2 Korin 3 - ŊWÀʼ NYÙY

Kinyo ke Kristu ki shaà ké mensàŋ me mvə mè

¹ Mo m suuy bèn, bo dzə̀ ji vèr kèʼ ne a suúy a dzə̀ vitú vér a? Bó yòʼ dzə̀ bey. Bó vèr yòʼ kér fó a yiì mo wír ámóʼó yii, a fo ven ŋwàʼ wúmóʼó wo wú wáa dìn mo lim yérí dzəə̀n. A bó yòʼ dzə̀ vèr wàa tàʼ sa ŋwàʼ fo vèn, e bó a dìn e wír ámóʼó mo vèr‑iì lìmèn e věn mvəm.

² Dzə̀ ven vin ve vèr wayin e věr meliv ve dzəə̀n wór woo ŋwàʼ. A wìr dzə̀m yén, yoŋ, yú mo wú suuyì,

³ yén kiránén ji vèn dzə̀ ŋwàʼ, a sàŋ á Jesus Kristu, e bóo tum ver shó. A kí dzə̀ jii, wù‑uù fò ven Kiyoy ke wun woo Nyùy wo wù dzəə̀n e tin, kí wáa saŋ vinyo və́ e věn meliv. A bó ŋwàʼ və̀ne yòʼ dzə̀ moo wo á saŋen é kiwàŋ ke tiy, aá yoŋ yòŋèn, e bó a yu. Kù dzə̀ liì wo vèn yii, a wìr dzə̀m yéné.

⁴ Vèr wáa suúy lim yér ben moo wír ve á tíy wùn à Kristu, yú a dzə̀ fo Nyùy.

⁵ A bó yòʼ dzə̀ ji vèr kér a vitaáví vée yiì kinyo kímóʼ kí ji yiì a ver. Kù fó Nyùy vitaáví, bo vèr wáa yiì vinyo ve á yii vidzə̀m, é ví wáa shemsín.

⁶ Yiì wun woo Nyùy, bo vèr gheén fó a dzə aŋgàa lìm və́ é mvə̀m *mensàŋ me fíy mèn mè. A mè dzə̀ ji á wáa lìm, a yu a dzə̀ fo Kiyoy ke Nyùy ki, e làa yòʼ a lìm ji á mo nsər ye á saŋen suuyì. Dzəə̀ yee fó nsər rə̀n yúyri wír yúyrín, a yee fó Kiyòy yii, a wìr dzə́, lim mo Nyùy koŋè.

⁷ Vèn kì sá mo Nyùy‑iì gwàrìn mensaŋ me mvə mè, a mè wiy a dzə̀ e kpúu, e dìn vitaáví və́. Wù‑uù sàŋ nsər e kiwàŋ ke tiy, e fò e Mooser. Wù lòo wìy sho fo wír veé Israyi, rán Nyùyi wáa ban, a njàʼkìr fo wùn si. Mo wù fə̀m‑eè wiy, a rán yee shooyi sí kpúrinè, bó wìr yòʼ‑oò lo yù fó a leéy gheéy.

⁸ Mo kí dzəə̀n bey, bo mensaŋ me fíy mè, me wìyìn Kiyoy ke Ranén kí shó, mè kér fó shaà mee shooy.

⁹ Mo mensaŋ me mvə mè wáy a dzə̀ lòn e wírí vitu, kù yòʼ din vitaáví vé Nyùy, bo me Nyùy li wír sho lèn ji woo là jay mè kér fó kùʼ, e shaà mee shooy feyì.

¹⁰ A bó mensaŋ me mvə mèy mè yòʼ kfə̀n dzəə́ yénsin ji kifá, bìʼ fo vèsən sí ghán lèn a dzə̀ e me fíy mè, a dzə̀ me mè bòŋèn, e shaà.

¹¹ A kí dzə̀ jii, mo dzəə̀ yee fo nsər yòʼ‑oò ló a tiytíy, a yì kù yòʼ din vitaáví vé Nyùy, bo ye yì wíy shaàrì rə̀n kér fóo dìn, e shaà bèy.

¹² Kér kí nén a dzə jii, vèr kú a fìʼtì kinyo ke Nyùy lèn ghán sidzə̀m, e làa yòʼ a fàn ji kí waà wíy ŋeemé, e lày.

¹³ Bó vèr yòʼ yii moo Mooser wo rán Nyùyi‑iì lóo kpurín fo wùn si, wù sùm fo wír veé Israyi yén mo yí ndzə́menè.

¹⁴ A vé‑eè leey rán Nyùy bèy, e làa yòʼ fə̀m a kiíy mo Nyùy dzəə̀n, bìʼ fo kifá ki‑iì sùmèn vifií vév. A kù dzə̀ mo áwune dzəə̀n, e shem lèn. Á lóo yòŋ kinyo fo Ŋwàʼ Nyùy woó mensàŋ me mvə mè, kifá kìy ki kù a sùm sí yév. Kù mày ji wìr tátí wùn Kristu, é bo sí rəə́ mvəʼəm.

¹⁵ Kù dzə̀ kinyo ke kí dzəə́ kooy lán. Áwune yoŋ ŋwàʼ Mooser, a vifií vév ví kù dzə̀ə́ visumèn.

¹⁶ Yii bèy, wìr binkìr, lóo yu a dzə̀ fo Tàr wòsən Jesus Kristu, vifií və́ ví nèn mvə̀ʼə̀m.

¹⁷ Dzə̀ Tàr wòsən və̀n wo Kiyoy ke Ranén kí dzəə̀n e wùn kiwo, a wìr wo wù sí yú fo Kiyòy ke Kristu kìn bòy ne fo nsər ye dzə̀ yì kùr wír kúrín.

¹⁸ Vèsən adzə̀m nén a dzə lèn, a bó Kiyoy kee shooy ki yòʼ dzəə́ laynìn fo vèsə́n si, vitaáví vé Nyùy vi wáa yensín e vèsə́n wùn ghán sidzə̀m. Kiyoy ke Tàr wòsən kin ki kfə́n a lìm e vèsə́n wùn, a yiì, vèsən wáa kuvsín, a dzə moo wun woo Kristu, a dù duùn fó mbìy, a ker vitaáví ve dzəə̀n vé Nyùy.