2 Afòn 16 - ŊWÀʼ NYÙY

Fòn Ahas woó Juda

¹ Vé‑eè kòʼór Ahas woo wan Jotam ji fon woó Juda, a Fòn Peka woo wan Remalia sí sáʼ Isray ji kiyá nshòv saàmbà e ghvə̀m.

² Ahas‑iì dzə̀ kiyá mbaà é ghan se wù‑uù kèʼèn, a saʼ. Wù sáʼ kiyá nshòv ntuùfú e ghvə̀m, a wù dzə́ e Jerusalem. Wù yòʼ‑oò ló a jùmrì kinyo ke tàr wov Davir. Á bèy, wù nèn a yiì vinyo vee la ví yòʼ a gheén Nyùy Tàr woo Nyùy və.

³ Wù‑uù jumrì a dzə̀ vinyo ve afon veé Israyi‑iì yii. Wù kfə̀n‑eè bìʼnìn viŋkoʼòy ve vinyò ve vitúm ve Nyùy Tàr‑iì jùmèn fo wír veé Isray mbìy vi‑iì yii. Wù‑uù lì wán və, e tòn, e cù anyùy sho.

⁴ Wù‑uù yii cu si, ton kiláy é virə̀ʼ vé anyùy, e kù a yiì bèy e vitu ve agwan, a yiì e sar se vici ve ví rə̀ŋsìn vidzə̀m.

⁵ Resin woo fon woó Siiria wùn Peka woo fon woó Isray‑iì kòʼ ji á funen á Jerusalem. Á kóʼ bey, e sùm fó e rə́r sí, e làa yòʼ yu fóo tòn Fòn Ahas.

⁶ E ghan sin, fòn woó Edom nèn sə̀ Elat e bàm, e jùm wír veé Juda fo fo. Wír veé Edome nèn wìy e Elat, a dzə fo e wìy shem lán.

⁷ Fòn Ahas‑iì tùm wíri fo Tiglat‑Pileser woo fon woó Assiriya wùn ji á suúy á sho ji wun dzə̀ á wír və lìm, e kfə̀n a dzə a ji wán və. Wù wàá kóʼ, e sə̀ á wun fo fòn woó Siiria wùn fòn woó Isray wo. Á wìy a ne, e nə̀ə́ a wun e rə́r sí.

⁸ Ahas‑iì lì sá *kisha ke mbàm ke fəvír kí wùn à ke baar kí ke kí‑iì dzəə̀n e Nyùy Tǎr lav, e kfə̀n lì ke kí‑iì dzəə̀n é kitàv keé ntoʼ, e tsə̀nsí e fòn woó Assiriya ji fómo.

⁹ Fòn woó Assiriya dù, e yù kinyo ke Fòn Ahas, e lì vé rər və́, e dù sho e Damaskus, e tòn fó. Wù‑uù yùyrí Fòn Resin, e koòrí wíri, e dù sho e Kir.

¹⁰ Fòn Ahas nèn dù e Damaskus ji wun du, e yèn á Tiglat‑Pileser woo fon woó Assiriya. Wù dù bèy, e yèn kíy cù fo, e nèn tsə̀nsí mfìʼ sə́ e Uria woo taà cù, e kfə̀n naàrì mo wú dzəə̀n wùn à kinyo kfə́ kí kidzə̀m.

¹¹ Á bèy, Uria woo taà cù nèn kù fèr kíy cù wúmóʼó réŋréŋ, e mfìʼ se Fòn Ahas‑iì tsənsin fó Damaskus si, e màysì, é bo wù wáa kfən e bàm.

¹² Wù wìy fo Damaskus, e yèn kíy cù və̀y, e kòʼtí e ghaŋ wo, a yiì cu si fó.

¹³ Wù‑uù yiì cu ye tonèné, e kfə̀n yiì cú vifa ve yi, à yé melùʼu, e wàŋrí mensə́ me cù kikòŋnìn e kitú ke kiy cù.

¹⁴ Kíy cù woo kisha kee *brons ki wo yì‑iì dzəə̀n wó Nyùy Tàrí‑iì tíy e nsàn kiy cù wo fíyi wùn à lav cù. Ahas nèn tsə̀ʼ, e lèm e mbìv yee kuy fo və́ woo kíy cùu.

¹⁵ Wù‑uù fò nsər e Uria jii, wù kú a tòn a cu ye tonèné yee kijàvndzə wùn à cú vifa ve yi yee ŋkuùri, à cú fòn ye tonèné wùn à rə́ yé vifa ve yii, à cú wìr dzə̀m ye tonèné wùn à yév yé vifa ve yii, à yé melùʼu, a dzə̀ á e kitu ke kiy wo kuʼùn wo fíy və̀ne. Wù ku kfə̀n wàŋrí a mensə́ me cù e dzə̀m a dzə̀ á e kitu ke kiy cù fèn, kìn dzə̀ me cù ye tonèné, kìn me cù símóʼ sí. Yii bèy, wun yií lóo tàr ke tarìn kí, é wun wáa tàr a dzə̀ á e kiy cù woo kisha kee brons ki.

¹⁶ Uria woo taà cù ku nèn a yiì réŋréŋ mo Fòn Ahas‑iì yòŋèn e wun.

¹⁷ Fòn Ahas‑iì tsə̀ʼ mbìʼ sé mendzə̀v fó vitiir vév vee kisha kee brons ki, e tìnrí vitiir e vintsə̌m vintsə̀m. Wù kfən tsə̀ʼ sa màkìghìn fo ambòŋ vee nshòv sibaà e ghvə̀m ve vé‑eè fèrìn e kisha kee brons kí ndzə̀m, e tìír a dzə̀ é mfiì se vé‑eè fiìn maàndzə sho.

¹⁸ Ahas kfə̀n‑eè tsə̀ʼ sá kirə́ʼ ke vé‑eè fèrìn, a tiír kàvàʼ sho e lav cù, e sə̀tí shúu kishem wo fòn‑eè nəə fo fo e lav cù. Wù‑uù yiì vinyo vìn vidzə̀m bìʼ fon woó Assiriya, e fíʼ koóy nshwì və́.

¹⁹ Ké vinyò vímóʼ ví vee Fòn Ahas woó Juda mvə̀m saʼ, à vinyo ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

²⁰ Fòn Ahas‑iì lày, á lìtì wun aàtàr vəə́ ghaŋ e Ŋkàlaʼ Davir. Hesekiya woo wán və nèn yì ntaʼ və, a saʼ vifon.