1 Wòŋ 28 - ŊWÀʼ NYÙY

Fòn Davir naárí kinyo ke kibàʼrì ke lav cù

¹ Fòn Davir‑iì tòóy vilìmbìy veé Isray vidzə̀m, ví báʼtí é Jerusalem. Vé‑eè dzə̀ jii, atǎr ram seé Isray, amfòómé ve á sáʼ akáŋ rər ve á shiy woŋ, e lì amfòómé ve á wám wíri nsə̀kì nsə̀kì, à ve á wám wíri wií wií, e kfə̀n lì wír ve á leey fo kéŋ fòne e dzə̀m, à nyám si shó, kfə̀n leey sa fo wón ntoʼo, e bóo lì atǎr ntoʼ, e siì lì antav wùn à vé rər ve tavkíné adzə̀m.

² Vé‑eè bàʼtí bey, Fòn Davir nèn lò e yuv, e yòŋ aáwune jii, «Afə̀r vem, wìr vem, vèn yuúrí, é m suúy ven kinyo. Mò‑oò sí kér e mǒ kwàʼtì ji m wíy bàʼrì a lav ye ŋkùv mensàŋ Nyùy Tàr kù wíy a dzə sho ghán sidzə̀m, ŋkùv mensàŋ wo Nyùy dzə́ e kàvàʼ, a wúu rəə́ meemè sho. Á bèy, m nèn yiì mbaʼtì kibàʼrì kìn.

³ Nyùy Tàr nèn lò, e sùúy e mò jii, yòʼ dzə̀ bàʼrì á mo lav ye á wáa cù wun sho, bìʼ fo m dzəə̀n wir rə̀r, a m yùyrí ne a wír anín, mensə́ mev mè leém e wun si.

⁴ Yii bèy, Nyùy Tàr woo Nyùy wìr veé Isray‑iì lò, e shòʼ mo fo tàr wór lav ji m wáa saʼ a wír veé Isray, e wìy dù, e mày. Wù‑uù shòʼ rám Juda ji kù wíy a saʼ a rám rən woŋ Isray. Fo rám Juda, Nyùy Tàr nèn shòʼ kfə́ə tàr wor. Fo wón tàr worí, wù nèn kòŋ mo, e kòʼór mo ji fon wìr veé Isray adzə̀m.

⁵ Fo wón ve Nyùy Tàr foon e mò agháʼáné, wù nen shòʼ wán wom woo Solomon ji kù wíy dzə̀ʼə̀m a wun e kàvàʼ woó Isray wo dzəə̀n kitúm ke wun woo Nyùy Tàr.

⁶ Wù wáa suŋnín e mò, a yòŋ jii, ‹Dzə̀ wan wò woo Solomon wo wù wíy bàʼrì lav yem, e naŋsín maàndzə si. M shòʼ ne wun ji wán wom, a m wíy a dzə tàr wov.

⁷ M wíy yiì, é sáʼ rəə́ tuúy, a tiy fo, e wìy dù, e jòʼsì, a wù fen gòʼ, a yu a dzə̀ sáʼ yém, a yunín nsər sém mo wù yúnin lán bèn.›

⁸ «Lèn və̀n wo m tíy e wír veé Israyí si, ven ve dzəə̀n wír Nyùy Tàr, a m kfə̀n tíy, súŋnin bèn, a Nyùy wòsən yú. M nén a suúy jii, vèn wáa yunín nsər se Nyùy Tàr wo dzəə̀n Nyùy won, e fíʼ wìy gòʼ, a dzə e nsay ye juŋ rə̀n, e nèn wìy màʼtì e wón véné ji vitsə́ʼ vév.

⁹ «Wówò Solomon woo wán wom, kiíy Nyùy wo tàr won ghvə́mé. Á ghvəm vèn à shilív shé shi shidzə̀m, à kwaʼtì yée e dzə̀m, bìʼ fo Nyùy Tàr yii tar melív medzə̀m, a wù kfə̀n yii kiiy kwaʼtì e dzə̀m ye yí dzəə̀n e wìr vifii. Aà yiì a tàʼ wun, áà wáa yen. Yii bèy, à maʼay wun, bo wù yíi bìn ndzə̀m e wò, e màʼày wò ŋkuuŋkùŋ.

¹⁰ Ku kìíy bèy, a kuumé ji Nyùy Tàr shòʼ ne wò ji à yíi bàʼrì a lav cù ye dzəə̀n kirə́ʼ kfə́ kee jeéy. Kúr shilív shí, e yiì lim yee shoone.»

¹¹ Davir nèn fò mfìʼ se kibàʼrì ke lav cù sidzə̀m e wan və Solomon. Wù‑uù fò mfìʼ se cí lav, e fò mfìʼ se vitàv wùn à sé mvəm sé lav see fó yuv, à sé mvəm sé lav see fó sar si, e bóo lì sé mvə̀m lav yee fo ŋkùv mensàŋ‑eè yíi a tiy.

¹² Wù kfən fò mfìʼ se wù‑uù kér e vifii se yì‑iì dzəə̀n sé maàndzə wùn à sé mewon me lav me mè kaarin lav cù si, e fò sá sé vitàv veé lav cù, à sé vitàv vé vifa ve á foon ne ji vé Nyùy vi.

¹³ Fòn Davir kfən naàrì e Solomon mo akáŋ lìme dzə̀kìn, vé atàá cù, à vé wìr veé ram Levìi, e kfə̀n fò ntir yee kùm lim e dzə̀m yee Nyùy Tǎr lav, à vifá ve ker veé lav cù vi.

¹⁴ Wù‑uù naàrì *kisha ke mbàm ke baar kí wùn à ke fəvír kí ke dzə̀ á lì, e fèr vifá ve ker veé lav cù sho e kitu kitu.

¹⁵ Wù naàrì mo dzə̀ kisha ki nə̀ə́ é vitiir ve làm, e kfə̀n nə̀ə́ e làm si.

¹⁶ Wù sii fò mfìʼ vidzəə̀sì vé kishà ke mbàm ke baar kí, ke á fer kidàŋ ke kiban ké cù sho, e kfə̀n fò mfìʼ vidzəə̀sì ye kishà ke mbàm ke fəvír kí, ke á fer vidàŋ vímóʼ ví shó.

¹⁷ Fòn Davir kfə̀n‑eè fò mfìʼ vidzəə̀sì ye kishà ke mbàm ke baar kí kee wúntí kíwun, ke á fer vinsòv ve nyàm sho wùn à vighín ví, à ve á fer kíŋ sé mendzə̀v wùn aàbàri shó. Wù kfən fò mfìʼ kishà ke á fer vighín shó jeéy jeéy, vímóʼ ví vee kisha ke mbàm ke baar kí, vímóʼ ví vee ke fəvír kí.

¹⁸ Wù‑uù fò sá mfìʼ kishà ke mbàm ke baar kí kee wúntí kíwun, ke á fer *kíy cù kilay shó. Wù kfən naàrì mo á wíy fèr vifá veé yuv, ve ví kér vav si, ve ví dzəə̀n ji *kiténtén ké rər ké Nyùy Tàr, a ví dzə́ e Nyùy Tǎr kitu ke ŋkùv mensàŋ, kér vav si, a sí sáŋrí wún é kitu ke ŋkùv.

¹⁹ Fòn Davir naàrì bèy, e sùúy jii, «Vinyo ve lìm vìn vidzə̀m vi dzə̀, a m sàŋ mo Nyùy Tàr dìnèn e mò ji m wàá sáŋ mo lim dzə̀me kér fó a dzə.»

²⁰ Á bèy, Fòn Davir nèn sùúy e wan və Solomon jii, «Kúr tímé, e wày ŋàŋ, e yiì líme. Lá à yòʼ a fàn, lá à yòʼ weèy, bìʼ fo Nyùy Tàr, wun woo Nyùy, wun wo dzəə̀n Nyùy wom kù wíy a dzə vèn wun. Wù kù wíy a leéy fo wò, é lim dzə̀m yee wun lavi du, e mày kijuŋ.

²¹ Atàá cù wùn à wír veé ram Levìi sì áàkáŋ aàkáŋ mo á wíy lò, a yiì vinyo vidzə̀m vee Nyùy Tǎr lav. Ké lìm ye yí siìn é kiwo, wír ve á kiìn lím kiwoo kér shií, e tom wò e vinyò vidzə̀m. Vilìmbìy vi kù yuúri a dzə̀ wò, a wìr dzə̀m sì kibáʼtín.»