2 Samuel 18 - ŊWÀʼ NYÙY

Kpú Absalom

¹ Davir nèn bàʼtí vé rər və́, e lèm amfòómé ve á wáa wam wíri nsə̀kì, nsə̀kì, ámóʼó wií wií.

² Wù nèn jàv vé rərí vilíŋ vitaár, e fò mbìv yìmòʼ e Joav, e fò yìmòʼ e Abishay woo fər Joav wo yè wov dzəə̀n Tsəruyia, e màysì mbìv yìmòʼ, e fò e Ittay woo lò fó Gat. Fòn nèn sùúy ji wun lo, e dù a wùn áwune é kwaʼ rər.

³ Vé rərí bìnèr jii, «Nyàr káʼ, bó yòʼ dzə̀ fòn dù á vèr áwune. A vèr dù, rə́r sí gháʼ, vèr léʼ, bo yòʼ dzə̀ á ji á tòn ne ver. A vèr dù, e fə̀m kpù kintoʼnìn ke wìr, la kí yòʼ à dìn. Yii bèy, fòn kù dzə̀ kfə́, a wù kùʼ, e shaà a wír vee nsə̀kì e ghvə̀m. Kí bòŋ a ji fòn goʼ é mvə̀mlaʼ, a tom a ver.»

⁴ Fòn biímé ji wun lo, e yiì a mo áwune suuyin. Wù nèn dù, e tìím e shùu kibùʼ, vé rərí wáa lev a shaà, wíri nsə̀kì nsə̀kì, ámóʼó wií wií.

⁵ Fòn lò, e fò sáʼ e Joav wùn à Abishay, à Ittay jii, «Vèn wáa yen fo kinyo ki koóy wánlè nsùm woo Absalom.» Wù‑uù fò sáʼ aàmfòómeé bey, vé rər adzə̀me yú.

⁶ Vé rərí nèn a dù e kwaʼ rər ji á tám á wùn à wír veé Israyi. Rə́r sí nèn dù, e tsə̀ŋén e kòv woó Efrayim,

⁷ wír Daviri teè wír veé Isray e dzəə ye bi. Wíri kpú nsə̀kì mbaà é kishiíy fóo fèy.

⁸ Vé‑eè maʼ rə́r fó e dzə̀m. Wír ve vé‑eè kpukin é kòví‑iì kùʼ, e shaà ve vé‑eè yuyrin yúyrín é shùu rər.

⁹ Absalom nèn lò, e tò e wír Davirí wùn, a wù dzə́ e kitu ke kimbèʼbìy ké nyàmŋkoʼ. Kimbèʼbìy kiy ki lòo soorí tám se lum kici ké *terebint, kitú ke Absalom ki fávín é nsàn tam wúmóʼó. Wù nèn a njeŋ fo, kimbèʼbìy kí wáa nyeŋ, a dù.

¹⁰ Wìr yén Absalom, e dù, e rəə̀mé Joav ji wun yèn á Absalom, a wù kér a e kici ké terebint.

¹¹ Joav bìnèr jii, «Ábáy, à yèn wun, e làa yòʼ yuyrí yuyrín a? Aà kì yùyrí, bo m kì shèʼrí wò, e fò wò mbàm *ashekel e ghvə̀m, a dzə̀ see kisha ke mbàm ke fəvír kí, e kfə̀n fò wò kikuúví ké rər.»

¹² Wìr və̀y suúy jii, «A wìr fə̀m wày mbàm e mǒ kiwo ashekel nsə̀kì, la m yòʼ màʼ kiwó kém e wàn ntoʼ kitu. Vèr kì yù mo fòn kì kantì vèn à Abishay, à Ittay ji wìr wáa yen a fo kinyo ki koóy á wánlè nsùm woo Absalom.

¹³ Mo sí fòne dzəə̀n ghií waamé, a m kì ŋwày jí fòn, e laàr dzəʼə̀m Absalom, bo yòʼ dzə̀ wówò və̀n, à yiì tòm mo.»

¹⁴ Joav bìnèr sho jii, «M yòʼ‑óò wáa jivír ghán wòsò.» Wù taásín kòŋ e taár, e dù, e shwàʼ e Absalom nsaŋ, a wù dzəə́ njéŋ e lum kici ké terebint e tin.

¹⁵ Aŋgàa ŋkeè Joav vee ghvə̀me nèn kaàrí Absalom, e màysì, e yùyrí.

¹⁶ Joav nèn yòŋ, á tóŋ sóŋ, vindzəʼ vi tiím, vé rə́r Daviri kfə́n é bàm, e làa yòʼ dzə́ə a jùm wír veé Isray.

¹⁷ Á nèn shòʼ dzə́n Absalom, e màʼ e bii wo shoóné é kòv, e sə̀tí e kikfə́r ke tiy kí. Wír veé Isray adzə̀me nèn a nyeŋkír, a dù aáwuné melav.

¹⁸ Yì‑iì dzə̀, a Absalom dzə̀ə́ sho e tin, wù bóm kikinkìn kímóʼ kí é Kiwoóy ké Afòn, e shù yír ji kikinkìn ke Absalom. Wù‑uù shu bèy, suuy jii, «M yòʼ kér wán woo lumèn wo wù lem yír yém.» Á nèn kù a yòŋ yír kikinkìn kìy ji kikinkìn ke Absalom, e wìy shem lán.

Davir yú kpú Absalom

¹⁹ Ahimaas woo wan Tsadok nèn sùúy e Joav jii, «Ku màʼtì, é m nyéŋ, e dù, e fìʼtì sáʼka və̀n e fòn ji Nyùy Tàr bòyìr a ne wun fo aŋgaà və́ vibàné.»

²⁰ Joav sháʼnín jii, «Yòʼ dzə̀ à dù, e fìʼtì sáʼka lán wo wàn ntoʼ kpuun. À wíy dù ké a dzə̀ é kishiíy ke sən kí.»

²¹ Joav nèn sùúy e wìr kitum woó Etiopia jii, «Dùu, e fìʼtì e fòn kinyo ke à yenen.» Wù gbù, e làʼ kitú e nsay e Joav si, e nànèn, a leʼ ji wun du, e fìʼtì a e fòn.

²² Ahimaas woo wan Tsadok kfən sùúy e Joav jii, «Kòŋ wàa koóy ka, bo m kù kér fóo dù e sáʼka və̀n.» Joav suúy shó jii, «À taʼ ji à ku dù bèn ji ká wan wòm. À yòʼ yíi koóy vilaámé.»

²³ Ahimaas kfən sùúy jii, «A kòŋ wàa koóy ka, bo m kù du.» Joav nèn biìmé ji wù du á rì. Á bèy, Ahimaas shèr dzə́ə fó mbuŋ Jordan e kinyeŋ ki, e nèn kù bàʼàr wir kitum və̀y.

²⁴ Davir‑iì dzə́ e kintìntìn ke shùu kày woo fó ndzə wùn à woo fó mvəmé. Ŋgaà ŋkiy kóʼ é kitu ke kày dzə́ə fó kirəv, e lòo màʼ sí, e yèn a wìr nyéŋ wiy wùn mòʼón.

²⁵ Wù bùn fon, e fìʼtì. Fòn suúy jii, «A wù nyéŋ wiy wùn mòʼón, bo wù wiy a dzə̀ e sáʼka wo juŋ.» Wù nèn kù a wìy wìyìn, a meʼ áwune.

²⁶ Ŋgaà ŋkiy və̀y kfən yèn wùmòʼ woo wír, a wù nyéŋ wiyì. Wù yòŋ e wìr wo wù‑uù shiy shúu kày jii, «Leéy, wùmòʼ woo wír siì və̀sə, a wù nyéŋ wiy wùn mòʼón.» Fòn yòŋ ji bo wù wiy sa a dzə̀ á e sáʼka wo juŋ.

²⁷ Ŋgaà ŋkiy yòŋ jii, «Kinyeŋ ke wìr wo wù nyéŋ fo mbìy ki shwínin ké Ahimaas woo wan Tsadok.» Fòn nen sùúy jii, «Ahimaas dzə̀ wír wo juŋ. Wù‑úù wáa wìy e sáʼka wo juŋ.»

²⁸ Wù wìy, e bùn fon ji vinyo vi bòŋ a ne, e tsə̀m ndzəə́, e làʼ kitú fo nsay e fòn si, e sùúy jii, «Búríi wáa dzə fo Nyùy Tàr woo Nyùy fòn, wo wù fəərin taàtá wom woo fon fo aŋgàa vibàn vəə́ wo.»

²⁹ Fòn dzə́r jii, «Wánlè nsùm woo Absalom dzə̀ kijuŋ a?» Ahimaas bìnèr jii, «Joav kì tùm wánlè fon, e lòo tum mo, m yú kiyor e kilaʼáy, e làa yòʼ kiíy ji sà dzə̀ ké gha á?»

³⁰ Fòn suúy shó jii, «Shaà, e tìím fèn.» Wù ku nèn shaà, e tìím.

³¹ Wìr kitum woó Etiopia və̀y nèn wìy, e bùn fon ji wun kér a sáʼka wo juŋ wóo fìʼtì a e taàtá və woo fon. Nyùy Tàr sə̀ á ne fon lán fo wír ve vé‑eè ŋáʼri wùn à fòne.

³² Fòn dzə́r e wìr kitum və̀y jii, «Wánlè nsùm woo Absalom dzə̀ kijuŋ a?» Wù bìnèr jii, «Nyùy ku yiì, é kinyo ke kí kooyin wun ki koóy aŋgàa vibǎn taàtá wom woo fon adzə̀m, e kfə̀n kòóy sa wir dzə̀m wo wù ŋáʼri wùn fòn.»

³³ Kindzə́m kí tóʼnín fon, wù kóʼ é lav yee fó yuv, e kibùʼ keé shùu kày fèy, a dìy. A wù‑uù kóʼ, tóŋ, suuy jii, «Éè wan wòm Absalom, éè wan wòm, wan wòm Absalom, kì bòŋ ke kpú mo, áà goʼ, éè Absalom, wan wòm, wan wòm.»