2 Korin 9 - ŊWÀʼ NYÙY

Wìr wáa fo kifá e Nyùy, a ŋwàŋ

¹ M yén ji shií wo m kfən rə̀sí, a naàrì ven mo dzə̀ á wàa sə wír Nyùy ve á yén ŋgeʼ e wòŋ woo Juda yòʼ waà dzə̀.

² Bìʼ fo vèn gharin ne kinyo kee shooy, a dzə̀ kíwun ke m rə́si búri ven fó fo e vintatì veé Masedonia fèn jii, ven veé Akayàa‑aà yiì ne sìysì fo moo lán kiya ji vèn kù wáy a kiwó e kinyò fèn. Shií wo vèn kér və̀n nén a ŋaʼár melív me wìr anín.

³ A m túm afə́r vesən vin lèn bèn ji vèn fiʼ bàʼtí, a shìy mo vèr kù rə́si fer vèr à wíri ji vèn sí báʼti, fo kinyo ke m rə́si tóŋ loŋ sho kìn ki shaa fó ghaŋ.

⁴ Vèn ku bàʼtí kijuŋ, a tàm wàa wìy vèr à wír veé Masedonia ámóʼó. Á wiy, taʼ kinyè ntéŋ, a mò‑oò sí sévti ji m kì féyì ji dzə̀ vèn yiì kinyo, é m wáa woomé. M lóo woomé, é vèn wáa woomé sa.

⁵ Á kinyo ke kí yiìn, bo m shoŋri afə́r vesən vin ji á ku wìy fo mbìy, e bàʼtí fómo wo vèn‑eè kàʼàn və̀n, m wíy lóo wìy, a wù sì é kiwo ji fómo won, fo kí wáa dzə mo á kàn ven kánen.

⁶ Vèn wáa kuumé jii, a wìr wày kifá shishàr, bo wù kù wíy kav shishàr. Wìr wáy kikuʼùn, bo wù wíy kav kikuʼùn.

⁷ Yii bèy, wìr lóo fo, wù wàa fo mo wù wayin fo wùn shiliv. La wù yòʼ a fo, a ŋònkìr, kìn wù fó mo á kàn wun kánen. Vèn wáa kiíy jii, ŋgaà fómo wo Nyùy shéʼri dzə̀ wo wù fó, ŋwaŋè.

⁸ A dzə̀ Nyùy, wù fò ven nyanyày vifa, vèn wàa ker vifá ve vèn kér shií shó vidzə̀m, é ví wáa jamtín jamtín, é vèn wáa ŋwàr, a tomrí vinyo ve juŋ vi shó vidzə̀m,

⁹ réŋréŋ mo vé‑eè saŋen é Ŋwàʼ Nyùy jii: «Ŋgaà fómo kér wó rə́ tèéter fo vé kitàne ghán sidzə̀m. Aá kù wíy a fèr liì və wo juŋ, e dù, e mày.»

¹⁰ Wun woo Nyùy wo wù fó ŋgoòy se vifa e ŋgaà sùm, a sí kúy, kuʼ, a wù kooy vifá ve yi kijuŋ, kù yíi a dzə̀sì sa vén vee vifá, é ví wáa kùʼ, é vèn wáa jàv, a yiì vinyo ve juŋ vi shó, a dù duùn fó mbìy.

¹¹ A dzə̀ mo Nyùy fó ven nyanyày vifa ji vèn wáa ŋwàr, a sə wíri shó, é wíri wáa beèrì wun anín, bìʼ fómo won wo vèr jav aáwune.

¹² A bó lim yén ye juŋ rə̀ne yòʼ wíy yiì cáʼ ji wír Nyùy ve á yén ŋgeʼe koóy vifá ve dzə̀ ví sə̀ áwune, yí kfə̀n wíy yiì, é wíri wáa fo beerì fo Nyùy e ŋàáŋàŋ.

¹³ Aá wíy a beèrì wun, a koʼór yír rə́ ji kinyo ke vèn yii kìn ki din a ji vèn tíy e kinyò ke Jesus Kristu kitávín, yii réŋréŋ á mo kí dzəə̀n, e kfə̀n a beèrì, bìʼ fo vèn sə́ áwune é ŋàŋ, kfə̀n sə́ wír ámóʼó.

¹⁴ Aá kfə̀n wíy way ven é meliv, a bùnrì fo vèn, bìʼ fo á yén ji Nyùy bùʼ ven e shilív she juŋ shi féyì, bo vèn wáa sə wíri bey.

¹⁵ Vèsən ku nèn a beèrì Nyùy fo mbùʼmé wo wù bùʼùn vèsən shó là mfìʼ.