2 Afòn 2 - ŊWÀʼ NYÙY

Elija kóʼ é yuv

¹ Elija wùn Elisha nèn lò fo Gilgal, a dù, a sì ghán se Nyùy Tàr‑iì yíi lì Elija e yuv é mvə̀m kiìkir.

² Elija suúy e Elisha jii, «Kii wò, gòʼ fen, bìʼ fo Nyùy Tàr tumen mo ji m du á e Betel.» Elisha nèn kàn kitú kfə́, e shìvìr jii, «Mo Nyùy Tàr dzəə̀n shó, aà kfə̀n dzə̀ shó, yòʼ dzə̀ m màʼtì wò.» Á bèy, áwune nèn sə̀y é Betel.

³ Shiŋgoo she aŋgàa ntum Nyùy she shí‑iì dzəə̀n é Betel shi wìy, e yèn Elisha, e sùúy sho jii, «À kì ji Nyùy Tàr yíi sə tàr won lìm fo wò lán a?» Wù biímé jii, «Eè, m kì bey, yii bèy, lá vèn yòʼ dzəə yòŋ.»

⁴ Elija kfən sùúy e Elisha jii, «Kii wò, gòʼ fen, bìʼ fo Nyùy Tàr tumen mo é Jeriko.» Elisha ku sùúy jii, «Mo Nyùy Tàr dzəə̀n shó, aà kfə̀n dzə̀ shó, yòʼ dzə̀ m màʼtì wò.» Á bèy, áwune nèn dù e Jeriko.

⁵ Shiŋgoo she aŋgàa ntum Nyùy she shí‑iì dzəə̀n é Jeriko shi kóʼtí, e wìy e Elisha ghaŋ, e sùúy sho jii, «À kì ji Nyùy Tàr yíi sə tàr won lìm fo wò lán a?» Wù biímé jii, «Eè, m kì, yii bèy, lá vèn yòʼ dzə́ə a yòŋ.»

⁶ Elija kfən siì sùúy e Elisha jii, «Kii wò, gòʼ fen, bìʼ fo Nyùy Tàr tumen mo ji m du á e shùu ndzəv yee Jordan.» Elisha kfən siì yòŋ jii, «Mo Nyùy Tàr dzəə̀n shó, aà kfə̀n dzə̀ shó, yòʼ dzə̀ m màʼtì wò.» Á bèy, áwune vee abàá nèn a dù.

⁷ Wíri wáa jùmrì áwune mtàn fo shiŋgoo she aŋgàa ntum Nyùy. Elija wùn Elisha dù, e tìím e ghaa Jordan, áwune wáa tiy kév ntàm, a leéy.

⁸ Elija shóʼ kikúm kfə́, e kaàrí, e dzə̀v ndzə́v shó. Ndzə́ví nèn jàvsìn mbìv sibaà, áwune vee abàá túm é nsay ye yumér.

⁹ Áwune túm bey, Elija suúy e Elisha jii, «Suúy kinyo ke à taʼ é m yii e wò ki, é bo á sə́ mo fo wò.» Elisha bìnèr jii, «Kii wò, ku fò mbìv sí e mò sibaà fo wò vitaaví, é m li kirə́ʼ ké.»

¹⁰ Elija yòŋ sho jii, «À lòn a dzə̀ kifá ke tavín kí. Yii bèy, a kí fen kòóy ji Nyùy wáa lì mo, aà yéné, bo à yíi a ker vitaáví vee shooy. Wáa dzə, aà yòʼ yéné, bo bó à yòʼ yíi a ker.»

¹¹ Áwune kú a suŋnín, a dù e dzəə. Kár ye səŋ nyám sií sàsìn, e fəə̀sín aáwuné si, a yí dzə̀ və́y və́y, a nyám se ŋkoʼ se sí səŋ si kù dzə̀ sá və́y və́y. Kár yìne jàvsìn áwune, kiìkir nèn lì Elija, e kòʼ shó e yuv.

¹² Elisha yén kinyo kìn, a toŋ kitávín jii, «Yímóy tàr wor, tàr wor, ntav wo wù kiŋ Isray, à dù ne bèn à?» La Elisha yòʼ dzəə yèn Elija. Wù nèn ghàr ndzə̀y sə́, e tiìné e ntìntìn.

¹³ Elisha lì kikúm ké Elija ke kí kì tumen fo Elija wùn, a kfən sho. Wù dù, e tìím e ghaa Jordan,

¹⁴ e dzə̀v ndzə́v shó, dzəv bèy, suuy jii, «Nyùy Tàr woo Nyùy Elija bèé?» Wù dzə̀v bèy, yí nèn jàvsìn mbìv sibaà, wù túm.

¹⁵ Shiŋgoo she aŋgàa ntum Nyùy she shí‑iì dzəə̀n é Jeriko shi yén Elisha, a wù wiyì, e nèn a yòŋ jii, «Elisha sí kér vitaáví vé Elija.» Áwune nèn dù, wùn áwune tárnín, á tsə́m ndzəə́, e làʼ kitú fo nsay e wun si,

¹⁶ a suúy sho jii, «Vèr kér wíri fen mtàn, a dzə̀ antav adzə̀m. Ku màʼtì, aá du, e tàʼ tàr won lìm. A tàm bo Kiyoy ke Nyùy Tàr kí lì ne wun, e màʼ e kitu ke gwan wùmòʼ, kìn é kiwoóy kímóʼ kí.» Elisha sháʼnín jii, «Àáy, lá vèn yòʼ tùm áwune.»

¹⁷ Áwune kú a tav tavín, dzə̀rkìtu koó wun, wù màʼtì ji á wàá du. Á nèn tsə̀nsí wíri mtàn, á dù, e tàʼ Elija vishiíy vitaár, e làa yòʼ yen.

¹⁸ Á kfə́n fo Elisha wùn, a wù dzə̀ é Jeriko fo wù‑uù beèn, wù suúy aáwune jii, «Bó m yòʼ‑oo lo yòŋ ji lá vèn yòʼ dù à?»

Viŋgaʼnìn ve vinyò ve Elisha

¹⁹ Wír veé Jeriko ámóʼó sii wìy, e yèn Elisha, a suúy sho jii, «Mvə̀mlaʼ rə̀n dzə̀ rú e juŋ, a wò woo tàr wor kì, yii bèy, a mendzə́v mè dzə̀ mebí. Mè yii, aá táŋ vikìy táŋén.»

²⁰ Wù suúy ji á wáy á shiŋgwáŋ e kighin ke fíy ki, e wìy sho, e fò á e wun. Á wáy, e wìy, e fò shó.

²¹ Wù nèn lì shiŋgwáŋ shìy, e dù, e wày é ntoò ndzə̀v, wáy bèy, suuy ji Nyùy Tàr suuy a jii, «Mo woo Nyùy Tàr, m yiì ne, mendzə́v mèn mè kfə́n ji me juŋ mè, a mè yòʼ dzəə́ yiì a yiì, é wíri wáa kpukír, kìn ji á wáa taŋ vikìy táŋén.»

²² Kèʼ fo ghan fóo fèy, e wìy shem lán, mendzə́v mè ku nèn gòʼ, a dzə mejuŋ, kù mo Elisha‑aà yòŋèn.

²³ Elisha nèn lò fo Jeriko, a koʼ e Betel. Wù lòo dù e dzəə, wónlě nsùm ámóʼó fəə́ fó ŋkàlaʼ, a sə̀ʼ wun, a yòŋ jii, «Mfeesìkìtu, á koʼ, mfeesìkìtu, á koʼ.»

²⁴ Wù bìnkìr, e lèéy áwune, e ròʼ e Nyùy Tǎr yir. Viyìy vé nyàm ye á yoŋ ji *bear vímóʼ ví nèn fəə̀ fó kòv vibaà, e yùyrí wón fo áwuné mvəm nshòv sibaà e mkweè, e sàtì e vinsàr vinsàr.

²⁵ Elisha lò fo fo, e kòʼ é Gwan Karmel, e siì kfə̀n é Samaria.