2 Samuel 11 - ŊWÀʼ NYÙY

Fòn Davir wùn Batsheba

¹ Wìy lòo dzə e sáné, a dzə̀ ghán se afone‑eè lo, fəə́ rə́r, Davir tsə́nsí Joav wùn à vitú ve vé rə́rí, à vé rər veé Israyi adzə̀m. Á dù, e tòn wír veé Ammon e shùu rər, e nèn gìm ŋkàlaʼ yev yee Rabba. Vé‑eè fəə́ rə́r bey, Davir kitú kfə́ lò, e gòʼ e Jerusalem.

² Wáa dzə e ŋkuùr wùmòʼ, Fòn Davir ŋáʼáy fo wù‑uù meemè, e kòʼ, a ghan e kikfəv ke lav. Wù lòo màʼ sí, e yèn wiíy wùmòʼ, a wù su wún, a wù bóŋ é ŋàŋ.

³ Wù nèn tùm wánlè nsheèlav ji wù du, e tàr o a ji sà dzə̀ la á? Wìr və̀y dù, e tàr, e kfə̀n é bàm, e bùn fon, e sùúy sho jii, «Nyàr, dzə̀ á Batsheba woo wan Eliam, a dzə̀ á wiiy Uria, Uria woo wír woó Hit.»

⁴ Fòn Davir nèn tùm wónlě nsheèlav ámóʼó, ji á toóy á wun. Wù wìy wùn wun shiíy, a wù ku màysì ghán sə́ seé ŋwee máysin. Wiíy və̀y nèn kfə̀n é bàm e wun laʼ.

⁵ Ghán sí lòo dù, wù nèn yèn ji wun sì á e bvə́me, e nèn tsə̀nsí ntum e Fòn Davir ji wun sì á e bvə́me.

⁶ Davir tsə́nsí toóy fo Joav wùn ji wù tsə́nsí á Uria woo wír woó Hit é wù wiy, e yèn á wun. Joav ku nèn tsə̀nsí.

⁷ Uria wìy, Fòn Davir dzə́r e wun ji Joav sà dzə̀ kitávín á? Rə́r sí sà maʼ e le á? Vé rərí sà dzə̀ é le á?

⁸ Fòn Davir dzə́tí bey, e nèn sùúy e Uria jii, «Sə́y e wò laʼ, e meèmè.» Uria fəə́ fó ntoʼ, fòn siíy, e tsə̀nsí vifá ve yi e wun laʼ,

⁹ a bó Uria yòʼ‑oò lo fəə̀ bey, e sə̀y e wun laʼ. Wù‑uù shìíy a dzə̀ é shùu kibùʼ wùn à nsheèlav si.

¹⁰ Fòn Davir yú ji Uria yoʼ sə̀y á e wun laʼ, e nèn tòóy wun, e dzə̀r jii, «À kfə̀n é bàm, aà dzə́ʼə́m ne e ndzə ntàmda bèn, e làa yòʼ dù e laʼ ji ka?»

¹¹ Uria bìnèr jii, «Mo wír veé Juda wùn à veé Israyi dzəə̀n é kwaʼ rər, a ŋkùv mensàŋ dzə̀ fó wùn áwune, a tàá mfòómé woo Joav wùn à nsheèlav se fòn si shiiy sa e kwaʼ, bo a dzə̀ m ghàn kém é le, e bóo dù e mǒ laʼ, a yikír, a no, e kfə̀n shiíy vèr wiiy wom. Rúrú, mo Tàr wor woo fon dzəə̀n shó, bo yòʼ dzə̀ mo, m mùm kfə́ə kinyò kee bey.»

¹² Fòn Davir nèn sùúy e wun jii, «Gòʼ ri fèn, é m bvəə́shí, e tsə̀nsí wò e bàm kibvəə́shí.» Uria nèn shìíy e Jerusalem, e kfə̀n bvəə̀shí, e shìíy.

¹³ Fòn Davir‑iì tòóy wun, wù wìy e ntoʼ wùn wun yíkír, e nònín, wù yiì, meluʼ mè koó Uria. Uria yiì fəə̀ e ŋkuùr, e làa yòʼ fə̀m dù e wun laʼ. Wù kfə̀n‑eè shìíy a dzə̀ é shùu kibùʼ wùn à nsheèlav si.

¹⁴ Ndzə bvəə́shi e jàv, Fòn Davir sáŋ ŋwàʼ, e tùm Uria sho fo Joav wùn.

¹⁵ Wù‑uù sàŋ jii, «Tsə́nsí Uria e mbìv ye rə́r sí tavin shó. Sí lóo màʼ, vèn à vé rər ámóʼó rə̀ʼ wún é bàm, aá fiʼ yùyrí wun.»

¹⁶ Mo Joav kì gìmèn ne ŋkàlaʼ, wù nèn lèéy mbìv ye aŋgàa vibàn ve tavkíné dzəə̀n shó, e tsə̀nsí Uria fo.

¹⁷ Vé rər vee fóo fəə́, e tàm wùn à wír Joavi, e yùyrí vé rə́r Fòn Davir ámóʼó, à Uria sho.

¹⁸ Joav nèn tùm wír ji wù du á, e naàrì e Fòn Davir kinyo kidzə̀m ke kí kì kooyin é shùu rər.

¹⁹ Wù lòo tum, e yòŋ jii, «Aà yiì naàrì rə́r e fòn, e màysì,

²⁰ wù lo a shwiíy kilòŋ, a saʼ ji sà kì yiì ka, bo vèn wáa fùnèn, a meʼ ŋkàlaʼ a? Bó vèn sà yòʼ kì kì ji a dzə̀ á tè ven e mvəne fó kày a?

²¹ Bó vèn yòʼ sà dzəə́ kuúme mo vé‑eè yuyrin Abimelek woo wan Gidiyon a? Yì‑iì dzə̀ á e Tebets fo wiíy‑iì màʼàn tíy kiban fo kitu ke kày, yí yúyrí wun. Sà kì yiì ka bo vèn kóʼtí é ghaa kày a? A fòn lòo dzə a saʼ bèy, à sùúy e wun jii, ‹Á kì yùyrí sáa ŋgaà lìm və Uria woo wir Hit.› »

²² Ŋgaà ntum və̀y nèn kù dù, e tiìsí ntum ye Joav kì tumen wun sho rə̀y e Fòn Davir.

²³ Wù‑uù tiìsí jii, «Wír vee fóo kì tàv, e ghàʼ ver, e fəə̀ fó kày, vèr áwune tám fó ndzə, vèr siír áwune é shùu kày.

²⁴ Á bèy, vé mvə̀ne wáa màʼ ver e mvəne fó kày, e màʼ bèy, e nèn yùyrí a vé rə́r fòn ámóʼó, e kfə̀n yùyrí saa ŋgaà lìm və woo Uria.»

²⁵ Fòn Davir suúy e ŋgaà ntum və̀y ji wù ku dù, e tàvír a Joav ji lá wù yòʼ à wèʼ. Wù kiíy á jii, «Á yii lóo màʼ rə́r, la á yòʼ a kiíy a ŋgaà kpu. Wù kfən fùnèn a kitávín, e tòn a ŋkàlaʼ yee shooy.»

²⁶ Wiiy Uria lò, e yù ji á yùyrí a ne lúm və, e nèn a dìy kpú rə́.

²⁷ Á dìy kpú, e màysì, Davir nèn sùúy, á lì Batsheba, e wìy sho e ntoʼ ji wiiy ntoʼ, wùn wun dzəə́ wán lumèn. Yii bèy, kinyo ke Fòn Davir‑iì yiìn kin ki‑iì nyàr Nyùy Tàr é ŋàŋ.