2 Korin 11 - ŊWÀʼ NYÙY

Aŋgàa ntum vee ruú wùn à vé kimboʼtìi

¹ M nén a lon ji vèn ku kfə̀n yuùrí a kiyúŋsì kém kímóʼ kí shishàr. Kii vèn, vèn ku yuùrí ji weè.

² Vèn wáa kiíy jii, m kíyri ven mo Nyùy kìyrí wír və́, bìʼ fo m juùrìn ne ven e Kristu ji kù sì wun lúm won, a m yòʼ taʼ ji wìr wo sən kfən kùm ven.

³ A m fan fo wír ámóʼó bóʼtí ven mo Satan‑eè boʼtin Efa, e bvə̀ə́r vifií vén, é melív men mè kpú fo Jesus Kristu wùn, é vèn áwune bírnín.

⁴ M suuy bèn, bìʼ fo m yén ji vèn kù sí biíme vinyo vidzə̀m a biímén. Kìn wìr wìy, a fìʼtì Jesus wùmòʼ jeéy, a bó yòʼ dzə̀ wo vèr‑iì fìʼtìn e vèn, kìn wìr fiʼtì kifá kímóʼ kí ji Kiyoy ke Nyùy, a bó yòʼ dzə̀ ke Nyùy foon e vèn, kìn ŋgaàŋ neèr kfə́ kinyo ke sən kí ji sáʼka Nyùy wo juŋ, vèn kù biìmé biimén.

⁵ A bó m yòʼ kwaʼ feyì ji wír ve vèn yén ji aŋgàa ntum Jesus ve ghaʼán víne shaà a mo gheéy.

⁶ A vèn fə̀m yén ji bó m yòʼ kì kisúŋnìn, bo m kì kijuŋ feyì mo kinyo ke m fiʼtì ki dzəə̀n. A m kì ji vèn kù rə́si yén saa bèy.

⁷ Mo mò‑oò jayin ne, e bóo wìy, a fìʼtì sáʼka Nyùy wo juŋ e vèn kisáŋ, bo m kù‑uù jày ne. Bó m fèn‑eè jày jáyín, e bóo lì kitú kém shishàr ji m fíʼ koʼór ven á?

⁸ Mò‑oò wìy, a lìm vèsən, a toòŋè mbàm a dzə̀ fó vintatì vímóʼ ví, e bó a yi.

⁹ Mò‑oò ló a buŋ kifá, a bó m yòʼ‑oò ló a leéy ven gheéy. Vintatì veé Masedonia vi túm afə́r vesən ámóʼó, á wìy e vifá ve mò‑oò búŋ vi vidzə̀m. A kù dzə̀ mo m wíy a dzə, a bó yòʼ dzə̀ m wàa leéy kifá kímóʼ kí fo vèn gheéy.

¹⁰ A m kù wíy a yiì bèy, e věn wòŋ woo Akaya e dzə̀m, a bó yòʼ dzə̀ wìr sə̀r mo, é kinyo ke m sévti kìn ki shaa fó ghaŋ. Mo m tíy kém e Kristu kinyò ke ru kí, bo kù dzə̀ mo kinyo ke m suuy kìn ki wíy a dzə ke ru kí.

¹¹ A yiì ka fo m wáa leéy kifá fo vèn? Dzə̀ ji m ban ven bánen a? Bó yòʼ dzə̀ bey gheéy. Nyùy kì ji m koŋ a ven.

¹² M ku nèn a tiy a dzə̀ e kee shoon ki, fo wír ve á suuy vitú ji áwune dzə̀ aŋgàa ntum Kristùu maysi, a saà wún ji á lim réŋréŋ moo mo woo Por.

¹³ Vee shooyi yòʼ dzə̀ aŋgàa ntum Kristu gheéy. Á bóʼti ven bóʼtín. Áwune dzə̀ kév wír ve á ghán, lévti wíri lévtín, nèn binkìr ji aŋgàa ntum Kristu.

¹⁴ A bó yòʼ dzə̀ vèn wàa meŋnín kee shooy. Mo Satan lo, wù bìnkìr, a yensín ji nshìylav Nyùy ye yì wiy e vinyo ve ru ví,

¹⁵ kù dzə̀ réŋréŋ mo dzə̀ aŋgaà və́ lìme wàa bìnkìr sa bèy, a yensín ji wír ve á lim a dzə̀ fo Nyùy. Aá yii bèy, káv a dzə̀ lòn, e wìy nəə́ e ŋgeʼ fo vinyò foo fèy.

Ŋgeʼ se Por woo ŋgaà ntum Jesus Kristu

¹⁶ A m kfə̀n suuy, lo li jii, lá wìr yòʼ a yen a ji m suuy a dzə̀ kitú, a m yúŋsi yùŋsín. A wìr yén bèy, kii ŋgaàŋ, wù kù yòʼ a yuurí kinyo ke kiyúŋ kin ki dzəə́ yìi a saà wún shó shishàr.

¹⁷ A bó yòʼ fə̀m dzə̀ mo dzə̀ Tàr wòsən Jesus Kristu wàa kòŋ ji m wáa suúy kitú. M nén a suúy rú moo kiyúŋ.

¹⁸ A m yii bèy, ji m fiʼ kòrìr a wír ve á rə́si saa wún é vinyò veé ndzə fèn.

¹⁹ Vèn yoŋ vitú vén ji afií, kfə̀n yuúri vinyo ve viyúŋ viy vi suuyì.

²⁰ Wìr meé, kìn wù tanèr ven tánerin, kìn wù lévti ven lévtín, e koóy kifá, kìn wù kóʼ ven kóʼón, a nyàvrì e vèn, vèn kù a gbù gbuùn é si wo.

²¹ A m sí woóme kém woómén ji vèr‑iì bùŋ a dzə̀ á shilív shé a nyàvrì e vèn mo wír vìyi nyavrì. Yii bèy, mo m sí suuy kitú moo kiyúŋ, m nen màysì, a suúy jii, aáwune fə̀m sévti ji ka, bo dzə̀ m wàa sevtí a sa.

²² Aáwune dzə̀ wír Hibru nsayi, bo m dzə̀ sá fo. A dzə̀ wír veé Isray, bo m dzə̀ fó. A dzə̀ rám Abraham, bo m kù dzə̀ sá fo.

²³ A dzə̀ aŋgàa ntum Kristu, bo m dzə̀ wo mbìy, aá fə̀m yén ji m baá baán. M lìm ne kinyo ke Kristu, e shaà wír vìn adzə̀m, e kfə̀n lìm sháŋ fó fo akàŋ anín, e shaà áwune. Á tàm ne mo kàŋ là tóʼ, m méʼ kpú akàŋ anín.

²⁴ Wír veé Judàa tàm ne mo ŋgwàn nshòv bvə̀ʼə̀ e mtaár, nshòv bvə̀ʼə̀ e mtaár, akàŋ atàn.

²⁵ Kí‑iì kòóy ne mo akàŋ ataár ye á ku dzə̀v mo e mbàŋ si. Ghán símóʼ sí wáa dzə, á lì mo, a tsəmrí e tíyí ji á yúyrí. Kikóŋ ki bìnèr ne mo é ndzəv akàŋ ataár. Wáa dzə yímóʼó vitsə́ʼ, m shiíy é ndzəv, yì rán, e kfə̀n jì.

²⁶ M rə́si ghán virə́ʼ vinín, lo yímóʼó, m wàa fàn fó leŋ e ndzəv. Yímóʼó m wàa fàn fo ashóŋé lémér mo. Yímóʼó m wàa fàn wír ve á ron wúu yém, kìn dzə̀ wír vér veé Juda, kìn vitúm. Kileémé kí kù néŋ virə́ʼ vidzə̀m, shiy mo, kìn dzə̀ é mvə̀mlaʼ, kìn dzə̀ é kwaʼ, kìn dzə̀ é ndzəv, kìn dzə̀ wír ve á wóvri ji áwune dzə̀ ŋkar sém.

²⁷ M lo, m wàa gisín e lìm, a sòrkìr, a shiíy là mbuùné. Kfə́n lo, m bùŋ kifá kee yi, e shìíy e jìŋ. M du fomóʼó, m bùŋ mendzə́v mée no, yímóʼó m shìíy fó ndzə, e kidzər.

²⁸ A bó yòʼ jòʼsì kee shoon. Vintatì ve wìr Kristu vidzə̀m vi tíy e mǒ shiliv, a vinyo ve dzə̀ m kù a kwàŋrì vi dzər e mǒ wùn ghán sidzə̀m.

²⁹ Shilív shé wìr shi lóo seèm, m nèn a yen kém ji seem a shém. Wìr lévti wír, wáy e kinyò ke bi kí, wàa yu mo nyár.

³⁰ A dzə̀ ji m kú a suúy kitú mo m suuy bèn, bo vinyo ve dzə̀ m wàa sevtí vi dzə̀ ve ví din ji bó m yòʼ kér vitaáví vímóʼ ví ji vém.

³¹ Nyùy woo Tàr à Taàtá wòsən Jesus wo dzə̀ vèsən wàa burí ghán sidzə̀m, kì ji m suuy a rú.

³² A kinyo ke kí‑iì kooyin mo é Damaskus e ghan sé Fòn Aretar ki din bèy feyì. Ŋgaà saʼ woó Damaskus‑iì tùm wíri ji á téʼ mo, e koò fó shùu kày ye vé‑eè bomen, e kaàrí ntèʼ yee shooy sho.

³³ M woóné woonén, á sə́yír mo fó kày foo fèy a dzə̀ é ŋkaà, m nyéŋ.