2 Korin 1 - ŊWÀʼ NYÙY

¹ Sàŋ mo woo Por, vèr fər wòsən Timoti ŋwàʼ və̀n. Dzə̀ mo wo dzəə̀n ŋgaà ntum Jesus Kristu mo Nyùy‑iì sìysìn. A ŋwàʼ və̀ne dzə̀ fo vèn vee kintatì ke Nyùy ke kí dzəə̀n é Korin, e kfə̀n a dzə sa fo wír Nyùy ve á dzəə̀n e věn wòŋ woo Akayàa adzə̀m.

² M nén a lon jii, Tàr wòsən Nyùy wùn Taàtá wòsən Jesus Kristu kú a kòŋ ven, a leéy fo vèn, a yiì, é melív men mè wáa dzə nyaáŋ.

Nyùy shám wír və́, rəər melív mev

³ Vèsən kú a beèrì Nyùy wo dzəə̀n Tàr à Taàtá wòsən Jesus Kristu. Nyùy, wo wù shám wíri adzə̀m, rəər melív mev.

⁴ Vèsən lóo yen ŋgeʼ, kìn dzə̀ rəné, wù kù a rəə̀r melív mèsən. A wù rəər bèy ji vèsən fíʼ a kiíy mó a rəə̀r me wír ámóʼó ve á yén sa ŋgeʼ, a vèsən kù yíi a rəə̀r e dzəə yee shó ye Nyùy rəər mesən.

⁵ Vèn wáa kiíy jii, mo vèsən yén ŋgeʼ lèn, a dzə̀ ye Kristu‑uù yéné, Nyùy kù shám vèsən réŋréŋ mo wù‑uù shamen Kristu, rəər melív mèsən.

⁶ Aá nyavrì e vèr vee aŋgàa lìm Nyùyi ben, a biìmé wun woo Nyùy ji vèr fíʼ a sə ven, a rəə̀r melív men. Mo wù kù rəər melív mer, bo wù rəər a dzə̀ méen, bìʼ fo vèr kiiyin ne lèn mo dzə̀ vèr sə̀ sá ven fó ŋgeʼ se vèn yén réŋréŋ mo vèr yéné.

⁷ Vèr nén a tiír vifií e věn wùn, a kiíy kijuŋ jii, mo vèn yén ŋgeʼ se vèr yén sìn, Nyùy kù yíi a rəə̀r saa melív men mo wù rəər méer.

⁸ Afə̀r ver, vèr nén a tàʼ ji vèn kiíy mo ŋgeʼ se vèr‑iì yén e wòŋ woo Asia fèn si‑iì dzəə̀n. Sí‑iì dzə̀ féyì, a vèr‑iì kí ji bó yòʼ dzə̀ á vèr kfə̀n lùŋ.

⁹ Vèr‑iì yén feyì ji vèr kù sì á aŋkfə. A ŋgeʼ sìn si‑iì kooy ver bey, ji vèr fíʼ a way shilív a dzə̀ e Nyùy wùn. Nyùy, wo dzə̀ wù fə̀ə́r wír fo kpu.

^10-11 Wù‑uù lo fə̀ə́r ver fó ŋgeʼ ye tavín fen, a wù kù kfə̀n wíy fəə́r. Vèr ku nèn a way vifií a dzə̀ e wun wùn, a kiíy jii, a vèn fen tàtí, a bùnrì fo vèr, bo wù kù kfə̀n wíy sə a ver. Vèn lóo bùnrì bèy, é kí nèn wìy a dzə jii, mo vèn lón fo Nyùy wír anín bìʼ ver, wù wíy sə ver, aá nèn a sheʼrí wun sa anín, a beèrì wun.

Por kùvsín ghán rə́

¹² A dzə̀ mo vèr à wíri yii dzə́, m wàa tuy shwín, a suúy feyì fo shiliv jii, m kù yii yii kinyo e wìr, a dzə̀ ke m yú fo Nyùy, bo taaka e vèn, e làa yòʼ a bìnbìn. A bó yòʼ dzə̀ m wàa yiì kinyo, a dzə̀ ke yii kwaʼtì wír. M kù yii kinyo kidzə̀m, a dzə̀ ke Nyùy din e mò, sə́ mo, a m yii.

¹³ Kí nén a dzə jii, fo vinyò ve m rə́si sáŋ fo vèn vin, kinyo kímóʼ kí yòʼ dzə̀ shó ke m lìtìn fó bàm. Kù dzə̀ kíwun ke vèn yén e ŋwàʼ, yú mo kí dzəə̀n.

¹⁴ A vèn fə̀m dzəə́ méŋnin vinyo ve m yii vímóʼ ví lèn, bo m kù wày vifií e věn wùn ji vèn wíy màysì, e yen a mo vinyo vee shooy vi dzəə̀n. Wíy lóo dzə e kishiíy ke Tàr wòsən Jesus wíy kfən, vèsən lóo tiy e wùn si, é vèn nèn a koʼnín bìʼ mo, réŋréŋ mo m wíy a koʼnín bìʼ ven.

¹⁵ Mo mò‑oò sí wáy vifií e věn wùn bey, m nén a sìysì jii, m kfə̀n wíy lòo dù ghán, é m tombìy shaà fo věn wùn, é vèn fiʼ kòóy kintóʼ kée yen mo akàŋ abaà.

¹⁶ A mò‑oò yén jii, m wíy lòo dù e wòŋ Masedonia, é m shaa, e ghàn ven é Korin, lóo kfən, é vèsən kfən dzə̀ʼtì, é vèn koóy kifá kée sə mo shó, é m ghán, e dù mèé e wòŋ woo Juda.

¹⁷ Mo bó m yòʼ‑oò lo shaà fo Korin, bo dzə̀ ji m yii siysì kinyo kém a dzə̀ fó shuù à? Dzə̀ ji m yii siysì kinyo kém mo wìr woo və̀y lóo suúy kinyo, a wù kì ji wun lo e rəʼtí, e kòr à?

¹⁸ Bó yòʼ dzə̀ bey. Mo Nyùy kù yii suuy a dzə̀ kinyo ke ru kí, kù dzə̀ mo kinyo ke vèr suuy e vèn kí dzəə̀n, a vèr yòʼ binbìnè.

¹⁹ A kí dzə̀ bey, bìʼ fo Jesus Kristu woo Wan Nyùy wo vèr à Timoti, à Silvanur fiʼtì e vèn yòʼ yii binbìnè. Wù kù yii tíy a dzə̀ e wùn jì.

²⁰ Aŋkàʼmé ve Nyùy‑iì kàʼàn vèsən shó adzə̀me dzə̀, aá kù gheen a dzə̀ bìʼ wun woo Kristu. Vèsən ve á tatin vèsən à Kristùu nén a binsí ji Amen, é buríi fíʼ a dzə fo Nyùy.

²¹ A dzə̀ wun woo Nyùy wo wù lumèr melív mèsən, a vèsən tíy kitávín vèsən à Jesus Kristu. Wù‑uù shàv vèsən jeéy,

²² e səə̀m ji wír və́, e kfə̀n wày Kiyoy kfə́ ke Ranén kí e vèsə́n meliv ji sàʼ vijùŋ ve ví dzəə́ wìy a wìy.

²³ Fo ghan ye mò‑oò yíi wìy, e ghan ven é Korin, vèn ku nèn a kiíy ji mò‑oò gòʼ bey cáʼ ji fo m wiy, é vèsən kem. A m suuy bèn, kan a dzə̀ Nyùy.

²⁴ Vèr kì ji vèn wày shilív e Nyùy wùn kitávín, a bó vèr yòʼ taʼ ji á wiy, a kàn ven kánen é kinyò kímóʼ kí gheéy. Ke vèr koŋ ki dzə̀ jii, a vèr wìy, vèr yiì kinyo a dzə̀ á ke vèn maysi, a sheʼrí sheʼrín.