2 Samuel 13 - ŊWÀʼ NYÙY

Amnon wùn Tamar

¹ Wàn Davir woo Absalom‑eè kér fə́r woo wiíy wùmòʼ, a wù bóŋ féyì, a yír rəə́ dzə̀ Tamar. Amnon wo kù‑uù dzəə̀n sá wan Davir nèn wìy lò, a kòŋ Tamar.

² Amnon‑eè keèrí shií e fər və woo Tamar və̀n e ŋàŋ, e nèn lò a jòy sho jòyìn, a kí yòʼ‑oò dzə̀ fó tèr fo Amnon kiíy wun. Á yòʼ‑oò biíme ji wù wáa ghan, bìʼ fo wù‑uù dzə̀ə́ e fur.

³ Amnon wáa kér ŋkar rə yìmòʼ, aá yoŋ ji Jonadav, a dzə̀ taà kimbayìr, a dzə̀ wan Shime‑Aa woo fər Davir.

⁴ Wù nèn lò, e dzə̀r e Amnon jii, «Kòóy ka ke à rə́si dzə́ mendzən mendzən bèn, wò, aà dzə̀ wan ntoʼ? Ku sùúy o mo kinyo ke kí jívir wò.» Amnon nèn yòŋ jii, «M kér shií e Tamar wo dzəə̀n jemèr Absalom woo wan tàr wor.»

⁵ Jonadav suúy e wun jii, «Dù mbà, e neèm e kikun, a boʼ yàsí. Tàr won yií wiy ji wun leey a wò, à sùúy e wun ji kii wun, wù ku sùúy a, é jèmèr yè yee Tamar wiy, e fèr a vifá ve yi, áà wàá yí. À taʼ a ji wù wiy, a fèr a vifá ve yi, aà waà yéné. Wù fer, maysì, é wù yiír á wò sho e kiwó kfə́ kí.»

⁶ Á bèy, Amnon nèn dù, e neèm, a boʼ yàsí. Fòn Davir yiì wìy ji wun leey a Amnon, Amnon suúy e wun jii, «Á wàá ku màʼtì jemèr yem yee Tamar, é yì wiy, e tòvtí a shibanèn fèn, a m yéné, e yìír a mo shó.»

⁷ Fòn Davir nèn tòóy Tamar ji wù du á e fər və Amnon lav, e fèr a vifá ve yi, é wù yí.

⁸ Tamar nèn kù dù e fər və Amnon lav fo wù‑uù néŋé, e lì shiŋkfəŋ, e tòvtí e ntuʼ si, e tòn, a Amnon néŋ leeyì.

⁹ Sí bíy, wù fəə́r fó kikaŋ, a fo sho. Wù tén, e nèn kàn ji wìr dzə̀m fəə́ á e ndzə. Wìr dzə̀m nèn fəə̀.

¹⁰ Amnon suúy e Tamar jii, «Nəə́ e vifá ve yi vìy vi é mvə̀m lav, a yiír mo shó.» Tamar nèn lì vifá ve yi ve wù kì fèrìn viy, a nəə́ sho e mvə̀m lav ji wun fó á e fər və Amnon.

¹¹ Wù kóʼtí e wun mentsə̀m ji wun sí fó a vifá ve yi sho, wù bám kóy fər və woo wiíy və̀n, e sùúy sho jii, «Shaà é wòsò neem.»

¹² Wù bìnèr jii, «Àáyǎ fər wòm, lá à yòʼ kàn mo é wòsò yii kinyo ke á yòʼ yii yii e nsay Isray. Dzə̀ kinyo ke joònè kí.

¹³ A kí kòóy bèy, bo m yíi a fəəsín e wírí si e le? Wówò, bo à sì kifá ke wír veé Israyi yíi a jàʼ jàʼàn. Kii wò, m lón wò ji à ku bùn a tàr wòsən, é wù fó mo ji wiiy wò. Yòʼ dzə̀ féyì wù yiì tèn.»

¹⁴ Yii bèy, la Amnon yòʼ a yuurí kinyo ke Tamar suuyì. Mo wù‑uù tavin, e shaà Tamar, wù nèn bàm, e neèm sho.

¹⁵ Amnon nèn lò, e kèʼ, a bàn Tamar e ŋàáŋàŋ, a ban ye wù ban wune shaa koŋ ye wù‑uù koŋ fo mbìy. Wù nèn sùúy sho jii, «Shaà fəə̀ fó lav fèn.»

¹⁶ Tamar suúy e wun jii, «Àáyà, fəə́r ye à fəər mo rə́ne kfə̀n bìr féyì, e shaà kinyo ke à yiìn ne e mò.» Yii bèy, la Amnon yòʼ yuùrí kinyo ke Tamar suuyì.

¹⁷ Wù nèn jàŋ wánlè lìm və, e sùúy sho jii, «Tsə́nsí wiíy və̀n e ndzə, e sə̀tí shúu lavi.»

¹⁸ Wù nèn wìy, e tsə̀nsí Tamar e ndzə, e sə̀tí shúu lav, a Tamar máʼ ndzə̀y seé kilùm se wón ntoʼ ve á dzə̀ə́ afuri yii maʼà.

¹⁹ Wù nèn saàsì ndzə̀y seé kilùm se wù‑uù màʼàn, e yòʼ kibvə́ e kitu, e neèr wó e kitu, a dù a toŋ kitávín.

²⁰ Fər və Absalom yén wun, e dzə̀r jii, «Amnon kì ghàtí wò à? Fə̀r, sə́sín. Lá kinyo kee shoon ki yòʼ a nyar wò e ŋàŋ. Lá à yòʼ yiì, é kí tó e wìr kitùʼùr, bìʼ fo Amnon dzəə̀n wan tàr won.» Á bèy, Tamar nèn kù a dzə e Absalom lav ŋgeʼ ŋgeʼ.

²¹ Fòn Davir lò, e yù kinyo ke kí kooyin kin, kí nyár wun e ŋàŋén.

²² Absalom kú a bàn kfə́ Amnon bánen, a səmnín wun, bìʼ fo Amnon‑eè ghatin jemèr rə yee Tamar.

Absalom yúyrí Amnon

²³ Viyá vi shaà vibaà, Absalom kàʼ wuy njiì ye koméné é Baal‑Hasor, e ŋguùŋè nsay Efrayim, e bì wón ntoʼ vee vilum adzə̀m ji áwune wiy á fo.

²⁴ Absalom dù, e bùn fon ji wun kóm a wuy njiì, a wun kì lón a ji Fòn wùn aàtǎr ntoʼ vəə́ yiì a dzə a fo.

²⁵ Fòn sháʼnín jii, «Àáyǎ wan wòm. A vèr dù wír adzə̀m, bo yíi a dzə kibeʼèy e wò wùn.» Yii bèy, Absalom kú a far ji fòn wàá ku wìy. Fòn sháʼnín, e sùúy jii, «Vèn du, e tàvsín kijuŋ.»

²⁶ Absalom bùn fon jii, «Nyàr, a dzə̀, a fòn yòʼ du, fòn kù màʼtì a rì fə́r wom Amnon, é vèr áwune du.» Fòn bìnèr jii, «M yoʼ yèn shií wo Amnon du vèn wun.»

²⁷ Absalom kú a far fon, e dù, e mèé mo wù‑uù biimen ji Amnon du, é wón ntoʼo du sáa adzə̀m. Absalom dù, e bàʼtí ŋkàʼ, a dzə̀ wó afòn,

²⁸ e tìr və́ vé lìme jii, «Amnon yií nó meluʼ, mè lóo kar e si wo, m yoŋ ji vèn wàá yúyrí, lá vèn yòʼ a fàn. Vèn kùr shilív, e yùyrí kàŋ mòʼón, bìʼ fo suuyin mo.»

²⁹ Á bèy, wír Absalome nèn kù yùyrí Amnon mo Absalom kì suuyin, wón ntoʼ adzə̀me kóʼ nyám sév, a leʼkír.

³⁰ Wáa dzə, aáwune dzə̀ə́ e dzəə, Fòn Davir yú ji Absalom yùyrí a ne wón ntoʼ adzə̀m, la wo mòʼón yòʼ waà bèr.

³¹ Wù túm é yuv, e saàsì ndzə̀y fó wùn, e gbù fo nsay. Atǎr ntoʼ ve vé‑eè tíy e wun ghaŋe sàtì sa sév see ndzə̀y.

³² Jonadav woo wan Shime‑Aa woo fər Davir yòŋ jii, «Nyàr káʼ, lá á yòʼ a kwàʼtì a ji á yùyrí a wón ntoʼ adzə̀m. Kù mày a Amnon wo á yuyrin. A Absalom‑eè wày á ne kinyo kìn wáyín, e kèʼ fo kishiíy ke Amnon‑eè ghatin á fə́r və woo Tamar.

³³ Nyàr, lá tàr wor yòʼ biìmé a sáʼka woo ji á yùyrí a ne wón ntoʼ adzə̀m. Kù mày a Amnon wo á yuyrin.»

³⁴ Vé‑eè yoŋ bèy, a Absalom léʼ ne. Wìr wo wù‑uù tíy ŋkiy wùmòʼ lòo màʼ sí, e yèn, a wíri sə́y agháʼán e wǔn gwan fo dzəə ye yì wiy fo Horonayim. Wù yén bey, e nèn dù, e bùn fon sho.

³⁵ Jonadav bùn sa fon ji wón ntoʼo waà sí wiyì, mo wun kì yoŋ a bèy.

³⁶ Kù mo wù maysì súŋninè, wón ntoʼo nèn nə̀ə́ rú, e kèʼ tóŋ. Fòn wùn aàtǎr ntoʼ və́ adzə̀me wáa toŋ sa, a toŋ e ŋàŋ.

³⁷ Absalom‑eè lèʼ bey, e dù fo Talmay woo wan Ammihud wùn, wo yì‑iì dzəə̀n fon woó Geshur. Davir kú a dìy kfə́ kpú wan və Amnon kishiíy kidzə̀m.

³⁸ Absalom léʼ, e dù e Geshur bèy, e dzə̀ʼə̀m fo viyá vitaár.

³⁹ Fòn‑eè dìy kpú Amnon, yí mày, shilív sə́ shí rə̀sìn, wù nèn a yar jiŋ Absalom.