2 Korin 13 - ŊWÀʼ NYÙY

Por tìr wíri, e shàʼtì

¹ M sí wiy lèn ji akàŋ ve á meen ataár fó ghan ven. Mo m wiy, a kwàŋrì vinyo, vèn wáa kuumé kinyo ke vé‑eè saŋen é Ŋwàʼ Nyùy jii, «Aá sáʼ wír fo kinyò, anjene kù a tiy abaà, kìn ataár.»

² M nén a kàʼtì kiwó e wír ve vé‑eè yiìn liì kisaŋ vìyi, e kfə̀n a suúy sa e wìr dzə̀m, a kù dzə̀ kíwun ke mò‑oò suuyin é ghan se mò‑oò wìyìn ji akàŋ vee abaà, a m kfə̀n sí suuy lèn, a m dzə̀ fó səné. M kfə̀n yíi wìy lèn, é la wìr yòʼ dzəə bòy fo ŋgeʼ ye m yíi fo e ŋgaàŋ.

³ Á kishiíy kee shooy ke vèn wíy yen ji m súŋnin a ji wúnwun Kristu. Vèn kì sá jii, a Kristu tar vinyo vén, bo bó yòʼ dzə̀ wù bùŋ vitaáví. Wù kér vitaáví fó màʼ ŋgeʼ e vèn.

⁴ Dzə̀ rú, wù‑uù lo weèy moo wír, á lì wun, e yùyrí e kintam. Yii bèy, a wù dzə́ lèn a dzə̀ bìʼ vitaáví ve dzəə̀n vé Nyùy. Mo vèr à Kristu tatin, vèr nén a weèy sa fo wùn. Yii bèy, a vèr kfə̀n dzə̀ sá bìʼ vitaáví ve dzəə̀n vé Nyùy, a dzə̀ víwun ve dzə̀ vèr neèr e věn nsàn.

Wír veé Korine wáa sayrí vitú vév

⁵ Vèn ku nèn a sayrí vitú vén, a leéy ji vèn sà kù yòʼ tíy réŋréŋ é kinyò ke vèn‑eè biimen á. Bó vèn yòʼ kì ji Jesus Kristu dzə̀ e věn meliv a? Kù mày cáʼ jii, a vèn bùŋ fó wìr və́, bo wù búŋ fo věn meliv.

⁶ A m kì ji vèn yén a ji Kristu yoʼ bùŋ fo věr meliv, a vèr dzə̀ rú wír və́.

⁷ Vèr wáa lon fo Nyùy ji wù ku yiì, é vèn wáa yiì a dzə̀ vinyo ve ru ví. A bó vèr yòʼ suuy bèn ji vèr taʼ ji wíri wáa yen a ji kinyo ke tuuyin ver kí kù tíy fo. Ke vèr koŋ ki dzə̀ cáʼ ji vèn wáa yiì a dzə̀ vinyo ve ru ví, a lim yérí fə̀m yénsin fo ghaŋ.

⁸ A kù dzə̀ mo dzə̀ vèr wàa tomrí a dzə̀ kinyo ke ru kí, a bó yòʼ dzə̀ vèr wàa sèmèr.

⁹ A dzə̀ ji vèr wáa yensín fo ghaŋ, é kí yii, é vèn wáa tiy kitávín, bo dzə̀ ke vèr koŋè. Ke vèr lón kí kù dzə̀ ji Nyùy ku yiì, é vèn wáa yiì moo wír və́ ŋkuuŋkùŋ.

¹⁰ M sàŋ ne vinyo vìn vidzə̀m, a m dzə̀ fó səné ben, ji m wíy lóo wìy, é la m yòʼ a ker fó lì vitaáví ve Tàr wòsən Jesus Kristu foon e mò, e neèr a dzə̀ á tásháʼ sho. A m fèn neèr, bo m báʼti ven shó baʼtín mo wù‑uù foon e mò, bó m yòʼ táʼar tàʼàrín.

Shaʼti

¹¹ Afə́r vem, m nén a shàʼtì ven ji á bèr á ne. A m tír ven ji vèn navti vinyo vén, e yuùrí ntir sém kijuŋ. Vèn kfə́n shuu e mòʼón, a dzə dzə́ yee nyaáŋ, é Nyùy wo wù koŋ ven, kfə̀n yii, a melív men mè dzə́ nyaáŋ, nèn a dzə e věn mvəm.

¹² Vèn ku shàʼnìn, e bàmnín moo wír Nyùy.

¹³ Wír Nyùy vee fen adzə̀me shaʼtì ven.

¹⁴ M nén a lon jii, Tàr wòsən Jesus Kristu kú a leéy fo vèn, é Nyùy wáa kòŋ ven, é Kiyoy ke Ranén kí tátí ven, aá wáa dzə amòʼón.