2 Pita 1 - ŊWÀʼ NYÙY

¹ Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

² M nén a lon jii, vèn kú a kiíy a Nyùy wùn Tàr wòsən Jesus Kristu, a dù duùn fó mbìy, aá maysi, a leéy fo vèn, a yiì, é melív men mè wáa dzə nyaáŋ.

Wír Nyùyi wáa yiì vinyo ve Nyùy liìn áwune shó

³ Dzə̀ Taàtá wòsən və̀n wo wù‑uù yiìn, é bo vèsən kiíy Nyùy wo wù‑uù liìn vèsən ji wír və́, aá fiʼ nə̀ə́ e wùn mvə̀m vijùŋ, a ker liì a dzə̀ və́ə. Mo vèsən kiiyin ne wun, wù nen fò vitaáví və́ ve ghaʼán ví e vèsən, á kiíy mo dzə̀ á wàa tiír kiwuú dzə́ə sidzə̀m, a ghan moo wír və́.

⁴ Á mo Nyùy‑iì ghanen, é bo vèsən nəə́ e wùn mvə̀m vinyò ve wù‑uù kàʼàn wíri shó fo ŋgùʼ, a dzə̀ aŋkàʼmé ve ghaʼtíné ve dzə̀ á sə̀ vèsən féyì. Vèsən nén a dzə lèn, aá bóy ne fo vinyò ve mensə́ me dom wíri, aá buʼtì e ndzə fèn. A vèsən sí yú a dzə̀ fo Nyùy, kér liì a dzə̀ və́ə.

⁵ Kí nén a dzə jii, mo vèn wayin ne shilív e Nyùy wùn, vèn kú a mùm kitávín ji vèn wáa ker liì a dzə̀ wo wù bòŋèn Nyùy, a way vifií ji vèn maysi, e kìíy a wun.

⁶ Wìr kú a yeʼéy mo dzə̀ wù kùʼtí shilív sə́, a tiy kitávín e Nyùy mbìv, a ker liì a dzə̀ wo wìr və́.

⁷ Wìr ku yèʼéy sa mo dzə̀ wù wàa kòŋ fə́r və, e kfə̀n a way wir dzə̀m e shiliv.

⁸ A vèn lò, a yiì vinyo vìn vidzə̀m, a dù duùn fó mbìy, é vèn nèn màysì, e kìíy dzəʼə̀m Taàtá wòsən Jesus Kristu, a wàrkìr, a yiì vinyo a dzə̀ ve ví gheen Nyùy.

⁹ Vèn wáa kiíy jii, a wìr bùŋ vinyo vìn, bo ŋgaàŋ fìr fo Nyùy mbìv, a yen kinyo a dzə̀ keé shùu kiwo, e nèn a làysìn ji dzə̀ á vinyo ve bi ví ve wù‑uù tíy sho fo mbìy, a Nyùy‑iì sù ne vee shooy fo wun wùn.

¹⁰ Afə̀r vem, kí nén a dzə jii, vèn ku mùm feyì ji á wáa yiì a vinyo vìn vidzə̀m, bìʼ fo dzəə̀n vinyo ve Nyùy‑iì shoʼon ven, e lì ji wír və́ ji vèn wáa yiì. A vèn lò, a yiì vinyo vee shoon, la vèn yòʼ dzəə jày dzə́ə gheéy,

¹¹ e nèn gheén feyì e wìr ve á wíy nəə́ e mvə̀m wòŋ wo wíy a saʼ Taàtá wòsən Jesus Kristu wo wù‑uù tinen vèsən fó lòn, aá wáa dzə fo viyá viyá, là may.

Kinyo ke Ŋwàʼ Nyùy ki yòʼ lò fo wìr

¹² M kì ji vèn sí tíy e kinyò ke ru kí féyì, a vèn kì ne vinyo vìn vidzə̀m. Yii bèy, a kém kí dzə̀ ji m kú a ratí ghán sidzə̀m, é vèn wáa kuumé.

¹³ A m yén jii, mo m kù dzəə́ béʼri e nsay fèn, m kú a ratí vinyo vìn, a yìmrì ven shó,

¹⁴ bìʼ fo m kiìn ji vishiíy vém ví kù bèr ne vishàr, é m maʼti wún woó nsay və̀n mo Taàtá wòsən Jesus Kristu‑uù toʼon e mò.

¹⁵ M ku nèn wày féyì jii, a ghán sí fəə̀, m kù ràtí vinyo vee shooy, é vèn fiʼ wìy sìíy, a kuumé, a m dú ne.

¹⁶ A dzə̀ m kù a yìmrì vinyo vìn bèn, bìʼ fo vèr yòʼ‑oò jumrì vinjeenjèm ve vinyò ve bomen wíri, e bó a yeʼéy ven mo vikuʼùy vé Taàtá wòsən Jesus Kristu vi dzəə̀n, a dìn ji wù wíy kfən, a saʼ nsay rə̀n. Vèr‑iì lo yèn vifon və́ vin e sí yérí.

¹⁷ Tàr wov Nyùy‑iì din vikuʼùy və́ vé saʼ, a vèr dzə̀ fó. Vèr yú mo wun wo dzəə̀n Vitú ve Saʼ suuy kùm Jesus jii, «Və̀n dzə̀ Wán wom. M koŋ wun e ŋàŋ. Wù bòŋ mo féyì.»

¹⁸ Yì‑iì dzə̀ vèr à wun woo Jesus e gwan fo Nyùy‑iì súŋnin e ghan see shooy, a vèr yú e vituʼùr vér ví mo jì yee shooy wiy fo yuv.

¹⁹ Mo vèr yenen bey, vèsən nèn màysì, e kìíy mo vinyo ve aŋgàa ntum Nyùyi‑iì fiʼtì vi dzəə̀n. Kí nen bòŋ ji vèn yuúrí vinyo ve áwune‑eè fiʼtì vìn vidzə̀m kijuŋ. Ví dzə̀ moo kikaʼày ke kí kaʼày ven, e meé e ghan se ndzə yíi ran, é Jesus kfə́n moo sàŋ wo wù lo fo tsən, ndzə nèn ràn. Wù kfə́n bèy, é melív men mè nèn yèn rán.

²⁰ Kinyo ke dzə̀ vèn wàa kiíy fo mbìy feyì ki dzə̀ jii, kinyo kímóʼ kí yòʼ dzə̀ shó e Ŋwàʼ Nyùy ke aŋgàa ntum Nyùyi‑iì tiísi, a kí lo a dzə̀ fo wìr kwàʼtì.

²¹ Á yòʼ‑oò ló a tiisí kinyo ke kwaʼ áwune gheéy. Kù‑uù bánri Kiyoy ke Ranén kí áwune, aá tiísi a dzə̀ kinyo ke Nyùy suuyì.