2 Samuel 10 - ŊWÀʼ NYÙY

Davir tón wír veé Ammon wùn à veé Siiriàa

¹ Ghán sí lòo koʼtí, fòn wìr veé Ammon lày, á nèn kòʼór wán və woo Hanun ji fon.

² Fòn Davir nèn lò, e sùúy ji bòŋ é wun din á koŋ e Hanun réŋréŋ mo Nahash woo tàr à Hanun‑eè dìnèn e wun. Wù nèn tsə̀nsí wír ji á du, e shàm á Hanun bìʼ kpú tàr wov. Áwune dù, e mèé fo, e fìʼtì.

³ Atǎr ntoʼ veé Ammone nèn dù, e bùn Fòn Hanun jii, «Fòn sà kwaʼtì ji Davir tsə̀nsí wír vìn ji á wiy, e shàm fon bèn ji wù‑uù koŋ tàr à fòn a? Nyàr, bó á yòʼ sà kì ji wù tsə̀nsí wír vìn ji á wiy, e nə̀ə́ e ŋkàlaʼ, e kìy, e fíʼ yìi tòn a?»

⁴ Fòn Hanun nèn koò áwune, e sheèsì vighev vév mbìv mòʼón mòʼón, e tiìné vikúm vév fó ntuʼ se kinyè, e jùm.

⁵ Á lòo dù, e nèn a woomé fóo kfən e bàm fó laʼ. Davir yú kinyo ke kí kooyin, e tsə̀nsí ntum fo áwuné wùn ji á goʼ á e Jeriko, e dzə̀ʼə̀m a fo, é vighev vév ví wàá kwiíy, é bo á wáa wìy.

⁶ Wír veé Ammone ló, e yèn ji ké wùn à Davir ki fòy ne a fòyìn, á nèn dù, e yùn vé rərí fó Siiria. Á fó áwune vé rərí nsə̀kì mbaà, aá fəə́ fó Bet‑Rehov wùn à fó Tsoba. Ámóʼó vee wíri kfən fəə̀ fó Tov nsə̀kì nshòv sibaà e ghvə̀m. Fòn woó Maaka wìy sa wùn à wíri nsə̀kì.

⁷ Davir yú kinyo kìn, e tsə̀nsí Joav wùn à vé rər vəə́ fó adzə̀m.

⁸ Wír veé Ammone fəə́, e tìír shúu rər é dzəə ye yì nəə aáwuné ŋkàlaʼ ye kuʼùn. Wír veé Siiriàa nèn sàŋrí kév é mvə̀m wòŋ, a dzə̀ vee lò fó Tsoba, Rehov, Tov wùn à Maaka.

⁹ Joav lòo sìn, a rə́r sí gím ne wun, à fó mbìy, à fó bàm, wù nèn shòʼtí vé rər veé Isray ve tavkíné, e tìír áwune, á wáa kìʼ wír veé Siiria,

¹⁰ e nèn lì kibér ke wìr və́, e wày e Abishay woo fə́r və́ kiwo, e tìír, á wáa kìʼ wír veé Ammon.

¹¹ Wù nèn sùúy e Abishay jii, «Aà yèn, a wír veé Siiriàa sí gháʼ mo, à wìy, e tòm mo. A m yèn, a wír veé Ammone sí gháʼ sa wò, é m wiy, e tòm wò.

¹² Kúr shilív shí, e tìím kitávín, é vèsən funen bìʼ wír vesən. Á ku fùnèn bìʼ ŋkà se laʼ se Nyùy wo wù kér vèsən, é wun woo Nyùy Tàr yii á kinyo ke kiìn wun.»

¹³ Joav wùn à wír vəə́ nèn a woóy wír veé Siiria ji rə́r sí wàá tsə́ŋén. Sí tsə́ŋén, veé Siiriàa tókír é kòv.

¹⁴ Wír veé Ammon ve vé‑eè kiʼ Abishayi yén ji wír veé Siiriàa tò á ne e kòv, e nèn a leʼ sa, a kfən e ŋkàlaʼ. Joav màysì, e fùnèn wír veé Ammon, e nèn kfə̀n é bàm é Jerusalem.

¹⁵ Á lò, e yù é Siiria ji wír veé Israyi ghàʼ á ne wír vév, e nèn a baʼtí vé rər ámóʼó.

¹⁶ Fòn Hadadeser toóy wír veé Siiria ve vé‑eè dzə́ e ndzə̀n ndzə̀v yee Yufret. Shobak woo mfòóme Fòn Hadadeser woó Tsoba nèn bàʼtí áwune, e wìy sho e Helam.

¹⁷ Davir yú ji á kinyo ke kí waà dzəə̀n, e nèn bàʼtí vé rər veé Isray, e lìysín ndzə́v yee Jordan, e ghàn, dù mèé e Helam fo wír veé Siiriàa‑aà baʼtin, a taamé wír veé Isray, vindzəʼ vi tsə́ŋén,

¹⁸ e nèn ghàʼ veé Siiria, á tó é kòv. Davir wùn à wír vəə́ yúyrí wír veé Siiria veé *vitentén vé rər wír ghií saàmbà, e yùyrí veé kitu ke nyàm se ŋkoʼ wír nsə̀kì mkweè, á kfən lèmér Shobak woo mfòómé wov rə̀r, wù kpú é shùu rər.

¹⁹ Afon ve vé‑eè fó nshwì e Hadadeseri yú ji wír veé Israyi tòn a ne wír veé Siiria, e nèn gbù wír veé Isray, a fo nshwì aáwune. Á bèy, wír veé Siiriàa nèn a fàn fóo kfə̀n a tom wír veé Ammon.