? Áwune fèn yíi a dzə a vé bàmé vée siìr a fon e ntoʼ.

¹² Áwune waà dzə̀ á afə́r və́, a wùn áwune dzə̀ á mensə́ memòʼón. Sà yiì ka lèn, bo áwune wáa dzə vé bàmé vée lì wun, e siìr e bàm é ntoʼ a?

¹³ Davir kfən sùúy e Tsadok wùn Abiyatar ji á du, e sùúy a e Amasa jii, wùn wun dzə̀ á mensə́ memòʼón, e kèʼ fo lèn, wun sí lem a wun woo Amasa e Joav kirə̀ʼ ji kitú ke vé rərí. Nyùy maʼ á ŋgeʼ e wun woo Davir kitu, a wun fen dzə̀ làa yòʼ a tiy a e wun jì.

¹⁴ Jí se Davir sìn si nèn yiì, wìr dzə̀m woo Juda tátí shuu, e tìím e wun bàm. Á nèn tsə̀nsí ntum e wun ji wù wáa kfən a e bàm wùn à wír vəə́ adzə̀m.

¹⁵ Wù nèn a kfən e bàm, e dù, e mèé e ndzəv yee Jordan, a wír veé Judàa kì bàʼtí ne e Gilgal ji fòn yií wiy, á tsəə̀né á wun, e tùm ndzə́v shó.

¹⁶ A Shimey woo wir Benjamin kì gìtì ne, e sə̀y sá e ndzəv yee Jordan wùn à wír veé Judàa ji wun yén á Fòn Davir. Shimey və̀n dzə̀ wan Gera woó Bahurim,

¹⁷ a wù‑uù wiy wùn à wír veé Benjamin ámóʼó nsə̀kì. A Tsiba woo wir lìm wo wù leey láʼ Saul kì gitì ne sa, e sə̀y wùn à wón və́ vee vilum vee nshòv sitàn e ghvə̀me, aàŋgàa lìm vəə́ mbaà. Wíri sə́y bey, e mèé e ndzəv yee Jordan, é bo fòn wáa wìy.

¹⁸ Wù wìy, áwune nèn tùmsín ndzə́v ji a du, e lì a wùn à kfə́ə rəə́, e wìy a sho, a yiì vinyo ve fòn yén ji dzə̀ á wàa yiì. Á dù, e yèn fon e ndzə̀n Jordan, Shimey woo wan Gera və̀y nèn tsə̀m ndzəə́, e làʼ kitú fo nsay e fòn si,

Fòn Davir láysín jay Shimey

¹⁹ e sùúy jii, «Nyàr, á ku làysìn a jay wo mò‑oò jayin á e taàtá wom woo fon e ghan se vé‑eè loòn á fo Jerusalem. Lá á yòʼ dzəə lèm a e vifii.

²⁰ Mo woo wánlè fòn kì á ji m waà jày. Á kinyo ke kí yiìn á bo m wáa dzə a wír mbìy fo Joosev kfəə wóo wìy, e yen a taàtá wom woo fon.»

²¹ Abishay wo yè wov‑iì dzəə̀n Tsəruyia nèn gìtì, e sùúy ji Shimey dzə̀ á wír wo á yúyrí á yuyrín, bìʼ fo wù‑uù kuurì a fon wo Nyùy Tàr‑iì yoʼon.

²² Yii bèy, Fòn Davir suúy e Abishay jii, «Kì dzə̀r la kinyo e vèn vee wón Tsəruyia a? Vèn yíi a fo mo ŋgeʼ à? Kí m yèn ne lèn ji m dzə̀ fon woó Isray lán. Á yòʼ yíi yuyrí wír woó Isray lán.»

²³ Fòn nèn lìʼ e Shimey ji á yòʼ yíi yuyrí a wun.

Fòn Davir wùn Mefiboshet kfən yènnín

²⁴ A Mefiboshet woo wan Saul kì sə̀y sá ji wun yén á fon. Wù wáa wìy, a wù dzə̀ e wuú wùn à ndzə̀y sí là su, à kighev ki là kóm. Kù dzə̀ mo wù‑uù siiyin a dzə, e kèʼ mo fòn‑eè loòn fó Jerusalem ji wun kù wíy a dzə bèy, e dù, e meé mo fòn wíy kfən kijuŋ.

²⁵ Wù sə́y fó Jerusalem, e yèn fon bèy, fòn dzə́r shó jii, «Mefiboshet, yì‑iì kòóy ka, la à yòʼ dù wòsò?»

²⁶ Wù bìnèr jii, «Nyàr, á kì ji m dzə̀ á ndzə́m. Mò‑oò lo e sùúy a ji ŋgaà lìm wom kúr á kimbèʼbìy, é m wàá kóʼ, a jùmrì a fon, wù bóʼtí á mo.

²⁷ Vinyo ve wù‑uù suuyin e taàtá wom woo fon vìy, wù‑uù lór a mo lórín. Fòn dzə̀ á moo nshìylav Nyùy bèy. Fòn ku yiì a kinyo e mò ke kí gheenen á wun.

²⁸ A yì‑iì dzə̀ taàtá wom woo fon yùyrí á wir dzə̀m woo tàr wór kfəə. Yii bèy, fòn shóʼ mo ji m wáa yikír a vèr wun. M yòʼ kfə̀n diy a kifá kímóʼ kí fo fòn.»

²⁹ Fòn bìnèr jii, «À kfə̀n rə́si suuy a dzə̀ ka aay? M yòŋ ne ji vèn Tsiba waà lo, e jàv a kéŋ tàr won.»

³⁰ Mefiboshet suúy jii, «Fòn fó á sho e dzə̀m. Shií wom kì dzə̀ á kfə́ jii, taàtá wom woo fon kfə́n á e bàm kijuŋ.»

Fòn Davir dín koŋ rə́ e Barsilay

³¹ Á bèy, a Barsilay woo wír woó Gilead kì wìy fó Rogelim ji wun tsəə́né sáa fon, e lìysín ndzə́v yee Jordan sho.

³² Barsilay‑iì dzə̀n ne feyì. Wù‑uù dzə̀ kiyá mwaamé, a dzə̀ ŋgaà kav, a wù‑uù yiir fon e ghan se fòn‑eè dzəə̀n é Mahanayim.

³³ Fòn suúy e wun ji wùn wun líysín á ndzə́v, e dù, a dzə e Jerusalem, é wun wáa leéy a fo wun.

³⁴ Barsilay bìnèr jii, «Nyàr káʼ, m yòʼ dzəə́ kér a viyá vinín e kitu ke nsay, a bó shií yòʼ waà dzə̀ wo m du, a dzə a vèr fòn e Jerusalem.

³⁵ M sì á kiyá mwaamé, a bó kifá ki yòʼ dzəə́ boŋ a mo. Yòʼ dzə̀ m dzəə yù á nyom kifa ke m yí, kìn ke m nó, a yòʼ dzə̀ m dzəə yù a vijuŋ ve yòv. A m dù, bo m dzəsì a dzə̀ á kibeʼèy e taàtá wom woo fon kitú.

³⁶ M yòʼ kfə̀n dzə̀ə́ a wír wo a dzə̀ fòn kfə̀n bùʼ a e dzəə yee ben. M lo, e tsəəné a fon, líysin Jordan sho, é m nèn a kfən a e bàm.

³⁷ Á wàá maʼti, é mo woo wánlè fòn kfən dù, e kpù á e tàr wor wùn yè wór kitu ke sày. Wánlè fòn woo Kimham waà və̀ne. Taàtá wom woo fon ku waà lì, a tum sho, du, wù wàa yiì a kinyo sho ke fòn yén ji kí dzə̀ á kijuŋ.»

³⁸ Fòn nèn bìnèr jii, «Vèr Kimham lo, a dù, m yíi dù, a yiì kinyo e wun, ke à wáa kòŋ. Fo ké ki, aà koŋ ji m sə́ wò e kinyò, a fə̀m dzə̀ kiné kí, bo m yíi sə.»

³⁹ Davir wùn à wír və́ adzə̀me nèn lìysín Jordan. Á líysín, wù baámé Barsilay, e lòn ji Nyùy səəvi á wun. Barsilay nèn lò, a kfən e bàm fó laʼ.

Wír veé Juda wùn à veé Israyi táŋ fon

⁴⁰ Yì‑iì dzə̀ é ghan sin, a vé rər veé Juda adzə̀m wùn à kintoʼnìn ke vé rər veé Isray ki kì tsəə̀né ne fon, e lìysín ndzə́v shó. Fòn nèn a dù e Gilgal, a Kimham du wùn wun.

⁴¹ Wír veé Israyi nèn a wìykìr. Á báʼtí adzə̀m, e nèn kòʼtí e fòn si, e bùn, e dzə̀r shó jii, «Nyàr, afə́r vér veé Judàa sà‑aà wìy, e faàsì wun fo vèr ji ka á? Bó yòʼ sà‑aà yíi lì ver fon wùn à kfə́ə rəə́, à wír vəə́ adzə̀m, e liysín Jordan sho a?»

⁴² Wír veé Judàa nèn tò, e bìnèr jii, «Vèr yiì bèy, bìʼ fo fòn dzəə̀n wír woo věr ram. Kí nyár ven ji ka? Wù yòʼ fó kifá kímóʼ kí e vèr, a wù yòʼ fə̀m yiir ver.»

⁴³ Wír veé Israyi bìnèr e veé Judàa jii, «Vèr kér ghay e Davir mvə̀m vifòn kilíŋ e ghvə̀m. Kér ver Fòn Davir feyì feyì. Vèn kì kày ver ji ka? Lá vèn yòʼ làysìn ji dzə̀ á ver wír mbìyi vée shù ji á siir á fon e bàm.» Á wáa taŋnín bèy, wír veé Judàa wáa nyarkír aáwuné kisuŋnìn, a shaà veé Isray.