2 Afòn 5 - ŊWÀʼ NYÙY

Á fér Naaman

¹ Wìr wùmòʼ wáa dzə, a yír rəə́ dzə̀ Naaman, a wù dzə̀ mfòómé fòn woó Siiria. Wù‑uù dzə̀ wir fòn wo ghaʼán, a fòn koŋ wun e ŋàŋ, bìʼ fo wù‑uù danèr wír veé Siiria, aá só rə́r. Wù‑uù dzə̀ kintav ke wìr, é bo shìvnsay wáa jivír wun.

² Wír veé Siiriàa‑aà ghàn màʼ rə́r wùn à wír veé Israyi, e koò wánlè ŋgòn wùmòʼ fó Isray, wù wìy, a lìm fo wiiy Naaman.

³ Wù wìy lò, e sùúy e wiiy Naaman jii, «A taàta wòm kì dù fo *ŋgaà ntum Nyùy woó Samaria wùn, wù fèr wun, shìvnsay mày fo wun wùn.»

⁴ Naaman yiì yù kinyo kìn, e nèn dù, e bùn fon woó Siiria, e naàrì kinyo ke wánlè ŋgòn woó Isray və̀y kì suuyin.

⁵ Fòn nèn sùúy jii, «M lo, e tum wò lèn e ŋwàʼa, áà du, e fò e fòn woó Isray.» Naaman nèn sə̀ ŋwàʼ, a dù sho, du bèy, kér mbàm se dzəə̀n kisha ke mbàm ke fəvír kí *ashekel nsə̀kì mtaár (30,000), kfə̀n kér see kisha ke mbàm ke baar kí ashekel nsə̀kì ntuùfú (6,000), à ndzə̀y sé ŋkàʼ sí e ghvə̀m.

⁶ Wù dù, e fò ŋwàʼ və̀y e fòn woó Isray, aá sáŋ shó jii, «Aà yèn ŋwàʼ və̀n, à nèn kìíy ji tsə̀nsí a mo ŋgaà wom lìm woo Naaman ji à wàá fer á wun, é wù bónén fo wun shìvnsay.»

⁷ Fòn woó Isray leéy ŋwàʼ və̀y, e nèn saàsì ndzə̀y sə́, e sùúy jii, «M dzə̀ Nyùy à? M kér vitaáví vée yuyrí wír, e kfə̀n yiì, é wù luŋ a? Yiì ka, é bo wìr və̀n wáa tsənsí wír wo wù joy shivnsay ji m fer? Vèn leéy, é vèn yén ji wù taʼ a dzə̀ á melaà vèr wun.»

⁸ Elisha yú ji fòn woó Isray saàsì a ndzə̀y sə́, e nèn tsə̀nsí ntum, e dzə̀r e fòn jii, «À saàsì ndzə̀y sé ji ka? Tsə́nsí wír woo shooy fo mǒ wùn, é wù fiʼ kìíy ji ŋgaà ntum Nyùy dzə̀ á e Isray.»

⁹ Naaman nèn wìy, e tìím e Elisha shùu lav wùn à nyám se ŋkoʼ si, à viténtén ve səŋ nyám vi.

¹⁰ Elisha túm wír ji wù suúy á e Naaman jii, «Dùu, e sù wún wóo é ndzəv yee Jordan kàŋ saàmbà, é wún wóo kfə́n fó, áà bónén.»

¹¹ Kí nyár Naaman, wù nèn a kfən e bàm, a suúy jii, «M kì kí ji wìr və̀n yíi fəə, wíy tiim fo m dzəə̀n, yoŋ yír Nyùy Tàr woo Nyùy və, shaa e wó rəə́ é virə̀ʼ ve ví yárí, é shìvnsay bónén.

¹² Bó ndzə́v yee Abana wùn à yee Farpar se sí dzə̀kìn é Damaskus si yoʼ bòŋ, e shaà ndzə́v seé Isray sidzə̀m à? Bó yòʼ kì dzə̀ m sù wún wóm a dzə̀ fó, e bònén à?» Wù nèn bìnkìr, a kfən e bàm, a kilòŋ kí shwiiy wun e ŋàŋ.

¹³ Ŋgaà və lìm kóʼtí, e sùúy e wun jii, «Tàr wor, a ŋgaà ntum Nyùy və̀n kì yòŋ ji à yii a dzə̀ kinyo ke ghaʼán kímóʼ kí, bo bó à yoʼ lò yiì à? Wáa ghaʼ ka lèn wo wù yòŋèn ji à du, e sù a dzə̀ wún, e nèn bònén.»

¹⁴ Naaman nèn sə̀y é ndzəv yee Jordan, e dù, e gbù sho kàŋ saàmbà mo ŋgaà ntum Nyùy kì yòŋèn, e kù nèn bònén, wún vəə́ wáa dzə moo wó wan wo bór bèy.

¹⁵ Naaman wùn aàŋgàa ŋgoo vəə́ nèn kfə̀n é bàm fo ŋgaà ntum Nyùy, e tìím e si wo, e sùúy e wun jii, «M kìíy ne lèn rú ji bó Nyùy wùmòʼ yòʼ kfə̀n dzə̀ shó e kitu ke nsay, e shaà woó Isray. Kò ri fómo wo ŋgaà wò lìm wìyìn shó.»

¹⁶ Elisha bìnèr jii, «Mo Nyùy Tàr wo m ghvə́mé dzəə̀n shó e tin, yòʼ dzə̀ m sə̀ kifá fo wò.» Naaman ku lòn ji wù wàá sə́, wù tén.

¹⁷ Naaman nèn sùúy jii, «A lò a dzə, a bó yòʼ dzə̀ à sə̀, à kù fò ri ŋgaà lìm wò nsay ye vimbèʼbìy vibaà ví beʼey, é m wáa kfən sho. Kèʼ fo lèn, m yòʼ dzəə́ yiì a cu nyùy wùmòʼ, e shaà Nyùy Tàr, kìn m yii cu yee rəy, kìn m yii ye tonèné.

¹⁸ Yii bèy, kinyo ki dzə̀ kimòʼón ke m lón ji lá Nyùy Tàr yòʼ lèéy a kee shooy. Mo Tàr wor woo fon yii nəə e lav cù ji wun cu nyùy woo Rimmon, wù wàa yeʼtí a dzə̀ e mǒ wùn, m nèn a gvəʼə́r sa kitú e nyùy woo Rimmon si. M lóo yiì bèy, Nyùy Tàr kù làysìn a kee shooy.»

¹⁹ Elisha suúy e wun jii, «Kinyo ki yòʼ dzə̀, ghán kijuŋ.» Naaman nèn lò, a dù.

²⁰ Gehasi woo ŋgaà lìm Elisha siíy, e nèn kwàʼtì jii, «Yén búʼú mo tàr wor màʼtìn ne Naaman woó Siiria, wù wáa dù, e làa yòʼ sə kifá fo vifa ve wù kì wìyìn shó. Kee Nyùy yir kí, m lo, e jùmrì wun, e sə kifá fo wun.»

²¹ Gehasi kwàʼtì bèy, e nèn a jùmrì Naaman. Naaman yén, a wìr nyéŋ, wiy e wun bàm, wù nèn sə̀ʼə́y fo kitu ke kar ye səŋ nyám si, e dù, wùn wun tárnín. Wù dzə́r shó jii, «Kinyo ki dzə̀ a?»

²² Wù bìnèr jii, «Kinyo ki yòʼ dzə̀. Yii bèy, tàr wor tùm mo ji m yoŋ e wò a jii, ‹Wónlě nsùm veé ŋgoo aŋgàa ntum Nyùy ámóʼó lò, e sàsìn, e wìy lèn abaà fó wòŋ agwan woo Efrayim. Kii wò, à ku fò á *kisha ke mbàm ke fəvír kí ansə̀kì ataár, wùn à ndzə̀y sé ŋkàʼ sí sibaà.› »

²³ Naaman nèn bìnèr jii, «Ku kò rì kisha ke mbàm ke fəvír kí nsə̀kì ntuùfú.» Wù suúy bey, e nèn kùr kisha ke mbàm kìy vibam vibaà wùn à ndzə̀y sé ŋkàʼ sí sibaà, e fò áàŋgàa lìm və́ ámóʼó abaà, á keérí, a dù sho e Gehasi mbìy.

²⁴ Á meé é kitu ke gwan, Gehasi sə́ vifá vìy fo áwune, e lèm e lav, e nèn tsəə̀né áwune, á wáa dù.

²⁵ Á dù, wù nèn nə̀ə́, e tìím e tàr wóv si. Tàr wov Elisha dzə́r shó jii, «Gehasi, à kì dzə̀ feé?» Wù bìnèr jii, «Ŋgaà wò lìm yoʼ lò dù e kirə̀ʼ gheéy.»

²⁶ Elisha suúy shó jii, «Bó m yòʼ kì dzə̀ wòsò e kiyòy à, e ghan se wìr və̀y kì səʼəyin fó kitu ke kar ye səŋ nyám si, e wìy, vèn wun tárnín à? Ghán sin si yòʼ dzə̀ se dzə̀ á sə̀ mbàm kìn ndzə̀y, kìn súm sé vici vé *oliv, kìn sé vitiír vé *vayin, kìn anjiì, kìn anàʼ, kìn aŋgàa lìm vee vilum wùn à vee vikìyí.

²⁷ Á bèy, bo shìvnsay ye yì kì dzəə̀n e Naaman wùn lo, e gbù e wò wùn, e gbù e rám yée wùn, e wìy dù, e jòʼsì.» Gehasi nèn lò fo tàr wóv si ji wun waà sí fəə́, a shìvnsay gbú ne e wùn wó, wù wáa fər moo kfə́m bey.