2 Afòn 14 - ŊWÀʼ NYÙY

Fòn Amatsiya woó Juda

¹ Vé‑eè kòʼór Amatsiya woo wan Joash ji fon woó Juda, a Fòn Jehoash woo wan Jehoahas sí sáʼ Isray ji viyá vibaà.

² Amatsiya‑aà dzə̀ kiyá nshòv sitàn e mbaà e ghan se vé‑eè koʼorin wun ji fon. Wù sáʼ vifon kiyá nshòv bvə̀ʼə̀ e mbaà, a wù dzə́ e Jerusalem. Yír yè woví‑iì dzə̀ Jehoaddin, a dzə̀ wán woó Jerusalem.

³ Amatsiya‑aà yii vinyo ve ví wáa gheén Nyùy Tàr, yii bèy, a bó wù yòʼ‑oò lo mèʼ Davir woo tàr à atàr vév. Wù‑uù yii vinyo vidzə̀m kù réŋréŋ mo tàr wov woo Joash‑iì yii.

⁴ Virə́ʼ ve vé‑eè kóʼ, cu anyùy fo vi kù‑uù gòʼ fó, la wù yòʼ kètì, wíri kú a yiì cu si, e kfə̀n a tòn kiláy fó.

⁵ Sáʼ Amatsiyàa‑aà tùúy, wù nèn yùyrí atǎr ntoʼ ve vé‑eè laàrìn fon woo tàr wov,

⁶ yii bèy, e bàvtí wón vév, e làa yòʼ yuyrí. Wù kù‑uù yùnín a dzə̀ nsər Nyùy Tàr ye vé‑eè saŋen é Ŋwàʼ Nsər Mooser jii, «Yòʼ dzə̀ á yùyrí atàr bìʼ jay wòn vév, a bó yòʼ dzə̀ á yùyrí wón bìʼ jay atàr vév. Wìr kù yíi a kpu a dzə̀ fo və́ə woo jay.»

⁷ Amatsiya‑aà nə̀ə́ Edom e rə́r sí, e yùyrí wír vév nsə̀kì ghvə̀m e Kiwoóy ké Shiŋgwaŋ, e faàsì ŋkàlaʼ yee Sela, e nèn shù yír ji Jokteel, a kù dzə̀ə́ yír rə́, e wìy meé lán.

⁸ Amatsiya ku nèn tsə̀nsí vé ntume fo Fòn Jehoash woó Isray, woo wan Jehoahas woo wan Jehu, ji wù wàá wiy, é wùn wun wàá tárnín moo vilum bèy.

⁹ Fòn Jehoash dù, e bìnèr ntum e Amatsiya woo fon woó Juda jii, «Kitiír ké kikwiíy keé Lebanon ki‑iì sùúy e kicí ké *sidar keé Lebanon ki jii, ‹Fó wan wò woo wiíy e wan wom woo lumèn ji wíiy və.› Nyàm kwaʼ yeé Lebanon nèn lòo shaà fo, e nyèŋrì kitiír kiy e wuú.

¹⁰ À fùnèn ne, e ghàʼ Edom, e nèn a koʼór wún. Á dzə e laʼ, a sheʼrí a dzə̀ ton ye à fùnèn Edom, e tòne. À taʼ shuu wo dzə̀ wú wìy e ŋgeʼ si e vèn à Juda kitu bèn bìʼ ka?»

¹¹ Yii bèy, la Amatsiya yòʼ yuùrí. Fòn Jehoash woó Isray nèn kòʼ, wùn Fòn Amatsiya woó Juda tárnín moo vilum bèy, e ghày rər, e Bet‑Shemesh e Juda.

¹² Isray nèn tòn Juda, wìr dzə̀m woó Juda nyéŋ, e kfə̀n e wun laʼ.

¹³ Fòn Jehoash woó Isray koó Amatsiya woo fon woó Juda, e nèn dù e Jerusalem, e bvə̀ʼ mbìv kirə̀v ké kày yee kèʼ fó shùu kày wo á yoŋ ji wó Efrayim, e dù, e mèé e shùu kày wo á yoŋ ji woó kor. Mbìv kirə̀v rə̀n‑eè dzə̀ moo kóy wií bey.

¹⁴ Wù‑uù kùúy *kisha ke mbàm ke baar kí wùn à ke fəvír kí, à vifá vee Nyùy Tǎr lav vi, à veé ntoʼ vi vidzə̀m, e kfə̀n shó e Samaria. Wù‑uù lì sá kfə́m sé wìr símóʼ sí, e dù sho ji aáwune sìíy, e kfə̀n a ŋaʼrí, bo á waà yúyri.

¹⁵ Ké vinyò vímóʼ ví ve Fòn Jehoash‑iì yiìn, à mo vitaáví və́ ví‑iì dzəə̀n, à funèn ye wù‑uù fùnèn Amatsiya woo fon woó Judàa, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

¹⁶ Wù‑uù lày, á lìtì wun aàfon veé Israyí ghaŋ e Samaria. Wan və Jeroboam woo baà nèn yì vifon, a saʼ e wun ntaʼ.

Kpú Fòn Amatsiya woó Juda

¹⁷ Fòn Jehoash woó Isray woo wan Jehoahas‑iì lày, Fòn Amatsiya woó Juda woo wan Joash kfən sìíy, e dzə̀ʼə̀m kiyá nshòv sitàn e ghvə̀m.

¹⁸ Ké vinyò vímóʼ ví vee Fòn Amatsiya mvə̀m saʼ, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

¹⁹ Vé‑eè kùr menàŋ é Jerusalem mo á ló ghan, e bóo yuyrí Amatsiya. Wù nèn lèʼ, e dù e Lakish. Á tsə́nsí wíri e wun bàm é Lakish, á yúyrí wun fo.

²⁰ Á yúyrí bey, e bèʼèy dzə́n rə́ é kitu ke nyàmŋkoʼ, e kfə̀n shó e Jerusalem, e lìtì wun aàtàr vəə́ ghaŋ e Ŋkàlaʼ Davir.

²¹ Wír veé Juda adzə̀me nèn lì Ussiya woo wán və, a wù dzə̀ viyá nshòv ntuùfú e ghvə̀m, e bùn ji fon, wù wáa saʼ e Amatsiya woo tàr wóv ntaʼ.

²² Dzə̀ wun wo wù‑uù yiìn, ŋkàlaʼ Elat kfə́n ji ye wìr veé Juda, a tàr wov láy ne. Wù kfən bàʼrì ŋkàlaʼ yee shooy, e siìr fo.

Fòn Jeroboam woo baà woó Isray

²³ Vé‑eè kòʼór Jeroboam woo wan Jehoash e Samaria ji fon woó Isray, a Fòn Amatsiya woo wan Joash sí sáʼ Juda ji viyá nshòv sitàn e ghvə̀m. Jeroboam‑eè sàʼ kiyá nshòv mòʼón e mkweè.

²⁴ Wù‑uù yii vinyo ve ví wáa bir Nyùy Tàr, a wù yòʼ‑oò lo lèʼ vinyo ve bi ve Jeroboam woo wan Nebat‑iì yii, domsì wír veé Isray, aá yii sa.

²⁵ Jeroboam‑eè lò, e siìr bìíy Isray fo, e kèʼ fo shuù wo wú nəə e Hamat, e sə̀y, e mèé e rìbà ndzə̀v woo Araba, a kù dzə̀ mo Nyùy Tàr woo Nyùy wìr veé Isray‑iì suuyin, e shaà fo wìr lìm və woo Jona. Jona‑aà dzə̀ *ŋgaà ntum Nyùy woo lò fó Gat‑Hefer, a tàr wov dzə̀ Amittay.

²⁶ A kí‑iì dzə̀ jii, Nyùy Tàr‑iì yèn kfə́ə ŋgeʼ ye wìr dzə̀m woó Isray‑iì dzəə̀n shó, à kwàné, à wàn nsay, a bó wìr yòʼ dzə̀ wóo sə áwune.

²⁷ Mo bó Nyùy Tàr yòʼ‑oò lo sùúy ji wun yíi laàr a Isray fo kitu ke nsay, wù nèn shàm áwune, e yiì, Fòn Jeroboam woo wan Jehoash fəə́r áwune fó ŋgeʼ ye vé‑eè dzəə̀n shó.

²⁸ Ké vinyò vímóʼ ví vee Fòn Jeroboam mvə̀m saʼ, à kinyo kidzə̀m ke wù‑uù yiìn kí, à mo vitaáví və́ ví‑iì dzəə̀n, à ké rər se wù‑uù màʼàn, e siìr Damaskus e Isray, e kfə̀n siìr sa Hamat wo yì‑iì dzəə̀n kirə́ʼ keé Juda, á sàŋ vinyo vee shooy e ŋwàʼ wo dzəə̀n Ŋwàʼ Vinyò ve Afòn veé Isray.

²⁹ Jeroboam‑eè lày, á lìtì wun aàtàr və́ vee afon veé Israyí ghaŋ. Sekariya woo wán və nèn yì vifon, a saʼ e wun ntaʼ.