2 Afòn 13 - ŊWÀʼ NYÙY

Fòn Jehoahas woó Isray

¹ Vé‑eè kòʼór Jehoahas woo wan Jehu ji fon woó Isray, a Joash woo wan Ahasiya sí sáʼ Juda ji kiyá nshòv sitaár e mbaà. Jehoahas‑iì sàʼ Isray e Samaria kiyá nshòv saàmbà e ghvə̀m.

² Wù‑uù yii vinyo ve ví wáa bir Nyùy Tàr, kfə̀n jumrì vinyo ve bi ve Jeroboam woo wan Nebat‑iì yii, domsì wír veé Isray, aá yii sa. A bó Ahasiya yòʼ‑oò lo lèʼ fó bàm wó gheéy.

³ Kí nèn yiì, kilòŋ ké Nyùy Tàr kí shwiíy, wù wáa yu bír e kinyò ke wír veé Israyi‑iì yiìn. Wù yú bír bèy, e nèn shwèy áwune, e màʼtì, Fòn Hasael woó Siiria wùn wan və Ben‑Hadad wáa tòn áwune ghán sí, ghán sí.

⁴ Jehoahas nèn lò bùnrì, e lòn Nyùy Tàr. Nyùy Tàr yú bunrì rə́, bìʼ fo wù‑uù yén nyavrì ye fòn woó Siiria nyavrì e wír veé Israyi.

⁵ Wù nèn fò wír veé Isray ŋgaà sə wo wù sə́ áwune fo wír veé Siiriàá wo, wír veé Israyi kfə́n a dzə nyaáŋ aáwuné melaʼ mo vé‑eè dzə́ fo mbìy.

⁶ Yii bèy, áwune yòʼ‑oò lo màʼtì vinyo ve bi ve Fòn Jeroboam‑eè yii, domsì wír veé Isray, aá yii. Áwune kù‑uù du sho dúun fó mbìy. Áwune kfə̀n‑eè màʼtì wúr nyùy woo *Ashera, yí ku gòʼ, a tiy e Samaria.

⁷ A bó Fòn Jehoahas yòʼ kfə̀n‑eè ló a ker kifá kímóʼ kí gheéy, e shaà vé rər veé nyàm se ŋkoʼ mtàn wùn à *viténtén vé rər ví e ghvə̀m, à vé rər ve á ghán e kiwuú kií wír nsə̀kì e ghvə̀m. A kí‑iì dzə̀ bey, bìʼ fo fòn woó Siiria‑aà laàrìn ne mànjòŋ woó Isray, e bvə̀ʼə́y moo kibvər ke á nyèŋèn é riimé.

⁸ Ké vinyò vímóʼ ví vee Fòn Jehoahas mvə̀m saʼ, à vinyo vidzə̀m ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

⁹ Wù‑uù lày, á lìtì wun e Samaria, wan və Jehoash nèn lì kirə́ʼ kfə́, a saʼ vifon.

Fòn Jehoash woó Isray

¹⁰ Yì‑iì dzə̀, a kí sí mee ji kiyá nshòv saàmbà e mtaár mo Fòn Joash‑iì kèʼèn, a saʼ Juda, Jehoash woo wan Jehoahas nèn kèʼ, a saʼ Isray e Samaria, e sàʼ kiyá nshòv ntuùfú e ghvə̀m.

¹¹ Wù‑uù yii sa vinyo ve ví wáa bir Nyùy Tàr, a wù yòʼ‑oò lo màʼtì vinyo ve bi ví ve Jeroboam woo wan Nebat‑iì yii, domsì wír veé Isray, aá yii sa. Wù kù‑uù tíy a dzə̀ shó.

¹² Ké vinyò vímóʼ ví ve Fòn Jehoash‑iì yiìn, à shilív she wù‑uù kér e ghan se wùn Fòn Amatsiya‑aà maʼ rə́r shí, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

¹³ Fòn Jehoash‑iì lày, á lìtì wun fo vé‑eè litì afon veé Samaria. Wan və Jeroboam woo baà yí vifon, a saʼ e wun ntaʼ.

Kpú Elisha

¹⁴ Yì‑iì dzə̀, a Fòn Jehoash woó Isray dzə̀ə́ sho, Elisha gbù yàsí, a jòy, a dzə̀ yàsí wo wù‑uù sí yìi lì wun. Fòn nèn sə̀y fó wùn wó, e dù, a toŋ e kitu wo ji yíméy tàr wor, tàr wor, yíméy ntav wo wù kiŋ Isray.

¹⁵ Elisha suúy e wun jii, «Lì kinte ki wùn à mvən si.» Wù nèn lì kinte wùn à mvəm si.

¹⁶ Elisha nèn sùúy e wun woo fon woó Isray lèn jii, «Sə̀ŋ kinte ki.» Wù nèn sə̀ŋ. Elisha nèn neèr wó rə́ e yé fòné kitu,

¹⁷ e sùúy e fòn jii, «Mvə̀ʼ wundu wo wù kiʼ fo shùy yii tó.» Wù mvə̀ʼ. Elisha nèn sùúy jii, «Màʼ mvəne.» Wù màʼ. Elisha nen yòŋ jii, «Mvə́n Nyùy Tàr ye yí ton kitúm, mvən ye yí ton kitúm kee Siiria. À yíi fùnèn wír veé Siiria e Afek, e dù, e meé mo à maysì áwune, e laàr.»

¹⁸ Elisha kfən sùúy e fòn jii, «Lì mvən símóʼ sí.» Wù lì. Wù suúy e fòn jii, «Sòvtì nsay sho.» Wù nèn sòvtì nsay sho akàŋ ataár, e yàr.

¹⁹ Elisha woo wir Nyùy yú nyár, e sùúy e wun jii, «Aà kì sòvtì nsay sho akàŋ atàn, kìn kàŋ ntuùfú, bo à kì yíi tòn wír veé Siiria ŋkuuŋkùŋ. Yii bèy, à sí yìi tòn áwune akàŋ ataár cáʼ.»

²⁰ Á bèy, Elisha nèn kpù, á dzəə̀mè wun. Wír veé Moavi‑iì lo, á wàa nəə́ wír veé Isray kiyá kidzə̀m e kimgbù ke wuu, a faàsì vifá vév.

²¹ Wáa dzə e ghan símóʼ sí, a wír veé Israyi kì du e dzəə̀mè wír, á lò sàsìn, e yèn ŋgoo wìr veé Moav ve vé‑eè faasì vifá vév viy, e nèn tùʼtìn, e màʼ dzə́n wìr və̀y e mbvə̀ʼ fo vé‑eè dzəə̀mèn Elisha. Dzə́n wìr və̀yi kùm vighvə́r vé Elisha, e nèn kòʼór, e tùm, e tìím e yuv.

Rə́r se Siiria wùn Isray‑iì maʼà

²² Fòn Hasael woó Siiria kù‑uù nyavrì e wír veé Israyi, e kèʼ mo sáʼ Jehoahasi‑iì dzəə̀n.

²³ Yii bèy, Nyùy Tàr kú a leéy áwune, a sham mendzən mev. Wù kù‑uù sə́ áwune bìʼ *mensaŋ me wù‑uù gwàrìn wùn à Abraham, à Aysi, à Jakov, a bó yòʼ‑oò dzə̀ wù biìmé ji á laar áwune. Wù yòʼ‑oò yiì ne jùm áwune fo wun si, e shem lán.

²⁴ Fòn Hasael woó Siiria‑aà lày, Ben‑Hadad woo wán və nèn yì vifon, a saʼ e wun ntaʼ.

²⁵ Á bèy, Fòn Jehoash woo wan Jehoahas fùnèn, e tòn Fòn Ben‑Hadad woo wan Hasael akàŋ ataár, e yòv ŋkà se laʼ se Fòn Ben‑Hadad‑iì màʼàn rə́r, e faàsì fo tàr wov Jehoahas.