2 Afòn 18 - ŊWÀʼ NYÙY

Fòn Hesekiya woó Juda

¹ Vé‑eè kòʼór Hesekiya woo wan Ahas ji fon woó Juda, a Hoshea woo wan Ela sí sáʼ e Isray ji viyá vitaár.

² Vé‑eè kòʼór wun, a wù dzə̀ viyá nshòv sitàn e mbaà. Wù sáʼ vifon kiyá nshòv bvə̀ʼə̀ e mbaà, a wù dzə́ e Jerusalem. Yír yè woví‑iì dzə̀ Abi, a dzə̀ wan Sekariya.

³ Hesekiya‑aà yii vinyo ve ví wáa gheén Nyùy Tàr, kù réŋréŋ mo tàr wov Davir‑iì yii.

⁴ Wù‑uù kètì virə́ʼ vé anyùy, e mènrì sə́y si, e gwàtì wúr sé nyùy woo *Ashera. Wù‑uù bvə̀ʼə́y sá yó ye Mooser‑iì fèrìn e kisha kee *brons ki, bìʼ fo wír veé Israyi‑iì ton kiláy, ghvə́m sho, yoŋ yír ji Nehushtan.

⁵ Hesekiya‑aà wày shilív e Nyùy Tàr woo Nyùy wìr veé Isray wùn. Bó fòn wùmòʼ yòʼ‑oò lo ghàn a dzə e Juda moo wun, kìn fo ve vé‑eè siìn fo wun mbìyi, kìn ve vé‑eè wìyìn fo wun bàmé.

⁶ Wù‑uù jumrì Nyùy Tàr féyì, a bó wù yòʼ‑oò lo ghàn sìíy yàr fó a jùmrì wun. Wù‑uù yú nsər se Nyùy Tàr‑iì foon e Mooser.

⁷ Á bèy, Nyùy Tàr nèn a dzə wùn wun, kinyo kfə́ kidzə̀m ke wù‑uù yii ki wáa dù duùn fó mbìy. Wù nèn wìy lò, e tèn sáʼ fòn woó Assiriya, e làa yòʼ dzə́ə a lìm fo wun.

⁸ Wù kfə̀n‑eè tòn wír veé Filistia, e kùúy vifá vév, e kèʼ fo ntèʼ ŋkiy, e dù, e mèé e ŋkàlaʼ ye vé‑eè bomen kay, e kaàrí sho.

⁹ Wáa dzə e kiya ke Fòn Hesekiya‑aà sí sáʼ ji viyá vikweè, a Fòn Hoshea woó Isray woo wan Ela sí sáʼ ji kiyá saàmbà, Fòn Shalmaneser woó Assiriya nèn kòʼ é Samaria, e gìm ŋkàlaʼ e rə́r sí, e sə̀tí fó.

¹⁰ Wáa dzə e bǎm viya vitaár, wír veé Assiriyàa nèn sə̀ fó. Kin ki‑iì kooy bèn, a Hesekiya sí sáʼ ji viyá ntuùfú, a Hoshea woo fon woó Isray sí sáʼ ji kiyá bvə̀ʼə̀.

¹¹ Fòn woó Assiriya‑aà kùúy wír veé Isray, e dù sho e Assiriya, e lèm ámóʼó é Hala, e lèm ámóʼó é Gosan, e ghaa ndzəv yee Habor, ámóʼó é ŋkà se laʼ seé Media.

¹² Vinyo vìn vi‑iì kooy bèn bìʼ fo wír veé Israyi yòʼ‑oò ló a yunín Nyùy Tàr woo Nyùy wov. Áwune‑eè shòʼór *mensaŋ me Nyùy Tàr, e shòʼór nsər sidzə̀m se Mooser woo ŋgaà lim Nyùy Tàr‑iì foon aáwune. Áwune yòʼ‑oò ló a yu kinyo, a bo áwune yòʼ‑oò ló a yiì mo nsər dzəə̀n.

Wír veé Assiriyàa bémér wír veé Jerusalem

¹³ Wáa dzə, a sì ji kiyá nshòv sikweè e ghvə̀m mo Fòn Hesekiya‑aà saʼan ne, Fòn Sennakeriv woo fon woó Assiriya nəə́ rə́r é ŋkà se laʼ se bomen sí seé Juda, e tòn fó.

¹⁴ Fòn Hesekiya woó Juda tsə́nsí ntum e fòn woó Assiriya e Lakish jii, «M yiì ne kibí. Kii wò, ku fəə̀ fo mǒ nsay, é m fó wò kifá ke à taʼ ji m fó.» Fòn woó Assiriya nèn dzə̀r *kisha ke mbàm ke fəvír kí akilu nsə̀kì ghvə̀m, e dzə̀r ke baar kí akilu nsə̀kì.

¹⁵ Á bèy, Hesekiya nèn fò kisha ke mbàm ke fəvír kí kidzə̀m e wun ke kí‑iì dzəə̀n e Nyùy Tǎr lav, e kfə̀n fò ke kí‑iì dzəə̀n é kitàv keé ntoʼ.

¹⁶ Wù kfə̀n‑eè bàytì kisha ke mbàm ke baar kí ke wúnwun‑eè laʼtin é mboòmè se shuù se lav cù, e fò kidzə̀m e fòn woó Assiriya.

¹⁷ Fòn woó Assiriya nèn lò kfə́, e tsə̀nsí amfòómé və́ ataár wùn à vé rərí agháʼán fó Lakish ji á du á e Jerusalem, e nə̀ə́ a Fòn Hesekiya e rə́r sí. Á kóʼ, e mèé e Jerusalem, e tìím e nshwǎn ndzəv wo wú sə́y fo kisə̀m kee fó kùy, a wú dzə̀ é ghaa dzəə ye yì du e kirə̀ʼ kee fo á yii su ndzə̀y.

¹⁸ Áwune jàŋ fon, nèn fəə̀ wíri ataár, e yèn áwune, a vé‑eè dzə̀ jii, taà ntoʼ woo Eliakim woo wan Hilkia wùn à Shebna woo ŋgaà saŋ woó ntoʼ, à Joa woo wan Asav wo wù‑uù fiʼtì sáʼ fòn.

¹⁹ Mfòómé wo wù‑uù sáʼ rə́r nèn sùúy aáwune jii, «Vèn du, e tiìsí e Hesekiya jii, fòn wo wiy woo fon woó Assiriya dzə́r a jii, ‹À tìír vifií vé a dzə̀ feé, bó a kwàʼ kwàʼàn ji dzə̀ à tàm wòsò?

²⁰ À kwaʼ ji shuu wo kumèné dzə̀ vifií a? Wú dzə̀ vitaáví ve dzə̀ ví màʼ rə́r a? À yèʼtí a dzə̀ e lá wùn, bó a tav kitú wòsò?

²¹ Kí à yèʼtí a dzə̀ e Ejiv wùn. Ejiv kù dzə̀ kinsàn ke mbàŋ ke a wìr yèʼtí sho, kí sòv kiwó kfə́. Á mo Farao woo fon woó Ejiv dzəə̀n é ghan se wìr yeʼtin e wun wùn.› »

²² Mfòómé kfə́n a suúy jii, «A vèn yoŋ e mò ji vèn tíy a dzə̀ e Nyùy Tàr woo Nyùy wón wùn, kí bo dzə̀ wun wo Hesekiya‑aà kètìn virə́ʼ və́ vé cù wùn à kíy sə́ sé cù si, ketì, suuy e wír veé Juda wùn à veé Jerusaleme ji á kù kér fó a cù Nyùy cáʼcáʼ a dzə̀ é mbìy kiy cù wo wú dzəə̀n é Jerusalem.

²³ Vèn yú, kitú kém kee fon woó Assiriya ki yoŋ e Hesekiya ji wun yíi fo wun a nyám se ŋkoʼ ansə̀kì abaà, a wù fèn kér a vé koʼo.

²⁴ Bó yòʼ dzə̀ Hesekiya fə̀m tàm wùn à shimfòómé shé tàr wor lìm shi gheéy. Wù kér ka, a wù yéʼti a dzə̀ e Ejiv wùn é kinyò ke *vitentén vé rər, wùn à vé koʼo?

²⁵ Tàr wor yoŋ e Hesekiya ji wù sà kwaʼtì ji wun wìy, a laàr woŋ və̀n bèn, a Nyùy Tàr yòʼ kì fó fo a? Kù sùúy a wun woo Nyùy Tàr e tàr wor lìm, ji wù nəə́ á rə́r, e laàr a woŋ və̀n.»

²⁶ Eliakim wùn à Shebna, à Joa suúy e mfòómé wo wù‑uù sáʼ rə́r jii, «Kii wò, á suŋnín aàŋgàa lìm vée a dzə̀ é Lǎm Aramayik, vèr yú lám woo shooy. Lá à yòʼ a suŋnín e vèr é Lǎm Hibru, fo wír ve á dzə́ e kitu ke kày ŋkàlaʼa wáa yu.»

²⁷ Yii bèy, mfòómé bìnèr aáwune jii, «Vèn kwaʼ ji fòn tùm mo ji m tiísí ntum rə̀n a dzə̀ e vèn à fòn cáʼcáʼ à? M súŋnin sa e wír ve á dzə́ e kitu ke kàyi. Áwune dzə̀ ben, aá kù yíi a yi sa jáŋ yév, a no mejiiyì mev moo ven.»

²⁸ Á bèy, mfòómé nèn tùm é yuv, e jàŋ kitávín é Lǎm Hibru jii, «Vèn yuúrí kinyo ke fòn wo wiy wo dzəə̀n fon woó Assiriya suuy e vèn kí.

²⁹ Fòn suuy jii, ‹Vèn wáa yen fo Hesekiya bóʼtí ven. Yòʼ dzə̀ Hesekiya, wù fə̀ə́r ven fo mǒ kiwo.

³⁰ Lá Hesekiya yòʼ bòʼtí ven, wù suuy ji vèn wáa yeʼtí a e Nyùy Tǎr wùn, a wun woo Nyùy Tàr yíi teʼtín a rú fo vèn à ŋkàlaʼ yen nəə́ á e fòn woó Assiriya kiwo.›

³¹ «Lá vèn yòʼ a yuurí kinyo ke Hesekiya. Fòn woó Assiriya suuy jii, vèn fəə́ á fo ŋkàlaʼ, e gbù a wun, é wìr mòʼón mòʼón nèn a dzə ji nyaáŋ e wun laʼ, a kfər báŋ se sí loòn fo wun kitiír ké *vayin, a kfər sa *fig wo wù kù lo a dzə̀ fo ŋgaàŋ kici, e kfə̀n a no mendzə́v, a kù dzə̀ fo wun ndzəv ye tuŋéné.

³² Vèn kù wíy a dzə bèy, e dù meé mo wun waà wíy wìy, e lì a ven, e dù sho e nsay ye yì dzəə̀n moo yéen. Nsay, a dzə̀ nsay vifa ve yi, nsay, a yì kfə̀n fó meluʼ, kfə́n a dzə nsay vicì vé *oliv, à ye vilù. A vèn ghvə̀m jí sìn, bo vèn lùŋ ne, a vèn yòʼ dzəə́ yìi kpukír. «Vèn wáa yen fo Hesekiya bóʼtí ven, é vèn wáa kwàʼtì ji Nyùy Tàr yíi fəə́r a ven fo mǒ kiwo.

³³ Anyùy veé vitum, a fə̀m dzə̀ kiné kí, vé‑eè ghàn ne fə̀ə́r kitúm kév fo fòn woó Assiriya wo a?

³⁴ Anyùy veé Hamat wùn à veé Arpadìi bèé lèn? Anyùy veé Sefarvayim wùn à veé Hena, à veé Ivvàa bèé lèn? Vé‑eè lò fə̀ə́r Samaria fo mǒ kiwo a?

³⁵ Dzə̀ viné vee anyùy fo anyùy vitume, ve á fəərin ne vitúm vév fo mǒ kiwo? A dzə̀ Nyùy Tàr ghàn kfə́ é le, e bóo fəə́r Jerusalem fo mǒ kiwo?»

³⁶ Yii bèy, wíri ku gòʼ gòʼòn kisə́sə, la wìr yòʼ bìnèr kinyo e wun, bìʼ fo Fòn Hesekiya kì shìvtìn ne ji wìr wáa yen a fó yìi mvə̀ʼ shuu.

³⁷ Á bèy, Eliakim woo taà ntoʼ wùn Shebna woo ŋgaà saŋ woó ntoʼ, à wàn Asav woo Joa wo wù‑uù fiʼtì sáʼ fòn nèn dù, e yèn Fòn Hesekiya, aáwune sátí ne ndzə̀y fo áwuné wùn. Á yén fon bèy, e nèn fìʼtì kinyo ke mfòómé woó Assiriya kì suuyin.