2 Korin 7 - ŊWÀʼ NYÙY

¹ Ŋkar sem, mo Nyùy kàʼàn vèsən é kinyò fèn, vèsən ku nèn a nyeŋ vinyo ve ví kóʼoy fo Nyùy vidzə̀m, kìn dzə̀ ke wìr kwaʼtì fo wùn shiliv, kìn dzə̀ ke wù yii yiìn. Vèsən ku fò vitú vesən a dzə̀ e Nyùy ŋkuuŋkùŋ, a ghvəm wun, a yu a dzə̀ fó fo.

Wír veé Korine rəər ŋgeʼ se Por woo ŋgaà ntum

² M nen kfə̀n a lon jii, vèn ku kfə̀n wày á ver é shiliv. Vèr yòʼ‑oò lo jày kinyo kímóʼ kí e wìr fo vèn gheéy. A bó vèr yòʼ‑oò lo yiì sa, wìr jáy dzə́ə, aá yòʼ‑oò ló a leèrì wír ji á fiʼ kòóy kifá.

³ A bó m yòʼ suuy kin bèn ji m sáʼ ven á sáʼán. Vèn kù dzəə́ tíy e věr shiliv mo mò‑oò suuyin e vèn, kìn wìr kpù, kìn wù dzə̀ə́ sho, bo vèn kù tíy fo.

⁴ Vifií vém ví kfə̀n tíy e věn wùn féyì, a m nyavnìn feyì bìʼ ven. Vèn rəər shilív shém ghán sidzə̀m. A m fə̀m yén ŋgeʼ e le, m kù a sheʼrí sheʼrín bìʼ ven.

⁵ A kù dzə̀ mo kí‑iì kooyin é ghan se mò‑oò duùn é Masedonia sìy. Ŋgeʼ si‑iì kooy ver fó, mbìv sidzə̀m. Vèr yòʼ‑oò ló a ker meemè gheéy. Vé‑eè tún vinyo vér, kantì ver, a vèr fanè.

⁶ Yii bèy, Nyùy rəə̀r melív mer mo wù kù yii rəər shé wìr wo wù rəm ntéŋ. Wù‑uù yiì, Titur wìy, e kòóy ver fó.

⁷ A bó yòʼ jòʼsì kee shooy, wù‑uù lóo fèr mo vèn keerin wun kijuŋ, shilív shér shí nèn màysì, e rə̀sìn. Wù wáa fèr mo vèn kér sa shií fó yen ver, e kfə̀n fèr mo vèn‑eè yòŋèn ŋwàʼ wóm, kitú ki wáa saʼ ven. Wù kfən fèr mo vèn wayin féyì, a tunér ji m dzə̀ rú á ŋgaà ntum Jesus Kristu. Mo m yuun vinyo vee shooy vidzə̀m, e nèn a sheʼrí ven féyì.

⁸ A ke m shéʼri ki dzə̀ jii, mo mò‑oò saŋen ŋwàʼ woo shooy, e kfə̀n a rə̀m ntéŋ, wú kù yòʼ‑oò lo sə̀ á ven, a bó mendzən mè yòʼ kfə̀n dzəə́ rə́r mo lèn ji mò‑oò yiì, vèn wáa sòv a kitú. Dzə̀ rú, vèn‑eè ló a sòv kitú feyì, a bó ntàm yòʼ‑oò lo dàr.

⁹ A bó m yòʼ shéʼri ji vèn‑eè sov a kitú. M shéʼri bìʼ fo kí‑iì yiìn, vèn bìnèr melív men. Mo vèn‑eè sov kitú ji vèn jày kinyo a dzə̀ e Nyùy, bo bó vèr yòʼ‑oò lo yiì kinyo ke bi kí e vèn.

¹⁰ Wìr yii lóo sòv kitú ji wun jày e Nyùy, Nyùy nèn sə̀ wun, wù bìnèr shilív sə́, e dù, e nə̀ə́ e dzə̀ʼə̀m yee là may. A bó yòʼ dzə̀ wù kfə̀n a rə̀m ntéŋ. Wù lóo yu a dzə̀ nyár mo á yii lóo dìn jay wìr, wù wàa yu a dzə̀ nyár, kí nèn dànèr wun, e wày wáyín é kpu yee là may.

¹¹ Vèn yén ri vijuŋ ve Nyùy foon, bìʼ fo vèn‑eè sov kitú fo věn ajay vi. Vèn sí taʼ lèn feyì ji á wáa màyìr vinyo, bìʼ fo vèn sí fan jay, nyaysì liì wo bi nyáysin. Vèn kfə́n a ker shií ji vèsən kfən tàtí, a dzə kijuŋ, e wày féyì ji vèn sáʼ ŋgaà jay, e sə̀r a kinyo kee bey. Vèn‑eè yiì ne vinyo vidzə̀m ve dzə̀ vèn yiì, e màyìr kinyo kee shooy, a vèn ràn ne lèn fo fo.

¹² A bó kùʼùn kinyò ke mò‑oò sáŋ vinyo vee shooy fo vèn yòʼ dzə̀ ji m sáʼ ŋgaà jay, kìn ji m bin, e fò e wìr wo vé‑eè jayin shó. Kí‑iì dzə̀ ji vèn neer á kinyo kee shooy e Nyùy si, lóo tàr, é vèn yén sá ji vèn tíy e kinyò ke vèr tíy sho.

¹³ Mo vèn yenen ne lèn bèy, shilív shér shí nen neèm. Vèr kfən yèn mo Titur wìyìn, a sheʼrí e ŋàŋ, a bó wù yòʼ dzəə́ fan kinyo kímóʼ kí kùm ven, vèr nen màysì, a yu vijuŋ.

¹⁴ A mò‑oò ló a burí ven e wun woo Titur feyì, wù wìy, e yèn ven, la kí yòʼ shaà fo ghaŋ. Kí nèn kòóy ji kinyo ke mò‑oò meer yír yén shó vèr Titur kìn ki dù, a dzə ke ru kí, réŋréŋ mo vinyo ve mò‑oò yiìn ne sùúy e vèn ví kù yii dzə́ ve ru ví.

¹⁵ Vèn màysì ne, e nə̀ə́ e wun woo Titur shiliv lèn feyì, bìʼ fo wù kuúme mo vèn‑eè səəsin wun, a fàn moo ŋgaà ntum, a neŋ e wùn si, a yu kinyo kfə́.

¹⁶ M nén a sheʼrí kém é ŋàŋ, bìʼ fo m kiiyin ne lèn feyì ji vèn kù wíy a yiì vinyo a dzə̀ á ve ru ví.