1 Wòŋ 5 - ŊWÀʼ NYÙY

Rám Ruben

¹ Rám Ruben woo wan Isray woo ŋgàywìri rə́ne. Wù‑uù dzə̀ wán woo ŋgàywìr, yii bèy, á sə́ ghay və́ viŋgày vé wìr, e fò e wón Joosev woo wan Israyi, bìʼ fo wun woo Ruben‑eè liìn wiiy tàr wov.

² Mo rám Judàa fə̀m‑eè siiyin, a ker vitaáví, a taà saʼ wo wù sáʼ kfəə́ sidzə̀m kù fəə́ a dzə̀ fó fo, gháy viŋgày vé wìri ku yòʼ gòʼ a dzə wó Joosev.

³ Wón Ruben woo wan Isray mbìyi‑iì dzə̀ ji Hanok, Pallu, Hesron wùn à Karmi.

⁴ Wír vee ràm fo Joeli nén a dzə jii, Shemayia woo wán və, Gog woo wan Shemayia, Shimey woo wan Gog,

⁵ Mika woo wan Shimey, Reayia woo wan Mika, Baal woo wan Reayia, e lì Beera woo wan Baal,

⁶ a dzə̀ Beera və̀n wo Fòn Tilgat‑Pilneser woó Assiriya‑aà koon, e dù sho, a wù dzə̀ kilìmbìy kee rám Ruben.

⁷ Ŋwàʼ wo vé‑eè sáŋ vinyo veé kfəə shoo‑oò din vilìmbìy vee rám Ruben, a ví dzə̀ é lav sí lav si. Vilìmbìy vìn vi dzə̀ jii, Jeyel woo kitú wùn à Sekariya,

⁸ à Bela woo wan Asas wo kfə̀n‑eè dzəə̀n wan wàn Shema, Shema woo wan Joel. Bela wùn à kfə́ə rəə́‑əə̀ dzə́, e kèʼ fo Aror, e dù, e meé e Nebo wùn ǎ Baal‑Meon.

⁹ Áwune kfə̀n‑eè sùm nsay yeé mbìv yee fo shùy yii tó, e dù, e mèé mo wóʼó ndzə̀yìn é shùu ndzəv yee Yufret. Vé‑eè sáŋri bèy, bìʼ fo nyám sév sí‑iì loòn ne, a dzəə́, a kùʼ e wòŋ Gilead.

¹⁰ Wáa dzə e ghan se Saul‑iì sáʼ Isray, rám Ruben rə̀ne nəə́ kfə́ə Hagri e rə́r sí, e yùyrí áwune, e yòv nsay yev e dzə̀m, e wòŋ Gilead, e mbìv yee fo shùy yii tó.

Rám Gad

¹¹ Rám Gadi‑iì dzə́ e wòŋ woo Bashan, kuy fo nsay rám Rubene, e kèʼ bèy, e dù, e mèé e Saleka.

¹² Taà kfəə ye kuʼùné wáa dzə Joel, wo wù batin wáa dzə Shafam. Ámóʼó nén a dzə Janay wùn Shafat, a vé‑eè dzə́ e mvə̀m wòŋ Bashan fèy.

¹³ Wír vee rám Gad ámóʼó nén a ker sa kfəə́ si moo yé Mayker wùn à yé Meshullame, à yé Shebàa, à yé Jorayi, à yé Jakane, à yé Siyàa, e bóo lì yé Eber. Áwune‑eè dzə̀ wír saàmbà,

¹⁴ aá rám fo Abihail woo wan Huri, Huri woo wan Jaroa, Jaroa woo wan Gilead, Gilead woo wan Mayker, Mayker woo wan Jeshishay, Jeshishay woo wan Jaado, Jaado woo wan Bus.

¹⁵ Ahi‑iì dzə̀ kitú aáwuné kfəə. Ahi və̀n‑eè dzə̀ wan Abdiel, Abdiel woo wan Guni.

¹⁶ Rám Gad rə̀ne‑eè dzə́ e ŋkà se laʼ seé Gilead wùn Bashan, ǎ ntèʼ see fó ghaŋ, e kfə̀n a dzə e jiy yeé Sharon e dzə̀m fo áwune‑eè yiir nyám sév, du, mee.

¹⁷ Vé‑eè bàʼtí vinyo vee kùm rám vin, e sàŋ é ghan se Fòn Jotam‑eè sáʼ e mbìv wòŋ yee Juda, a Fòn Jeroboam sáʼ mbìv wòŋ yee Isray.

Mànjòŋ ràm seé ndzə̀n Jordan

¹⁸ Rám Ruben, e lì yé Gad, à kintoʼnìn ke rám Manasse ki‑iì kér wír ve yì‑iì dzə̀ á màʼ rə́r, wír kishóv mntuùfú e ghiì saàmbà, aànsə̀kìi nshòv sikweè e mkweè (44,760), a wìr dzə̀m kì móo ghar ŋkeè wùn à nyùy rə̀r, à kinte ki.

¹⁹ Áwune‑eè maʼ wír veé Hagri e rə́r sí, maʼ veé Jeturi, maʼ veé Nafish, e bóo lì veé Nodav.

²⁰ Áwune‑eè maʼ rə́r sin, tiir a dzə̀ Nyùy fo mbìy, tóŋ ji wù sə́ á áwune. Wù nèn yù tóŋ yév, e yiì, áwune tón wír veé Hagri wùn à vé ntom véví.

²¹ Áwune‑eè faàsì nyám se wìr veé Hagri, a yì‑iì dzə̀ akamer nsə̀kì mtàn (50,000), njiì ansə̀kì kishóv mtàn e ghiì baà (250,000), vimbèʼbìy ansə̀kì abaà (2,000), e bóo lì akookòŋé nsə̀kì wií (100,000).

²² Nyùy Tàr‑iì màʼ rə́r sév, áwune yúyrí wír nyanyày, e nèn sə̀ nsay yev, a dzə sho, e dù, e meé mo wír veé Assiriyàa‑aà kuuyin áwune, e dù sho aáwuné wòŋ.

Assiriya tón rám seé ndzə̀n Jordan

²³ Kintoʼnìn ke rám Manasse ki‑iì dzə̀ wír nyanyày. Áwune‑eè dzə́ e nsay Bashan, e dù, e mèé e Baal‑Hermon, e dù, e mèé e Senir, e kfə̀n dù, e mèé e Gwan Hermon.

²⁴ Atǎr kfəə vee rám Manassèe dzə̀ jii, Efer, Ishi, Eliel, Asriel, Jeremia, Hodavia, à Jaadiel. Áwune vee atǎr kfəə kfə̀n‑eè dzə̀ antav, a leŋ wóví du.

²⁵ Yii bèy, wír veé ram Manassèe yòʼ‑oò ló a tiy wùn à Nyùy woo Nyùy atàr vév. Áwune‑eè shaà Nyùy, e nèn a ghvəm a dzə̀ anyùy wìr veé nsay foo fèy, wír ve Nyùy‑iì laàrìn fo áwuné mbìy, é bo áwune wáa nəə́ fo.

²⁶ Á bèy, Nyùy wìr veé Isray nèn yiì, Fòn Pul woó Assiriya wìy, e tòn áwune. Vé‑eè yoŋ yír fòn və̀n yímóʼó ji Tilgat‑Pilneser. Wù tòn bèy, e kùúy rám Ruben wùn à yé Gadi, à kintoʼnìn ke rám Manasse ki, e dù sho, e lèm e Hala, e lèm ámóʼó é Habor, e lèm ámóʼó é Hara, e kfə̀n lèm ámóʼó e shaà ndzə́v yee Gosan, aáwune kù dzəə́ dzə́ fo, e wìy shem lán.