2 Korin 12 - ŊWÀʼ NYÙY

Nyùy ghèm yúv, e dìn e Por

¹ Mo m kù kér fó a suúy kitú, a dzə̀ m kù a suúy, a m fə̀m kì ji bó séʼ yòʼ dzə̀ shó. Vèn maʼti ri, é m fer lèn mo Nyùy‑iì ghemen ndzə e mò, m shóv vinyo vímóʼ ví é si, e kfə̀n a yen vímóʼ ví moo njèm.

² Yì‑iì dzə̀ é bǎm kiya nshòv sikweè e ghvə̀m, Nyùy lì wir Kristu və̀n e ntoò yùv fo wù dzə́. Kìn wù‑uù lì mo wù dzəə̀n ben, kìn wù‑uù lì a dzə̀ kiyoy, bo bó m yòʼ kì. Kù kì wun woo Nyùy.

³ Ke m kiìn kijuŋ ki dzə̀ ji wù‑uù lo dù e Nyùy kirə̀ʼ ké vijùŋ. Kìn‑eè dù kiyoy, kìn‑eè dù wún, bo bó yòʼ dzə̀ m kìíy. Kù kì Nyùy.

⁴ A ŋgaàŋ‑eè lo yù vinyo fo ve bó yòʼ dzə̀ wír, wù kìíy móo fèr, a bó yòʼ fə̀m dzə̀ wìr wàa fèr.

⁵ A m kì taʼ, a suúy kitú, m wàa suúy a dzə̀ bìʼ wír woo shooy. A bó yòʼ dzə̀ m wàa sevtí kinyo kímóʼ kí ji mo, e shaà cáʼ ji bó m yòʼ kér kitar.

⁶ A dzə̀ ji m wáa suúy kitú, bo m kù suuy a dzə̀ kinyo ke ru kí, la kí yòʼ a yensín ji kiyúŋsì. Yii bèy, m nen màʼtì vinyo vee shooy vidzə̀m, fo wìr wáa yen mo ji wír woo wír, e shaà kinyo ke wù yén, a m yii, kfə̀n yú, a m suuyì.

⁷ Mo m shovin vilìtì ve vinyò vinín bèy, Nyùy nèn yèn ji ghanmóʼ, é m yìi a yen kitú kém é ŋàŋ. Wù nèn màʼtì, Satan tsə́m mo, m ndzə́m. A ndzə́m və̀n sovtì mo moo njoŋ kifa, sər mo fo m wáa koʼór wún.

⁸ A m lòn ne fo Nyùy, e meé akàŋ ataár feyì jii, wù ku yiì, é ndzə́m və̀n may á fo mǒ wùn.

⁹ M lóné, wù kù sùúy ji wun yíi a shìy a mò, a sə mo, lá m yòʼ dzə́ə a shii a kinyo kímóʼ kí, bìʼ fo wìr yii búŋ vitaáví, bo wù yú mo vitaáví vé wun woo Nyùy vi lim e ŋgaàŋ wùn kijuŋ. M nén a sheʼrí ndzə́m wom woo shoon e ŋàŋ, é vitaáví vé Kristu vi ku màysì, a lìm e mǒ wùn.

¹⁰ Á bèy, m kú a sheʼrí ŋgeʼ se m yén bìʼ wun woo Kristu sidzə̀m, kìn dzə̀ ji m yòʼ dzə̀ kitávín, kìn wíri kuu mo, kìn gháʼ kitan, kìn á ron wúu yém, kìn gháʼ vinyo mo, bo m kù shéʼri shèʼrín, bìʼ fo vinyo vi lóo ghaʼ mo, m nèn a yu mo vitaáví vé Kristu vi lim e mǒ wùn.

Por tóʼti mo wír veé Korine ghvəʼ wun

¹¹ Mo kí dzəə̀n ji m rə́si suuy kitú bèn, m yii rú moo kiyúŋ. A kù yiì ven, bìʼ fo dzə̀ ven vin ve kì dzə̀ á wàa fèr mo m dzəə̀n. Mo m fə̀m kiìn jii, mo féyì, m yoʼ mèé e kifa, vèn kì sá kijuŋ ji kinyo ke wìr ve vèn yoŋ ji aŋgàa ntum ve ghaʼtín víyi yii, ke dzə̀ kí ghàʼ mo, kí yòʼ dzə̀.

¹² Vèsən‑eè dzə́, a m kù yú kinyo a dzə̀ ntum Nyùy, lo, m wàa yiì viŋgaʼnìn ve vinyò ve ví din vitaáví vé Nyùy, vèn wàa yen kijuŋ ji m dzə̀ rú á ŋgaà ntum Jesus Kristu.

¹³ Mò‑oò lo lìm e věn mvəm réŋréŋ mo mò‑oò lim e vintatì vímóʼ ví. Kù mày cáʼ ji m yòʼ‑oò ló a leéy kifá kímóʼ kí fo vèn, e bó a yi. A mò‑oò jày kee shooy jáyín, bo m kù‑uù jày ne. Vèn kù làysìn rì jay wom.

¹⁴ Mo m kfə̀n sí báʼti lèn ji m wiy, e ghàn ven fó akàŋ vee ataár, m kù kfə̀n yíi wìy, e làa yòʼ a leéy kifá fo vèn gheéy. M wiy a dzə̀ ven, bó m yòʼ wiy mbàm sén. Wón ve terií yòʼ yii leey fo kitàr kí, yii leey kitàr fo wóné.

¹⁵ M dzə̀ kibáʼtín féyì fó fo kitú kém e vèn, e kfə̀n jivír kifá ke m kér kidzə̀m, é vèn fiʼ màysì, e kìíy Nyùy. Mo m géŋsin e vèn ben, bo dzə̀ kee shooy ki yiì rú ji vèn wáa yen mo fó tèr a? Àáy.

¹⁶ Yii bèy, a tàm é ghan símóʼ sí, vèn wàa suúy jii, m dzə̀ ben, a m dzə̀ á wir kiŋkùvrì. Mo bó m yòʼ dzə́r mbàm, m wóŋ a ven wóŋén, a dzəə̀ yìmòʼ kù dzə̀ á ye m woóne sho, kooy kifá fo vèn.

¹⁷ M nén a dzər jii, m sà‑aà lo tùm wíri fo vèn bey, á kfə́n e kifá kímóʼ kí, e fò e mò á?

¹⁸ Mò‑oò boòrì Titur bóorin, e bóo tum wùn fər wòsən wùmòʼ ji á ku wìy, e ghàn á ven. Vé‑eè lo wìy bèy, a leéy ji vèn shóʼ kiwuú kév á? Àáy. Kinyo ke vèr wun tíy sho ki dzə̀ kimòʼón, tiir kiwuú kér kimòʼón.

Por fan kinyo ke wír veé Korin

¹⁹ Ghanmóʼ, bo vèn yén ji vèr rə̀sí, a suúy vinyo vìn vidzə̀m bèn ji vèr tuúne a dzə̀ shuu ji vèsən fiʼ bòŋnìn. Bó yòʼ dzə̀ bey. Vèr suuy a dzə̀ mo Kristu yii, bo á wáa suúy, a vèr suuy, kiíy ji Nyùy waà yú, kfə̀n suuy ji á fiʼ tàvír ven ve vèn tíy e věr meliv.

²⁰ Kinyo ke m fan ki dzə̀ jii, ghanmóʼ, é m wìy wìy, e yèn kinyo ke kí wáa nyar mo, é m nèn a nyarnín sa. A m fan fó wìy wìy, e yen, a vèn seʼnìn, gheʼnìnè. Kìn vèn shwiiy a dzə̀ kilòŋ, kìn wìr diy a dzə̀ və́ woo shuu. Kìn dzə̀ ji vèn duú viduú, súʼ kinsuʼ. Kìn ámóʼó kóʼor wún, a wíri dzə́ jeéy jeéy.

²¹ A m kfə̀n fan fó wìy wìy, é Nyùy yii, é m wáa woomé, a sòv kitú fo wír ve vé‑eè yii vinyo ve kisaŋ vi, e làa yòʼ bìnèr melív mev, e shem lèn, kù jaŋ a dzə̀ kinjàŋ, yii kfə́ə joònè woo bey.