2 Samuel 17 - ŊWÀʼ NYÙY

Hushay bóʼtí Absalom

¹ Ahitofel lò, e sùúy e Absalom jii, «Màʼtì, é m shóʼtí wíri nsə̀kì nshòv sibaà e ghvə̀m, é vèr áwune fəə́ vitsə́ʼ vé lán vi, e dù, e shòʼ e Davir bàm.

² M yíi sàsìn, e nəə́ wun, a wù dór ne, a bó wù yòʼ dzəə́ kér kitar, é wù fan, é wír ve wùn áwune dzəə̀né léʼkír. M yíi yuyrí a dzə̀ fon cáʼ,

³ e nèn lì wir dzə̀m, e wìy, e fo e wò. Á taʼ a dzə̀ wír e mòʼón, é wìr dzə̀m fíʼ bòy, é nyaáŋ wáa dzə.»

⁴ Ntir rə̀n‑eè bòŋ Absalom wùn à kfə́m seé Isray si.

⁵ Yii bèy, Absalom kfən sùúy jii, «Vèn jaŋ sá Hushay, é vèsən yú ó ji wù sà yoŋ kfə́ ji ka á?»

⁶ Hushay wìy, Absalom nèn naàrì ntir ye Ahitofel kì foon, e dzə̀r jii, «A dzə̀ vèr jùmrì kinyo kee shoon à? Aà bìnsìn, à nèn fò ye yee ntir.»

⁷ Hushay nèn sùúy e Absalom jii, «Ntir ye Ahitofel foon lán yoʼ bòŋ.»

⁸ Wù kfən sùúy jii, «Kí à kì ji tàr won wùn à wír vəə́ dzə̀ vé rər ve tavkíné. Áwune sí shévkir moo nyám yee *bear ye kifá ki koon wón və́ é kwaʼ. Á naʼ kee shooy, tàr won dzə̀ wir rə̀r wo dzəə́n, a yòʼ dzə̀ wù shìíy e wírí mvəm.

⁹ Fə̀m lèn, wù sí laay e mbvə̀ʼ, kìn é kirə̀ʼ kímóʼ kí. A wù dù, e tòmbìy yùyrí vé rər vé ámóʼó, bo wìr yíi yu, é wù wáa yòŋ ji á laàr a ne vé rər ve á jumrì Absalom.

¹⁰ Á bèy, é vé rər vée nèn a fàn, fə̀m à ve á kér shilív shé bvərə̀ʼ shií, bìʼ fo wìr woó Isray e dzə̀m kì ji tàr won wùn à wír və́ adzə̀me dzə̀ á antav.

¹¹ Ntir yem nén a dzə ji à báʼtí á wír veé Isray adzə̀m, e kèʼ fo Dan, e dù, e bàʼ e Beersheba, aá wáa dzə agháʼán moo síy seé ghaa rìbà ndzə̀v. À báʼti bèy, é li wò áwune, e dù sho e kwaʼ rər.

¹² Vèsən yíi nəə́ tàr won e rə́r sí fo á yenen a wù dzə̀. A vèsən yíi sùm wun moo mbàʼŋkfəə́mé ye yi gbuùn, e sùm nsay bèy, é wùn à vé rər vəə́ kpúkír adzə̀m.

¹³ A wù lòo dzə, e nyèŋ, e nə̀ə́ e ŋkàlaʼ ye á bomen kay, e kaàrí sho, é wìr dzə̀m woó Isray nèn wìy aàkfə̀ə́, aá səŋ kay, e dù, e màʼ e kiwoóy, é la tíy e mòʼóne yòʼ bèr fó.»

¹⁴ Absalom wùn à wír veé Isray adzə̀me nèn bìnsí ji ntir Hushay waà bòŋ, e shaà a ye Ahitofel, a yií Nyùy Tàr ji lá áwune yòʼ jùmrì a ntir Ahitofel ye kù‑uù dzəə̀n ye juŋ, é wun fiʼ wìy a e ŋgeʼ si e Absalom kitu.

Á tír Fòn Davir wù léʼ

¹⁵ Hushay nèn dù, e naàrì e Tsadok wùn Abiyatar vee atàá cùu mo Ahitofel kì foon ntir e Absalom wùn à kfə́m seé Isray si, e yòŋ sa rə́ə yee ntir ye wù kì foon.

¹⁶ Wù naàrì bèy, e sùúy ji á ku tsə̀nsí a ntum fo Fòn Davir wùn lèn lèn, ji lá wù yòʼ dzəə shìíy a e tuumé yeé woʼ. Wù líysín á ndzə́v yee Jordan cér fo á sum á fon wùn à wír vəə́ fó, e laàr.

¹⁷ A Jonatan wùn Ahimaas vee vé ntume‑eè dzə́ kév é En‑Rogel fo vé‑eè shiy sáʼka. Á yòʼ‑oò nəə e ŋkàlaʼ fo á yén áwune. A kwàn woo wiíy wúmóʼó lo, wú wàa lì vinyo ve ví kooyì, a dù, a suúy aáwune, bo áwune wáa lì, a dù, a naàrì e Fòn Davir.

¹⁸ Wánlè nsùm wùmòʼ nèn lò, e yèn áwune é kishiíy kin, e nèn dù, e sùúy e Absalom. Áwune nèn gìtì, e nyèŋ, e dù e Bahurim, e làáy e wìr wùmǒʼ laʼ, a ŋgaàŋ kér bií ndzəv ye tuŋéné e wun ghaa lav. Áwune nèn nə̀ə́ sho, e làáy.

¹⁹ Wiiy ŋgaà lav sə́tí shúu bii e kifá ki, e sàŋrì sáŋ é kitu wo, la wíri yòʼ a kiíy kifá ke kí dzəə̀n fó.

²⁰ Nsheèlav se Absalom si nèn lò, e wìy fo, e dzə̀r e wiíy və̀y ji Ahimaas wùn Jonatan sà bèé á? Wù bìnèr ji áwune lìysín a ne e ndzə̀n ndzə̀v fésə. Nsheèlav si nèn dù, e tàʼ áwune fó fo, e làa yòʼ yen, e nèn bìnkìr, a kfən e Jerusalem.

²¹ Mo á loòn, Jonatan wùn Ahimaas nèn fəə̀kír fo bií ndzəv fey, e dù, e yèn Fòn Davir, e sùúy sho ji wù líysín á ndzə́v cér, bìʼ fo Ahitofel dìnèn ne a dzə́ə ye dzə̀ á ghàn shó, e bóo koo a wun.

²² Á bèy, Davir wùn à wír və́ adzə̀me nèn ŋàʼáy, a dù, a liysín Jordan. Wìr dzə̀m túm Jordan, é bo ndzə wáa jàv.

²³ Fo ké Ahitofel ki, mo wù yenen ji á yoʼ jùmrì a ntir rə, wù nèn kùr kimbèʼbìy kfə́, e kòʼ, a dù e wun laʼ aáwuné ntèʼ. Wù dù, e sìysì vinyo vee wun lav, e nèn kèsìn. Á dzəə̀mè wun fo vé‑eè dzəəmè wír veé kfəə.

²⁴ Davir túm ndzə́v bey, e dù, e mèé e Mahanayim, é bo Absalom wùn à wír veé Israyi wiy, e lìysín ndzə́v yee Jordan.

²⁵ Yì‑iì dzə̀ é ghan sin, a Absalom shóʼ ne Amasa ji mfòómé və, wù lí kirə́ʼ ké Joav wo wù‑uù gòʼòn wùn Davir. Amasa və̀n‑eè dzə̀ wan Itra wo yì‑iì dzəə̀n wir Ishmael. Yè wov wáa dzə Abigail woo wan Nahash, bo Nahash wáa dzə fər Tsəruyia woo yìy à Joav.

²⁶ Absalom wùn à wír veé Israyi líysín ndzə́v bey, e dù, e tàm kiláʼáy kév é nsay Gilead.

²⁷ Mo Davir meen é Mahanayim, e nèn tàrnín wùn Shobi woo wan Nahash, Nahash wo wù‑uù loòn fó mvə̀mlaʼ yee Rabba e Ammon. Wù kfən tàrnín sa wùn Makir woo wan Ammiel woó Lo‑Debar, à Barsilay woó Rogelim e Gilead.

²⁸ Áwune fó gham si wùn à vighín ví, à kíŋ sí. Á kfən fò sá sáŋ yee *wit wùn à yee *barlìi, à meŋkfəŋ mè, à kimbùr ki, à kfəə́ se kun si,

²⁹ à vilu vi, e bóo lì sa anjiì wùn à vín nyàm yeé mendzə̀ví, à ye wuríné. Vé‑eè fó vifá vìn bèy, ji Davir wùn à wír vəə́ wàá yí, bìʼ fo vé‑eè kiìn ji áwune ghàn á ne e woʼ, e dòrkír, jìŋ wáa yar, kilòŋ kí kfə́n a yum a áwune.