2 Korin 10 - ŊWÀʼ NYÙY

Shòʼ Nyùy Por ji ŋgaà ntum Jesus Kristu

¹ Mo woo Por, m kì ji wír ámóʼó lo, á wàa suúy a jii, m lóo saŋ kinyo, a m dzə̀ fó səné, m wàa ghàŋtì shuu, mee fo si, m wàa boòrì a lám. Mo woo shooy, m nén a boòrì ven ji weè, mo Kristu kù yii boorì, a suúy jii,

² kii vèn, lá vèn yòʼ yiì ji m wíy wiyì, é m ku neèr a dzə̀ tásháʼ. A dzə̀ kinyo ke dzə̀ m kù yiì e wír ve á káy lim yér, suuy ji vèr yii kinyo a dzə̀ ke yii kwaʼtì wír.

³ Dzə̀ rú, a vèr kù dzə̀ sá wír fo wìr. Yii bèy, a bó vèr yòʼ funèn e věr lìm fèn mo wír veé ndzə fène yii maʼ rə́r a dzə̀ e vitaáví vév ví.

⁴ Vifá vér vé rər ví yòʼ dzə̀ veé ndzə fèn gheéy. Kù dzə̀ vitaáví ve fó Nyùy e vèr, a vèr maʼ Satan sho, ton virə́ʼ və́ ve tavkín ví.

⁵ Vèr nén a sə̀r kimboʼtì ke kisaŋ ki, e kfə̀n a sə̀r wír ve á din vifií ji á kì vinyo e ŋàŋ, nèn bvəər vifií vé wíri fo á kiíy Nyùy. A vèr kfə̀n shem vinyo ve bi ve wíri kwaʼtì vidzə̀m, binèr áwune ji wír ve á yú a dzə̀ fo Jesus Kristu.

⁶ Vèn ku nèn tàtí vitú vén adzə̀m, a yu a dzə̀ fo Kristu, a kiíy jii, a wìr lò, a dzə sho wo wù kù dzəə́ táv kitú, bo m dzə̀ kibáʼtín fó lovtí e ŋgaàŋ mo dzə̀ m lòvtí.

⁷ Vèn kú a leéy vinyo ve ví kooy e věn si vi, a yen kijuŋ. A wìr lò, a suúy kitú ji tùm Kristu wun, ŋgaàŋ kù yòʼ a kiíy ji tùm sáa Kristu ver.

⁸ Mo m fə̀m‑eè sévti, shaa mo dzə̀ kí wàa dzə, bó yòʼ dzə̀ kí kòóy ji wìr din á ji bó yòʼ tùm rú Kristu mo. A wù‑uù tùm mo ji m báʼtí ven ji wír və́, wù yòʼ‑oò tùm ji m táʼár taʼarín.

⁹ Yii bèy, a bó m yòʼ taʼ ji vèn wáa kwàʼtì a ji dzə̀ m kù sùŋnín kitávín a dzə̀ é ŋwàʼ.

¹⁰ M kì ji wír ámóʼó káy mo jii, m yii sáŋ ŋwàʼ, m shèŋrì, wú wàa sənín kinyo, e kfə̀n a dìn sáʼ ye tavíné. Yii bèy, m lóo dzə fo si, la á yòʼ yèn á mbòv, a bó ndzə̀né yòʼ dzə̀ á e kinyò ke m suuyì.

¹¹ Wír ve á suuy bèyi wáa kiíy ji kinyo ke vèr suuy e ŋwàʼ, a vèr dzə̀ fó səné, kí kù dzə̀ á ke dzə̀ vèr sùúy fó si.

¹² Fo wír ve á rə́si suuy vitú vév e věn mvəmé, bó yòʼ dzə̀ m wàa suúy ji m mèé e kifa moo áwune. A bó yòʼ dzə̀ m wàa fìʼsìn kitú kém vèr à vee shooy vee wíri. Áwune kwaʼ ji á kì á vinyo, a bó á yòʼ kì gheéy. Kév kí dzə̀, a wìr lo, wù lèéy kinyo a dzə̀ fo ké wùmòʼ kí, a fìʼsìn kitú kfə́ wùn ŋgaàŋ.

¹³ A bó yòʼ dzə̀ vèr wàa sùmrì wún é kinyò ke vèr yòʼ kiìn. A dzə̀ vèr kù a fèr a dzə̀ kinyo kee kùm lim ye Nyùy foon e vèr, e wày sá ven e věr kiwo.

¹⁴ A bó yòʼ dzə̀ ji vèr táŋ a dzə̀ kilíŋ fo wìr wùmòʼ, fo kí wáa dzə mo bó vèr yòʼ‑oò lo lìm e věn mvəm. Dzə̀ ver vin ve vèr‑iì tòmbìy wìy, e fìʼtì sáʼka woo kùm Jesus Kristu e vèn.

¹⁵ Bó yòʼ dzə̀ vèr wàa taʼám e kitu ke lìm ye lìmèn wír wo sən. Kér kí kù dzə̀ ji vèn maysi, e wày shilív e Kristu wùn, é kinyo ke vèr fiʼtì ki maysi, e tùúy mo dzə̀ kí wàa dzə.

¹⁶ Kí tuuy bèy, é vèr fíʼ a ghan, a fìʼtì sáʼka Nyùy wo juŋ sa e wòŋ símóʼ sí, e làa yòʼ a rəsí a lìm a dzə̀ fo wír ámóʼó sí limè, aá wáa burí ver fo wìr wo sə́n lìm.

¹⁷ Kér kí dzə̀ ke á saŋen jii, «A wìr taʼ, a sùmrì wún, wù kù a sùmrì a dzə̀ é kinyò ke yiìn Nyùy Tàr.»

¹⁸ A kí dzə̀ jii, a wìr lò, a suúy a dzə̀ kitú kfə́, la wíri yòʼ a yen. Vitaáví vé Nyùy vi lóo yensín e wìr lìm, á nèn a yen.