1 Wòŋ 29 - ŊWÀʼ NYÙY

Afómó kibàʼrì ke lav cù

¹ Fòn Davir nèn sùúy e wìr dzə̀m wo wù‑uù baʼtin jii, «Solomon woo wán wom wo Nyùy shoʼon ne dzə̀ ben, a wù kùy kúyín, a wù dzəə́ nəə nə̀ə́n é vinyò, a lim ye á foon shóo tàv é ŋàŋ. Ntoʼ ye wù baʼrì yòʼ dzə̀ ye wìr msòŋ, dzə̀ ye Nyùy, wun woo Nyùy Tàr.

² M mùm ne e vitaáví vém ví vidzə̀m, e bàʼtí vifá ve kibàʼrì ve lav Nyùy wom. Vifá vìn vi sì vibáʼtín mo shií woo shó dzəə̀n. Ví dzə̀ jii, *kisha ke mbàm ke baar kí, kisha ke mbàm ke fəvír kí, kisha kee *brons, kisha kee kisha, vicí ve toʼón ví, e lì sa tíy yee oniks wùn à kfəə́ se *síbaŋ símóʼ sí, e bóo lì tíy ye juujùŋ yímóʼó ye á láʼti e wǔn lav, é bo yé kimbome kfə́n a dzə e ghaágháʼán, a dzə̀ ye yí shomkìrì.

³ M kfən siì fò kisha ke mbàm ke baar kí wùn à ke fəvír kí, ke kí loòn a dzə̀ fo mǒ kiwo, a dzə̀ bùʼ wom wo m dzəsì e kitu ke vifa ve m baʼtin ne bìʼ lav ye dzəə̀n ye Nyùy, a m yiì bèy, bìʼ koŋ ye m kér fo lav Nyùy wom.

⁴ M dzə̀sì kisha ke mbàm ke baar kí aton e kishov keé wiì, a kù dzə̀ kee wìy fó Ofir, e dzə̀sì sa ke fəvír kí kishóv mkweè e ghiì baà (240). Visha vìn vi dzə̀, aá wíy laʼtí e virəv vé lav cù,

⁵ e kfə̀n a yiì lim símóʼ sí shó sidzə̀m se sí dzə́r kisha ke mbàm ke baar kí, kìn ke fəvír kí. Fòn Davir naárí bey, e dzə̀r jii, lèn və̀n, wìr dzə̀ sá wo wù koŋ e fo kitú kfə́ e Nyùy Tàr, e fo sa fómo və á?»

⁶ Á bèy, wíri nèn a fo afómo vév, a fo bèy, a wàrkìr. Atǎr kfəə wáa fo, vilìmbìy ve ram seé Isray vi wáa fo, amfòómé ve á sáʼ wíri nsə̀kì nsə̀kì, à ve á sáʼ wíri wií wií wáa fo, e bóo lì vilìmbìy ve ví‑iì leey lím fòn.

⁷ Áwune‑eè fò vifá ve á náŋsín lav Nyùy sho, a ví dzə̀ jii, kisha ke mbàm ke baar kí, a kí shaá aton kishóv msaàmbà e wiì (170), e kfə̀n fò sá mbàm see kisha ke baar kí, a sí dzə̀ nsə̀kì e ghvə̀m (10,000), e fò ke fəvír kí, a kí shaá aton kishóv mkweè e ghiì taár (340), a kee brons ki dzə̀ moo aton kishóv mbaà é ghiì ntuùfú (620) bey, e bóo lì kisha kee kiy, a kí shaá aton kishóv ghii kweè aànsə̀kìi ataár (3,400).

⁸ Wír ve vé‑eè kér síbaŋ seé kilùme‑eè wiy, fó, aá wáy e kitàv kee Nyùy Tǎr lav, a Jehiel woo wir Gershon nèn leey fo fo.

⁹ Wír ve vé‑eè foon vifá vìn e Nyùy Tàrí‑iì fó wùn à shilív shév shí, aá fó bèy koŋè, a wìr dzə̀m yú vijuŋ. Fòn Davir‑iì yú sa vijuŋ feyì.

Fòn Davir bunrì, búri Nyùy

¹⁰ Fòn Davir nèn lò, e tìím e màŋgòŋ wo wù‑uù baʼtín si, a burí Nyùy Tàr, a suúy jii, «Éè Nyùy Tàr woo Nyùy Isray woo tàr à atàr vér, á kú a burí wò, e wìy dù, e mày.

¹¹ Feyì, feyì, Nyùy Tàr, à dzə̀ e gháʼtín. À tàv é ŋàŋ, e kfə̀n kùʼ e ŋàŋ. À yii só soón, a vifon vé vi dzə̀ ve wiy ví. Kér wò vifá vidzə̀m veé yuv, à veé nsay vi. Rúrú, Nyùy Tàr, kù sáʼ wò vifon, a kifá kidzə̀m ki kù néŋ a dzə̀ e wò sar.

¹² A wìr kér káv, kìn vikuʼùy, bo ví kù lò a dzə̀ fo wò. Sáʼ wò kifá kidzə̀m. Vitaáví vidzə̀m vi kù dzə̀ a dzə̀ e wò kiwo. À lo, à wàa fo wir dzə̀m vitaáví, lo, à kòʼór wo wo‑óò kóʼór.

¹³ Nyùy wor, vèr beerì wò lèn, kfə̀n búri yír yé ye kuʼùné.

¹⁴ Á bèy, à mò, à wír vémé, a vèr fə̀m bònen fò vifá e wò e le, bo dzə̀ ví mèé é gha? Kí kifá kidzə̀m ki kù lò a dzə̀ fo wò, vèr nen bày ke vèr foon e wò, a kù dzə̀ fó fo.

¹⁵ Vèr dzə̀ viŋgwìy, e kfə̀n a dzə vé kiŋgàné e nsay mo atǎr atàr vérí‑iì dzəə̀n, a vèr yòʼ wíy gòʼ fèn. Vishiíy vér veé nsay fèn vi dzə̀ moo kindzə̀ə́ndzəm ke kí yòʼ yii goʼ fo.

¹⁶ Éè Nyùy Tàr woo Nyùy wor, à dzə̀ e ránén. Nyanyày vifa wo vèr foon ji á baʼri lav rə̀n, yé a ghvəm wò sho vi kù lò a dzə̀ fo wò kiwo, a vidzə̀m vi kù dzə̀ vé.

¹⁷ Nyùy wom, m kì ji à yii tar melív me wíri, yén she shí tíy tìítiy, à wàa yu vijuŋ. M fò vifá vìn e wò là kiloʼ, a m fò vèr à shilív she juŋ shi. M kfə̀n yèn sá mo wír vé ve á baʼtin fene fó vifá e wò e shilív she juŋ shi, shéʼri.

¹⁸ Éè Nyùy Tàr, Nyùy atàr vér vee Abraham, Aysi, à Isray, ku yiì, é shií wo wír vé vìne dìnèn kú a tiy fo, é kwaʼtì ye áwune kéríi wáa dù fo mbìy, e wìy dù, e mày. Ku kfə̀n yiì, é melív mev mè wáa tiy a dzə̀ e wò wùn.

¹⁹ Yiì ji shilív shé wan wom Solomon shi kú a tiy a dzə̀ é kinyò kimòʼón, kee ji wù kú a yu a sáʼ yé, a yunín nsər sé, a tiy e vinyò ve à tínen vidzə̀m, a yiì mo ví dzəə̀n, e kfə̀n bàʼrì ntoʼ yè, ye m yiìn ne mbaʼtì rə̀n.»

²⁰ Davir nèn sùúy e wìr dzə̀m wo wù‑uù baʼtin jii, «Vèn wáa burí Nyùy Tàr woo Nyùy won.» Wìr dzə̀m wo wù‑uù baʼtin fó nèn a burí Nyùy Tàr woo Nyùy atàr vév. Vé‑eè tsə̀m ndzəə́, e làʼ kitú e nsay, e ghvə̀m Nyùy Tàr, e nèn fò sá ghvə́m e fòn.

²¹ Lòo dzə e kishiíy ke kí‑iì batin, wír veé Israyi wáa seerí nyám si, a cù Nyùy Tàr shó. Nyàm nèn a dzə e gháʼán ye wìr woó Isray e dzə̀m wáa yi. Á kfə̀n‑eè yiì cu se tonèn sí, aá seérí nàʼ nsə̀kì, viyáʼ nsə̀kì, wón viyaʼ nsə̀kì, e cù Nyùy Tàr shó. Áwune kfən yiì sa cu yee yé melùʼ.

²² Áwune‑eè yíkir, nó vifá, yú vijuŋ ve tavín ví e Nyùy Tǎr si e kishiíy fóo fèy. Áwune nèn lò, e bìysí Solomon woo wan Davir ji fon fo akàŋ vee abaà, e yòʼ wun ji fon wov e Nyùy Tǎr si, e nèn yòʼ sá Tsadok ji taà cù.

²³ Solomon nèn yì ntaʼ tàr wov Davir, e kòʼ é kàvàʼ wo dzəə̀n ji wo Nyùy Tàr. Sáʼ rəə́‑əə̀ du kijuŋ, a wìr woó Isray e dzə̀m ghvə́m wun.

²⁴ Vilìmbìy vidzə̀m wùn à vé rərí adzə̀m, à wón ntoʼo nèn fò kaʼ ji áwune yíi a neŋ a e Fòn Solomon sar saʼ.

²⁵ Nyùy Tàr‑iì nàn Solomon feyì, wìr dzə̀m woó Isray wáa leéy wun, a ker gháʼ. Wù kfən yiì, viwìr ve Solomon ve vifòn vi wáa dzə ve bó fòn woo wun mbìy wùmòʼ yòʼ‑oò yiì ne a ker.

Vitú ve vinyò ve saʼ Davir

²⁶ Fòn Davir woo wan Jessi‑iì sáʼ woŋ Isray e dzə̀m.

²⁷ Viyá vidzə̀m ve wù‑uù saʼan woŋ Isray vi‑iì dzə̀ mkweè. Wù‑uù sàʼ vifon e Hebron kiyá saàmbà, e sàʼ é Jerusalem kiyá nshòv sitaár e mtaár.

²⁸ Fòn Davir‑iì ló a ker káv, a ker ghvə́m, a ker dzəʼə̀m ye dáa. Wù‑uù lay, a wù dzə́n ne, e kòŋrí koŋrín, wan və Solomon nèn yì vifon, a saʼ e wun ntaʼ.

²⁹ Vinyo vee Fòn Davir saʼ vidzə̀m, e kèʼ fo kèʼ, e dù, e màysì, á sàŋ áàŋwàʼ vinyò vee vé aŋgàa ntum Nyùy vee jii, Ŋwàʼ Vinyò ve Samuel, à wó Vinyò ve Natan, e lì wó Vinyò ve Gad.

³⁰ Vé‑eè sàŋ, e naàrì mo sáʼ Fòn Daviri‑iì dzəə̀n e dzə̀m, e kfə̀n naàrì mo vitaáví və́ ví‑iì dzəə̀n. Á kfə̀n‑eè naàrì vinyo ve ví‑iì kooyin Fòn Davir, e kòóy woŋ Isray, e kfə̀n siì naàrì vinyo ve ví‑iì kooyin vitúm ve ví‑iì dzə́ aáwuné ghaŋ.