2 Samuel 15 - ŊWÀʼ NYÙY

Absalom táŋ vifon

¹ Ghán sí lòo dù, Absalom tàʼ kár wùn à nyám se sí wáa sə̀ŋ wun si, à wíri mtàn ve á wáa leʼ fo mbìy wo.

² Wù lo, wù wàa nànèn e yuv kijàvndzə, a tiy e shùu kày woó ŋkàlaʼ. Wìr lóo ker kinyo kée dù, e yen Fòn Davir sho ji wù tínén, wù kù shaà a dzə̀ fó fo. Wìr lóo shaà, Absalom kwàr wun, e dzə̀r e wun jii, «À wìy fo feé?» Wìr binèr ji wìr lìm və wìy a fo ntèʼ fen, kìn fó ntèʼ fésə e Isray,

³ Absalom nèn sùúy e ŋgaàŋ jii, «Leéy, e yèn, kinyo ke à wiy sho ki bòŋ, a kí dzə̀ tìítiy. Yii bèy, a bó wìr wo fòn lèmèn wo dzə̀ wù yuùrí kinyo ké yòʼ dzə̀.

⁴ Wù lo, wù kfə̀n a suúy jii, ‹Á kì yèe fóo lèm a dzə̀ mo ji m wáa tinén nsaʼ si é wòŋàn, bo a wìr wìy e nsaʼ, e yèn mo shó, m kù tìnén kijuŋ, e fò e wun.› »

⁵ Wìr‑iì wiy, tsə́m ndzəə́, láʼ kitú fo nsay e Absalom si, wù ràmsì kiwó kfə́, e nàn ŋgaàŋ, e baàmé.

⁶ Absalom ku nèn a yiì bèy, e wír veé Israyi adzə̀m ve vé‑eè wiy ji fòn wáa tinén nsaʼ sév. Wù yiì bèy, e nèn sə̀ŋrì wír veé Isray e wun wùn.

⁷ Viyá vi shaà vikweè, Absalom bùn Fòn Davir, e sùúy jii, «Nyàr, á ku màʼtì a, é wun du é Hebron, e yiì a kinyo ke wun‑eè kàʼàn Nyùy Tàr shó.

⁸ Wun‑eè kàʼ, a wun dzə̀ á e Geshur e Siiria ji a Nyùy Tàr lòo dzə, e siìr a wun e bàm é Jerusalem, é wun du, e cù a wun woo Nyùy Tàr é Hebron.»

⁹ Fòn biímé, e sùúy jii, «Ghán kijuŋ mbà.» Absalom ku nèn ŋàʼáy, a dù e Hebron,

¹⁰ a wù tsə́nsí ne vé ntume é ram seé Isray sidzə̀m ji á du, e fìʼtì a ji wíri yií yú, aá tóŋ sóŋ, á wàa waamé a jii, «Absalom sì fon e Hebron.»

¹¹ A Absalom kì lòo lò fo Jerusalem bèy, e lì vilum ghii baà, a bó á yòʼ kì ji wù kì táŋ a vifon.

¹² Wù dù, e lòo yiì cu, e tùm wír e Gilo, wù dù, e wìy e Ahitofel wo yì‑iì dzəə̀n taà ntoʼ Davir. Menàŋ me Absalom mè nèn kù a kuy kuyín, ŋgoo rə wáa kùʼ kùʼùn.

Fòn Davir fəə́ nsàm

¹³ Shinyáv shí nèn lò, e wìy, e yèn Fòn Davir, e sùúy sho jii, «Melív me wìr veé Isray mè sí tíy a dzə̀ e Absalom wùn.»

¹⁴ Davir nèn sùúy aàtǎr ntoʼ və́ ve wùn áwune‑eè dzəə̀n é Jerusalem adzə̀me jii, «Vèn nanen, é vèsən wáa leʼ, bánlà bey, bo wìr yòʼ yíi bòy fo Absalom wo. Vèsən wáa shwir, fo wù táv tìnér vèsən, e wìy e ŋgeʼ si e vèsə́n vitu, e tòn ŋkàlaʼ rə̀n, e yùyrí wir dzə̀m.»

¹⁵ Atǎr ntoʼo biímé jii, «Nyàr, vèr dzə̀ á kibáʼtín fó yiì a kinyo kidzə̀m ke taàtá wor woo fon yenen ji kí dzə̀ á tìítiy.»

¹⁶ Á bèy, fòn nèn lò wùn à wír vəə́ adzə̀m, ku mày vikìy və́ ve ceméné e ghvə̀m ve wù‑uù màʼtìn ji á siíy, a leéy a ntoʼ.

¹⁷ Fòn‑eè ŋàʼáy, wìr dzə̀m ŋáʼáy sá e wun bàm. Á dù, e tìím fo lav ye yì‑iì jòʼsìn bám é ŋkàlaʼ foo fèy‑iì dzəə̀n.

¹⁸ Wír fòn adzə̀me nèn a lev, a shaà e fòn si. A vé rər ve vé‑eè shiy fone shaa sa, a dzə̀ wír veé Keret wùn à veé Peleti, e bóo lì wír vee ghií ntuùfú ve vé‑eè loòn fó Gat.

¹⁹ Fòn nèn sùúy e Ittay woo wír woó Gat jii, «À yòʼ kér fó shem e věr ŋgoo. Á kfən e bàm é Jerusalem, e dù a dzə vèn fòn wo fíy. À dzə̀ kiŋgwìy fèn, a wò‑oò lèʼ fo věn wòŋ.

²⁰ Vèn kù‑uu wiy fen, a dzə̀ é yooné yooné. A dzə̀ m biìmé ji vèn á ghan, a jan janén vèsən, a bó m yòʼ kì fo m du à? Lì wír vée, é vèn áwune wáa kfən e bàm. Nyùy Tàr kú a sham ven, a dìn ven koŋ rə́ ye ruú.»

²¹ Yii bèy, Ittay bìnèr jii, «Mo Nyùy Tàr dzəə̀n shó, a fòn woo taàtá wom kfə̀n dzə̀ sá sho, a fə̀m dzə̀ kpú, a fə̀m dzə̀ luŋ, bo m kù dzə̀ vèr fòn woo taàtá wom.»

²² Fòn Davir nèn sùúy e Ittay jii, «Vèn shaa ri, é vèsən wáa dù.» Ittay wùn à wír və́ adzə̀me, à wóné nèn shaà, a dù.

²³ Wír veé Jerusaleme yén mo Fòn Davir wùn à wír vəə́ shaa, e nèn a toŋnín kitávín. Fòn Davir wùn à wír vəə́ nèn lìysín Kiwoóy ké Kidron, a dù e dzəə yeé woʼ.

²⁴ Á wáa shaà bèy, a Tsadok wùn Abiyatar vee atàá cùu dzə̀ sá e ŋgoo, bóo lì vilum veé ram Levi, aá béʼ ŋkùv mensàŋ Nyùy. Áwune wìy, e tìír ŋkùv mensàŋ fo nsay, e làa yòʼ dzə́ə kùm, e dù, e meé mo wìr dzə̀m‑eè fəən ŋkàlaʼ.

²⁵ Fòn nèn sùúy e Tsadok jii, «Vèn li ŋkùv mensàŋ, e kfə̀n shó e ŋkàlaʼ. A m fen ghèén fo Nyùy Tàr, bo wù kù wíy lì mo, e kfən sho e bàm é Jerusalem, é m kfən yèn ŋkùv mensàŋ, à kirə́ʼ ke wù dzəə̀n shó ki.

²⁶ Yii bèy, a m dzə̀ làa yòʼ gheén fo Nyùy Tàr, bo m və̀ne, bo a dzə̀ wù kù lòvtí e mò mo wù yenen.»

²⁷ Fòn kfən sùúy e Tsadok woo taà cù jii, «Kí à yén mo vinyo vi dzəə̀n. Vèn à Abiyatar ku lì wón vén vee abaà vee Ahimaas woo wan wò wùn Jonatan woo wan Abiyatar, é vèn áwune kfə́n é bàm é ŋkàlaʼ, e dù a dzə fo nyaáŋ.

²⁸ M yíi dù, e dzə̀ʼtì e shùu tuumé wo wú líysin e woʼ, a shìy mo vèn‑éè tsə́nsí ntum fo mǒ wùn.»

²⁹ Tsadok wùn Abiyatar nèn kù bèʼèy ŋkùv mensàŋ Nyùy, a kfən sho e Jerusalem. Á dù, e nèn a dzə fo.

³⁰ Fòn Davir wáa lò kfə́, a koʼ e Gwan Vicì vé Oliv. A wù kóʼ e tóŋe shuù, e wuú nsay, a wù sə́tí ne kitú kfə́. Wìr dzə̀m wo wùn áwune‑eè dzəə̀n wáa koʼ sa e tóŋé shuù, e kitú ki kisə́tín.

³¹ Wìr nèn lò, e yòŋ e Fòn Davir ji Ahitofel shèm á ne ŋgoo ye bi wùn Absalom. Fòn nèn a bùnrì jii, «Éè Nyùy Tàr, ku yiì, é ntir se Ahitofel si kfə́n ji sé kiyuŋ.»

³² Fòn Davir kóʼ, e mèé e kitu ke gwan fo vé‑eè lo, á wàa cù Nyùy, Hushay woo wír woó Arek wìy ji wun yén á wun. A wù wiy e kibvər kí kitu, a ndzə̀y sí dzə̀ sisaasìn.

³³ Fòn Davir suúy e wun jii, «A vèsən lò a ghan, bo à yíi a dzə kinjivìrkwaʼ e věr bàm.

³⁴ Yii bèy, aà kfə̀n é bàm é mvə̀mlaʼ, e dù, e nə̀ə́ Absalom ji à taʼ a lìm fo wun mo wò‑oò lim fo tàr wov, áà nèn yiì a sə mo, a bvəə́r antaŋ Ahitofel.

³⁵ Atàá cù vee Tsadok wùn Abiyatari kù yíi a dzə vèn áwune fó. Aà lòo dzə, e yù kinyo keé ntoʼ, a fə̀m dzə̀ kiné kí, à sùúy aáwune vee atàá cù.

³⁶ Wón vév vee abàá dzə̀ wùn áwune, aá dzə̀ jii, Ahimaas woo wan Tsadok wùn Jonatan woo wan Abiyatar. A dzə̀ à kù tùm áwune, á wìy, e yèn mo e vinyo vidzə̀m ve à yuun ví.»

³⁷ Á bèy, Hushay woo ŋkar Fòn Davir ku nèn a kfən e ŋkàlaʼ Jerusalem, a meé fo, a Absalom kù dzəə́ nəə nə̀ə́n.