1 Wòŋ 9 - ŊWÀʼ NYÙY

Wír ve vé‑eè kfənen é bàm fo vé‑eè koon áwune, e dù sho

¹ Vé‑eè wày yír sé wìr dzə̀m woó Isray e Ŋwàʼ Afòn veé Isray mo kfə́ə sév sí dzə̀kìn. Ké wìr vee rám Juda, vé‑eè koò áwune, e dù sho e Babilon, bìʼ fo áwune‑eè màʼàyìn Nyùy.

² Wír mbìy ve vé‑eè kfənen é bàm aáwuné ntèʼ sí, e dzə̀ʼə̀m aáwuné kitu ke vifaa‑aà dzə̀ wír veé Isray ámóʼó wùn aàtàá cùu, à wír veé ram Levìi, e bóo lì vé lìm veé lav cù.

³ Wír ámóʼó nèn wìy kév, a dzə a dzə̀ é Jerusalem, aá fəə́ fó ram Juda, e fəə̀ fó ram Benjamin, e fəə̀ fo yé Efrayime, é bo ámóʼó fəə́ fo yé Manassèe. Áwune‑eè dzə̀ jii,

⁴ fo kfəə Peres woo wan Juda, yì‑iì dzə̀ Utay woo wan Ammihud, Ammihud woo wan Omri, Omri woo wan Imri, Imri woo wan Bani.

⁵ Fo kfəə Shilo, wáa dzə Asaya wo dzəə̀n ji ŋgàywìr, e bóo lì wón və́.

⁶ Fo kfəə Sera, wáa dzə Jeuel wùn aàfə́r vəə́. Wír vee rám Juda adzə̀me nèn a dzə wír kishóv mbvə̀ʼə̀ e ghiì ntuùfú (690).

⁷ Fo rám Benjamin, yì‑iì dzə̀ Sallu woo wan Meshullam, Meshullam woo wan Hodavia, Hodavia woo wan Hassenua.

⁸ Ámóʼ vee wíri‑iì dzə̀ ji Ibneya woo wan Jeroham wùn à Ela woo wan Ussi, Ussi woo wan Mikri, à Meshullam woo wan Shefatia, Shefatia woo wan Ruel, Ruel woo wan Ibnija.

⁹ Wír veé ram Benjamin adzə̀me nèn a dzə wír nshòv ntuùfú e mtàn e ghiì bvə̀ʼə̀ (956) mo vé‑eè taŋen, e wày é ŋwàʼ, aáwune adzə̀me dzə̀ atǎr kfəə e lav sí lav si.

Atàá cù ve vé‑eè dzə́ e Jerusalem

¹⁰ Fo atàá cùú mbìv, ve vé‑eè dzə́ e Jerusaleme dzə̀ jii, Jedayia wùn à Jehoyiariv, à Jakin,

¹¹ à Asaria woo wan Hilkia, Hilkia woo wan Meshullam, Meshullam woo wan Tsadok, Tsadok woo wan Merayiot, Merayiot wo yì‑iì dzəə̀n wan Ahituv woo wír wo kuʼùn wo wù leey fo lav cù,

¹² e bóo lì Adaya woo wan Jeroham, Jeroham woo wan Pashur, Pashur woo wan Malkija wùn à Maasay woo wan Adi‑el, Adi‑el woo wan Jaasera, Jaasera woo wan Meshullam, Meshullam woo wan Meshillemit, Meshillemit woo wan Immer,

¹³ e lì afə́r vév ámóʼó. Atàá cù ve yì‑iì dzəə̀n atǎr kfəə‑əə̀ dzə̀ wír kishóv mntuùfú e ghiì saàmbà e nsə̀kì (1,760). Áwune adzə̀me‑eè dzə̀ wír vee jwáʼ ve vé‑eè kiìn lim yév yee Nyùy lav kijuŋ.

Wír veé ram Levi ve vé‑eè dzə́ e Jerusalem

¹⁴ Fo wír veé ram Levìí mbìv, wír ve vé‑eè dzə́ e Jerusaleme dzə̀ jii, Shemayia woo wan Hashuv, Hashuv woo wan Asrikam, Asrikam woo wan Hashabia, a dzə̀ wir kfəə Merari,

¹⁵ e lì Bakbakkar wùn à Heresh, à Galal, à Mattania woo wan Mika, Mika woo wan Sikri, Sikri woo wan Asav,

¹⁶ à Obadia woo wan Shemayia, Shemayia woo wan Galal, Galal woo wan Jedutun, e bóo lì Berekiya woo wan Asa, Asa woo wan Elkana, Elkana wo wù‑uù dzə́ e ŋgvən wìr veé Netofa.

Anshìy ve vé‑eè dzə́ e Jerusalem, shiy lav cù

¹⁷ Fo wír ve vé‑eè shiy vibuʼ ve ví nəə fo lav cù dzəə̀n, ve vé‑eè dzə́ e Jerusaleme, yì‑iì dzə̀ Shallum wùn à Akkuv, à Talmon, à Ahiman wùn aàfə́r véví, a Shallum kù dzə̀ kilìmbìy kév.

¹⁸ Wù‑uù shiy kfə́ shúu kibùʼ wo á yoŋ ji wó fòn, a wú nəə e maàndzə lav cù fo mbìv yee fo shùy yii tó, a kù dzə̀ə́ lim rə́, e wìy to lán. Wír vìn adzə̀me kù dzə̀ wír fo mvə̀m ŋgoo anshìy veé ram Levi.

¹⁹ Shallum‑eè dzə̀ wan Kore woo wan Ebiasav, Ebiasav wo yì‑iì dzəə̀n wan Kora. Shallum wùn aàfə́r və́ vee kfə́ə Koràa nèn a leéy lim wìr ve á shiy vibuʼ ve ví nəə fo lav cù dzəə̀n, kù mo atàr véví‑iì shiy nsàn ye yì nəə fo kibàn ké Nyùy Tàr kí‑iì dzəə̀n fó ŋgùʼ,

²⁰ a yì‑iì leey Finehas woo wan Eleasar anshìy e ghan fóo fèy, a Nyùy Tàr‑iì ló a dzə wùn wun.

²¹ Sekariya woo wan Meshelemia‑aà dzə̀ wùmòʼ woo nshìy e nsàn ye yì nəə fo *kibàn ké ntàsín kí‑iì dzəə̀n.

²² Wír adzə̀m ve vé‑eè shoʼtin ji á wáa shìy vibuʼ veé lav cùu wáa dzə wír nshòv sibaà e ghvə̀m e ghiì baà (212). Vé‑eè sàŋ yír sév é ŋwàʼ woo áwuné ntèʼ sí, aá sáŋ é kfəə kfəə. A kù dzə̀ Fòn Davir wùn *ŋgaà ntum Nyùy woo Samuel ve vé‑eè tòmbìy shòʼtí atǎr wìr vìn, e wày lim rə̀n aáwuné kiwo ji wír vee jwáʼ.

²³ Wùn à rám sév sí nèn kù a dzə wír ve vé‑eè shiy vibuʼ ve ví nəə fo lav Nyùy Tàr‑iì tíyí, lav ye vé‑eè yoŋ sa ji kibàn ké Nyùy.

²⁴ Vé‑eè lèm anshìy e shuù se vibùʼ vee vikweè ve ví‑iì dzəə̀n é mbìv see sikweè, a sí dzə̀ jii, mbìv yee fo shùy yii tó, mbìv yee fo yì yii nəə, mbìv yee kuy à yee tsə́n.

²⁵ Afə́r véví‑iì lo, á wàa wìy ghán sighán fó ntèʼ sí, a sə áwune, akàyi sə́ vishiíy saàmbà, á nèn fò kilíŋ aámóʼó.

²⁶ Anshìy vee akweè ve yì‑iì dzəə̀n vitúu kù‑uù dzə̀ wír veé ram Levi feyì feyì, a vinyo vidzə̀m vi shaa a dzə̀ aáwuné kiwo, a kfə̀n kiiy áwune kinyo fo mewon me lav, kfə̀n kiiy ké vitàv vee Nyùy lav.

²⁷ Áwune‑eè shiiy e ghaa lav cù, bìʼ fo yì‑iì dzəə̀n lim yév ji á wáa shìy fó, e kfə̀n a mvə̀ʼtì shuu se vibùʼ vijàvndzə vidzə̀m.

²⁸ Wír veé ram Levi ámóʼó dzə̀ ve vé‑eè leey vifá ve ker veé lav cù. Áwune‑eè lo, á tàŋ vifá ve ker vìn e ghan se á fəər, e yiì lim sho, e kfə̀n tàŋ é ghan se á siir fo.

²⁹ Ámóʼó dzə̀ ve vé‑eè leey fo vifa veé kirə̀ʼ kee jeéy kí, kfə̀n leey fo meŋkfə̀ŋ, leey fo melùʼ, leey fo meŋgvə̀r me *oliv, à fó kilay, à fó vishàŋsìn ve vifa.

³⁰ Yii bèy, vifá vee shwír, é ví wáa shàŋsìn vi‑iì dzə̀ lím atàá cù ámóʼó.

³¹ Wìr woó ram Levi wùmòʼ wo yírí‑iì dzəə̀n ji Mattitia wáa dzə wír wo wù‑uù ton kibán ke cù ke á yii yii cu vifá ve yi sho. Wù‑uù dzə̀ wan Shallum wo mbìy, Shallum woo wir kfəə Kora.

³² Wír veé kfəə Kohat ámóʼó dzə̀ ve lim yéví‑iì dzəə̀n ji á wáa leéy a fo kinyò ke kiban kee jeéy kí, ke á neer e kidàŋ kishiíy ké bam kidzə̀m.

³³ Wír veé ram Levi ámóʼó‑oò kér yév yee lim a dzə̀ yòv woó lav cù. Atǎr kfəə vìne‑eè shiíykir e mewon me lav meé lav cù, aá yòʼ‑oò lo kfə̀n wày lim símóʼ sí aáwuné kiwo, bìʼ fo vé‑eè lo, á wàa lìm e shùy, a lìm vitsə́ʼə́.

³⁴ Wír ve á kì yòŋrìn vin adzə̀me kù dzə̀ atǎr kfəə fo kfəə́ seé ram Levi si, a vé‑eè tàŋ áwune é lav sí lav si. Kù dzə̀ áwune vilìmbìy ve ví‑iì shiiy e Jerusalem.

Atǎr kfəə Fòn Saul

³⁵ Jeyel woo tàr à wìr veé Gibeon‑eè dzə́ e Gibeon. Yír wiiy vəə́‑əə̀ dzə̀ Maaka,

³⁶ a wan və mbìy‑iì dzə̀ Abdon, a bám sə́ sí dzə̀ Tsur wùn à Kish, à Baal, à Ner, à Nadav,

³⁷ à Gedor, à Ahiyo, à Sekariya, à Miklot.

³⁸ Miklot‑iì dzə̀ tàr à Shime‑Am. Áwune‑eè dzə́ sa e Jerusalem, e wír véví ghaŋ.

³⁹ Ner‑iì dzə̀ tàr à Kish, a Kish dzə̀ tàr à Saul, a Saul dzə̀ tàr à Jonatan wùn à Malkishua, à Abinadav, à Eshbaal.

⁴⁰ Jonatan nèn wìy a dzə tàr à Merib‑Baal wo yì‑iì dzəə̀n tàr à Mika.

⁴¹ Mika‑aà kér wón akweè, aá dzə̀ ji Piton, Melek, Taarea wùn à Ahas.

⁴² Ahas‑iì dzə̀ tàr à Jara, a Jara dzə̀ tàr à Alemet wùn à Asmavet, à Simri. Simri‑iì dzə̀ tàr à Mosa,

⁴³ a Mosa dzə̀ tàr à Binea, a Binea dzə̀ tàr à Refayia, a Refayia dzə̀ tàr à Eleasa, a Eleasa dzə̀ tàr à Asel.

⁴⁴ Asel‑iì kér wón ntuùfú, a yír sév sí dzə̀ ji Asrikam, Bokeru, Ishmael, Shearia, Obadia wùn à Hanan.