2 Korin 8 - ŊWÀʼ NYÙY

Vintatì ve Kristu vi fónin vifá

¹ Afə̀r vem, m nén a kòŋ fó fèr e vèn lèn mo Nyùy lùmèrìn melív me vintatì veé Masedonia, á wáa yiì.

² Vinyo ve tavkín ví rə́si kooy áwune, yii bèy, aá kù yòʼ shéʼri Nyùy ghán sidzə̀m. Mo áwune fə̀m ghíy ghiyín, á kù kér shií féyì, ŋev vibam vév ji á sə́ á wír ámóʼó shó.

³ Kinyo ke dzə̀ m wàa suúy feyì ki dzə̀ jii, áwune‑eè lo mùm feyì, e fò vifá mo vitaáví vév ví dzəə̀n, e kfə̀n bàŋrìn. Kù‑uù kwàʼtì áwune, e sìysì fómo woo shooy,

⁴ a boòrì ver féyì ji vèr ku fò áwune sá kilíŋ, aá sə́ á wír Nyùy ve á yén ŋgeʼ e wòŋ woo Juda.

⁵ Vèr biímé, la á yòʼ fə̀m a fo a dzə̀ mbàm mo mò‑oò kí. Áwune tómbìy tàtí vitú vév, e fò e Nyùy, e nèn a yuurí a dzə̀ fo vèr ji Nyùy sà suuy ji áwune yée le á?

⁶ Vèr yén kinyo ke áwune mùmèn, e kù nèn bànrí Titur ji wù ku kfə̀n wìy, e lùmèr melív men é kinyò foo fèn, é vèn maysi á lim ye juŋe ye vèn‑eè kèʼèn yee shoon.

⁷ Vèr kì ji vèn rə́si yii a vinyo vidzə̀m kijuŋ feyì. Vèn shaà ne wír ámóʼó, e wày shilív e Nyùy wùn kitávín, a fìʼtì kinyo kfə́ féyì, e kfə̀n a kiíy rú mo ví dzəə̀n. Vèn caʼcàʼ e vinyò feyì, kfə̀n din mo vèn koŋ ver é ŋàŋ. Vèn ku nèn ghàr lim ye juŋ rə̀ne sá bèy, a yiì kijuŋ mo vèn rə́si yii vinyo vidzə̀m.

⁸ A bó m yòʼ suuy bèn ji m fó ven a dzə̀ á nsər yìmòʼ. M fèr ne mo wír vìne kér shií fó kinyò fèn, e fíʼ banrí ven, é vèn din ji vèn koŋ rú wíri, shám áwune.

⁹ Vèn kì sá mo Tàr wòsən Jesus Kristu‑uù shamen vèsən. Vifá vidzə̀m vi dzə̀, a yì‑iì kér wun, wù màʼtì bìʼ vèsən, e wìy e ndzə ji ŋgaà kitàn. A wù‑uù yii bèy, ji vèsən fíʼ nəə́ e Nyùy mvə̀m vikùʼùy.

¹⁰ M nén a tàʼ, e tir ven jii, kí bòŋ a ji vèn ku màysì kinyo ke vèn‑eè kèʼèn moo lán e kiya, lèn. Yì‑iì dzə̀ ven wír mbìyi ve vé‑eè yenen ji á ku wày á kiwó e wír veé Judàá wùn, vèn nèn kèʼ.

¹¹ Vèn ku lì rì kifá ke vèn kér e kiwo, e màysì kinyo kìn sho kijuŋ, é kí gheén réŋréŋ mo vèn‑eè taʼà.

¹² A wìr kòŋ ji wù fó kifá mo wù kérí, Nyùy kù səə̀sí kifá kee shooy. A bó yòʼ dzə̀ wù wàa leéy ji wìr fó kifá ke bó yòʼ dzəə̀n vitaáví və́.

¹³ A bó m yòʼ bánri sa ven ben ji vèn fó kifá, é wír ámóʼó maysi, e kòóy, é vèn kpú kén kitan.

¹⁴ Ke kí dzəə̀n kí dzə̀ jii, mo vèn kér vifá lèn nyanyày, ámóʼó wáa buŋ, a dzə̀ vèn kù sə̀ á áwune shó. Áwune wíy lóo ker, vèn lóo buŋ, aá sə́ sá ven, é vinyo vidzə̀m vi fíʼ a ghanén vimòʼón.

¹⁵ Kí nen shèmsín mo vé‑eè saŋen é Ŋwàʼ Nyùy jii, «Ké wìr wo wù‑uù baʼtin kikuʼùn kí yòʼ‑oò lo kùʼ e shaàsìn, a ké wìr wo wù‑uù baʼtin shishàr ki yòʼ‑oò lo dòrnín.»

Por túm Titur e Korin

¹⁶ M beerì Nyùy feyì mo wù yiìn, shilív shé Titur shi wáa lùm fo vèn ghán sidzə̀m mo shém shí lumè.

¹⁷ Wù nén a wìy lèn, a bó yòʼ dzə̀ cáʼ ji bìʼ fo vèr suuyin ji wù ku wìy. Wù sí kér və́ə woo shií fó wìy, e yen ven mo shilív sə́ shí lum fo vèn.

¹⁸ Vèr nen tùm wùn fər wòsən wùmòʼ, a dzə̀ wír wo vintatì ve wìr Nyùy vidzə̀m vi kiiyin ne virə́ʼ vidzə̀m feyì ji wù ghán, fiʼtì a sáʼka Nyùy wo juŋ.

¹⁹ Vintatì vi nen shòʼ wun ji wíy lì vèr wun fómo və̀n, e dù, e sə a vintatì veé Juda sho, aá wáa burí a dzə̀ Nyùy, e kfə̀n a yen ji ver vee aŋgàa ntume kér saa shií fó sə vé ŋgeʼe.

²⁰ A vèr wun wíy a leéy fo mbàm se vèn fó, warkìr sìn kijuŋ, a yen ji lá shúu yòʼ fəə̀ á sho.

²¹ Vèr wày wáyín féyì ji wìr dzə̀m yén sá mo Nyùy yén ji vèr yii kinyo a là kiloʼ.

²² Vèr nen tùm wùn Titur fo vèn lèn, e kfə̀n bàtír fər wòsən wùmòʼ fó. Dzə̀ wír, a vèr mùm ne wun akàŋ anín, a wù lim kijuŋ feyì. Wù nen màysì, e ghàr kinyo kìn, bìʼ fo wù kiìn féyì ji wun yíi wìy, é vèn yii á kinyo ke ru kí.

²³ Fo ké Titur ki, vèn wáa kiíy ji dzə̀ á ŋgaà wom ŋgoo wo wù sə́ mo, a vèr wun lim fo vèn vee vintatì ve wìr Nyùy. Ké afə́r vesən vee abaà vin ki dzə̀, a tùm vintatì e Titur bàm. Dzə̀ wíri, a lim yéví kóʼor yír Kristu.

²⁴ Wùn áwune wiyì, vèn kù wày áwune e věn shiliv, a dìn, é vintatì vidzə̀m vi wáa yen ji vinyo ve vèr‑iì suuy aáwune, meer yír yén, ví dzə̀ á réŋ.